Read Sinhala Revised Old Version ශු. යොහන් 8 Bible Online

ශු. යොහන් 8 - Sinhala Revised Old Version bible

ශු. යොහන් 8

²උන්වහන්සේ අලුයම දේවමාළිගාවට නැවත ආසේක, මුළු සෙනඟ උන්වහන්සේ ළඟට පැමිණියෝය; උන්වහන්සේ වැඩහිඳ ඔවුන්ට ඉගැන්වූසේක.

³එවිට කාමමිථ්‍යාචාරය කරද්දී අසුවූ ස්ත්‍රියෙක් ලියන්නන් හා පරිසිවරුන් විසින් ගෙනැවිත් මැද සිටුවා,

⁴උන්වහන්සේට කථාකොට: ආචාරිනි, මේ ස්ත්‍රී කාමමිථ‍්‍යාචාරය කරද්දීම අල්ලනලද්දීය.

⁵මෙබඳු අය ගල්ගසා මරන්ට මෝසෙස් විසින් ව්‍යවස්ථාවෙහි අපට අණකර තිබේ. නුමුත් ඔබ මෑ ගැන කියන්නේ කුමක්දැයි ඔව්හු උන්වහන්සේගෙන් ඇසුවෝය.

⁶ඔවුන් මෙසේ ඇසුවේ උන්වහන්සේ පරීක්ෂාකරමින් උන්වහන්සේට වරද තබන්ට කාරණයක් ලබන පිණිසය. නුමුත් යේසුස්වහන්සේ නැමී ඇඟිල්ලෙන් බිම ලිවූසේක.

⁷ඔවුන් උන්වහන්සේගෙන් අස අසා සිටියදී උන්වහන්සේ කෙලින්වී ඔවුන්ට කථාකොට: ඔබ සැම අතරෙන් පව් නැත්තා ඈට පළමුකොට ගලක් ගසාවයි කියා,

⁸නැවතත් නැමී ඇඟිල්ලෙන් බිම ලිවූසේක.

⁹ඔව්හු ඒ අසා වැඩිමහල්ලා පටන් බාලයා දක්වා එකිනෙකා පිටතට ගියෝය. යේසුස්වහන්සේ පමණක් එහි සිටිසේක, ස්ත්‍රීද සිටි තැනම මැද සිටියාය.

¹⁰යේසුස්වහන්සේ කෙලින් වී, ස්ත්‍රියට කථාකොට: ඔව්හු කොහේද? කිසිවෙක් ඔබ වරදට පත්කළේ නැද්දැයි ඇසූසේක.

¹¹ස්වාමිනි, නැතැයි ඈ කීවාය. එවිට යේසුස්වහන්සේ: මමත් ඔබ වරදට පත් නොකරමි. යන්න, මෙතැන් පටන් තවත් පව් නොකරන්නැයි ඈට කීසේක.]

¹²එබැවින් යේසුස්වහන්සේ නැවත ඔවුන්ට කථාකරමින්: මම ලෝකයේ ආලෝකයය. මා අනුව එන්නා අන්ධකාරයෙහි නොහැසිර ජීවනයේ ආලෝකය ලබන්නේයයි කීසේක.

¹³එබැවින් පරිසිවරු: ඔබ ඔබ ගැනම සාක්ෂිදෙන්නෙහිය; ඔබේ සාක්ෂිය සැබෑ නැතැයි උන්වහන්සේට කීවෝය.

¹⁴යේසුස්වහන්සේ ඔවුන්ට උත්තරදෙමින්: මා ගැනම මා සාක්ෂිදෙතත් මාගේ සාක්ෂිය සැබෑය; මක්නිසාද මම කොතැනින් ආයෙම්ද කොතැනට යම්දැයි දනිමි; එහෙත් මා එන්නේ කොතැනින්ද යන්නේ කොතැනටදැයි ඔබ සැම දන්නේ නැත.

¹⁵ඔබ සැම මාංසාකාරයෙන් විනිශ්චයකරවුය; මම කිසිවෙකු විනිශ්චය නොකරමි.

¹⁶නුමුත් මම විනිශ්චයකරම් නම් මා තනියම නොව මා සහ මා එවූ පියාණන්වහන්සෙත් සිටින බැවින් මාගේ විනිශ්චය සැබෑය.

¹⁷එසේය, මනුෂ්‍යයන් දෙදෙනෙකුගේ සාක්ෂිය සැබෑයයි ඔබ සැමගේ ව්‍යවස්ථාවෙහි ලියා තිබේ.

¹⁸මා ගැන සාක්ෂිදෙන්නේ මමය, මා එවූ පියාණන්වහන්සේද මා ගැන සාක්ෂිදෙනසේකැයි කීසේක.

¹⁹එබැවින් ඔව්හු: ඔබේ පියාණන් කොතැන්හිදැයි උන්වහන්සේගෙන් ඇසුවෝය. යේසුස්වහන්සේ උත්තරදෙමින්: ඔබ සැම මාවත් මාගේ පියාණන්වහන්සේවත් අඳුනන්නේ නැත. ඔබ සැම මා ඇඳින්නහු නම් මාගේ පියාණන්වහන්සෙත් අඳුනනවා ඇතැයි කීසේක.

²⁰උන්වහන්සේ දේවමාළිගාවේ උගන්වමින් මුදල් ගබඩාවේදී මේ වචන කීසේක. උන්වහන්සේගේ වේලාව ඒතාක් නොපැමිණි බැවින් කිසිවෙක් උන්වහන්සේ ඇල්ලුවේ නැත.

²¹එබැවින් උන්වහන්සේ නැවත ඔවුන්ට කථාකොට මම අහක්ව යමි, ඔබ සැම මා සොයනවා ඇත, නුමුත් ඔබ සැමගේ පාපයෙහි ඔබ සැම මැරෙනවා ඇත. මා යන ස්ථානයට ඔබ සැමට එන්ට නුපුළුවනැයි කීසේක.

²²එබැවින් යුදෙව්වරු: මා යන ස්ථානයට ඔබ සැමට එන්ට නුපුළුවනැයි මොහු කියන්නේ තමා නසාගන්ට යනවාදැයි කීවෝය.

²³උන්වහන්සේද: ඔබ සැම පහළින් වන්නහුය; මම ඉහළින් වෙමි. ඔබ සැම මේ ලෝකයෙන් වන්නහුය; මම මේ ලෝකයෙන් නොවෙමි.

²⁴එහෙයින්, ඔබ සැමගේ පාපවල ඔබ සැම මැරෙනවා ඇතැයි ඔබ සැමට කීයෙමි. මක්නිසාද ඒ මමයයි ඔබ සැම විශ්වාසකළොත් මිස නැත්නම් ඔබ සැමගේ පාපවල ඔබ සැම මැරෙන්නහුයයි කීසේක.

²⁵එබැවින් ඔව්හු උන්වහන්සේට කථාකොට: ඔබ කවුදැයි උන්වහන්සේගෙන් ඇසුවෝය. යේසුස්වහන්සේ: මුල පටන් මා විසින් ඔබ සැමට කථාකළ එකමය.

²⁶ඔබ සැම ගැන කථාකරන්ටත් විනිශ්චයකරන්ටත් බොහෝ කාරණා මට ඇත්තේය. එසේ වුවත් මා එවූ තැනන්වහන්සේ සත්‍යවාදි කෙනෙක්ය; උන්වහන්සේගෙන් ඇසූ දේම මම ලෝකයාට කියමියි කීසේක.

²⁷උන්වහන්සේ පියාණන්වහන්සේ ගැන ඔවුන්ට කථා කළ බව ඔවුන්ට තේරුණේ නැත.

²⁸එබැවින් යේසුස්වහන්සේ ඔවුන්ට කියනසේක්: ඔබ සැම මනුෂ්‍ය පුත්‍රයා එසවූ කල, මා ඔහුම බවත් මාගේම කැමැත්තෙන් මා කිසිවක් නොකර මාගේ පියාණන්වහන්සේ මට ඉගැන්වූ ලෙස මේ දේවල් කියන බවත් ඔබ සැම දැනගන්නවා ඇත.

²⁹මා එවූ තැනන්වහන්සේ මා සමඟ සිටිනසේක; උන්වහන්සේ මා තනියම සිටින්ට නෑරියසේක; මක්නිසාද උන්වහන්සේට ප්‍රසන්නවූ දේවල් මම නිතරම කරමියි කීසේක.

³⁰උන්වහන්සේ මේ කාරණා කියද්දී බොහෝ දෙනෙක් උන්වහන්සේ කෙරෙහි අදහාගත්තෝය.

³¹එබැවින් යේසුස්වහන්සේ තමන්ව අදහාගත් යුදෙව්වරුන්ට කියනසේක්: ඔබ සැම මාගේ වචනයෙහි පවතිනවා නම්, සැබෑවට ඔබ සැම මාගේ ගෝලයෝය;

³²ඔබ සැම සැබෑව දැනගන්නවා ඇත, සැබෑවද ඔබ සැම නිදහස්කරන්නේයයි කීසේක.

³³ඔව්හු උන්වහන්සේට උත්තරදෙමින්: අපි ආබ්‍රහම්ගේ වංශයය, කිසි කලක අපි කිසිවෙකුට වහල් නූණෙමුව. ඔබ සැම නිදහස්වන්නහුයයි ඔබ කියන්නේ කොහොමදැයි කීවෝය.

³⁴යේසුස්වහන්සේ ඔවුන්ට උත්තරදෙමින්: සැබවක් සැබවක් ඔබ සැමට කියමි-පව්කරන සියල්ලෝම පාපයාගේ වහල්ලුය.

³⁵වාලා නිතරම ගෙදර නැවතී නොසිටියි. පුත්‍රයා නිතරම නැවතී සිටියි.

³⁶එහෙයින් පුත්‍රයා ඔබ සැම නිදහස්කරන්නේ නම් සැබැවින් ඔබ සැම නිදහස්වන්නහුය.

³⁷ඔබ සැම ආබ්‍රහම්ගේ වංශය බව දනිමි; එහෙත් ඔබ සැම තුළ නිදහස්ලෙස ක්‍රියාකරන්ට මාගේ වචනයට ඉඩ නැති බැවින්, මා මරන්ට සොයහුය.

³⁸මාගේ පියාණන්වහන්සේ ළඟදී දුටු දේ මම කියමි. එසේම ඔබ සැමත් ඔබ සැමගේ පියාගෙන් ඇසූ දේ කරහුයයි කීසේක.

³⁹ඔව්හු උත්තරදෙමින්: අපගේ පියාණෝ ආබ්‍රහම්යයි උන්වහන්සේට කීවෝය. යේසුස්වහන්සේ ඔවුන්ට කියනසේක්: ඔබ සැම ආබ්‍රහම්ගේ දරුවෝ නම් ආබ්‍රහම්ගේ ක්‍රියා කරන්නහුය.

⁴⁰නුමුත් දෙවියන්වහන්සේගෙන් ඇසූ සැබෑව ඔබ සැමට කීවාවූ මනුෂ්‍යයෙක් වන මා මරන්ට දැන් ඔබ සැම සොයහුය. ආබ්‍රහම් එසේ නොකළේය.

⁴¹ඔබ සැම ඔබ සැමගේ පියාගේ ක්‍රියා කරහුයයි කීසේක. එවිට ඔව්හු: අපි වේශ්‍යාකමින් උපන්නෝ නොවෙමුව; අපට ඇත්තේ එකම පියාණෝය, ඒ දෙවියන්වහන්සේයයි කීවෝය.

⁴²යේසුස්වහන්සේ ඔවුන්ට කියනසේක්: දෙවියන්වහන්සේ ඔබ සැමගේ පියාණෝ නම් ඔබ සැම මට ප්‍රේමකරන්නහුය. මක්නිසාද මම දෙවියන්වහන්සේ කෙරෙන් නික්ම ඇවිත් සිටිමි; මාගේම කැමැත්තෙන් මා ආවා නොව උන්වහන්සේ මා එවුසේක.

⁴³මාගේ කථාව ඔබ සැමට නොතේරෙන්නේ මක්නිසාද? මාගේ වචනය ඔබ සැමට අසන්ට බැරි නිසාමය.

⁴⁴ඔබ සැම ඔබ සැමගේ පියවූ යක්ෂයාගෙන්ය, ඔබ සැම ඔබ සැමගේ පියාගේ තෘෂ්ණාවන් ඉෂ්ටකරන්ට කැමතිය. ඔහු පටන්ගැන්මේ සිට මිනීමරන්නෙක්ය, ඔහු තුළ සැබෑකම නැති හෙයින් ඔහු සැබෑවෙහි නොපැවතුණේය. ඔහු බොරුවක් කියන කල තමාගේම දේ කියයි. මක්නිසාද ඔහු බොරුකාරයෙක්ය, බොරුවේ පියාය.

⁴⁵මා ඔබ සැමට සැබෑව කියන හෙයින් ඔබ සැම මා අදහාගන්නේ නැත.

⁴⁶මට පාපය ඇතැයි ඔබ සැමගෙන් කවරෙක් ඔප්පුකෙරේද? මම සැබෑව කියම් නම් ඔබ සැම මා අදහා නොගන්නේ මක්නිසාද?

⁴⁷දෙවියන්වහන්සේගෙන් වූ තැනැත්තේ දෙවියන්වහන්සේගේ වචන අසයි. ඔබ සැම දෙවියන්වහන්සේගෙන් නොවන බැවින් ඒවා අසන්නේ නැතැයි කීසේක.

⁴⁸යුදෙව්වරු උත්තරදෙමින්: ඔබ සමාරියයෙක්ය, ඔබට යක්ෂයෙක් ආවේශවෙලාය කියා අප කියනවා හරි නොවේදැයි උන්වහන්සේට කීවෝය.

⁴⁹යේසුස්වහන්සේ උත්තරදෙමින්: මට යක්ෂයෙක් ආවේශවෙලා නොව මම මාගේ පියාණන්වහන්සේට ගෞරවකරමි, ඔබ සැම මට අගෞරවකරහුය.

⁵⁰නුමුත් මම මාගේම ගෞරවය නොසොයමි. එය සොයන්නාවූ විනිශ්චයකරන්නාවූ කෙනෙක් සිටිනසේක.

⁵¹සැබවක් සැබවක් ඔබ සැමට කියමි-යමෙක් මාගේ වචනය රක්ෂාකරන්නේ නම් ඔහු කිසිකලක මරණය දකින්නේ නැතැයි කීසේක.

⁵²යුදෙව්වරු උන්වහන්සේට කථාකොට: ඔබට යක්ෂයෙක් ආවේශවී සිටින බව දැන් අපි දනිමුව. ආබ්‍රහම්ද අනාගතවක්තෘහුද මළෝය; යමෙක් මාගේ වචනය රක්ෂාකරන්නේ නම් ඔහු කිසිකලක මරණයේ රස නොවිඳින්නේමයයි ඔබ කියයි.

⁵³ඔබ අපගේ පියාවූ ආබ්‍රහම්ට වඩා උතුම් කෙනෙක්ද? ඔහු මළේය; අනාගතවක්තෘවරුද මළෝය. ඔබ කවරෙක කියා කියාගන්නෙහිදැයි කීවෝය.

⁵⁴යේසුස්වහන්සේ උත්තරදෙමින්: මම මටම ගෞරව කරම් නම් මාගේ ගෞරවය හිස්ය. මට ගෞරවකරන්නේ මාගේ පියාණන්වහන්සේය; උන්වහන්සේ ඔබ සැමගේ දෙවියන්වහන්සේයයි ඔබ සැම කියහුය; ඔබ සැම උන්වහන්සේ ඇඳිනගත්තේ නැත.

⁵⁵නුමුත් මම උන්වහන්සේ අඳුනමි; උන්වහන්සේ නාඳුනමියි කීවොත් මමත් ඔබ සැම හා සමාන බොරුකාරයෙක් වන්නෙමි. නුමුත් මම උන්වහන්සේ අඳුනමි; උන්වහන්සේගේ වචනයද රක්ෂාකරමි,

⁵⁶ඔබ සැමගේ පියවූ ආබ්‍රහම් මාගේ දවස දකින්ට ප්‍රීතියෙන් සිටියේය; ඔහු ඒ දැක සන්තෝෂවීයයි කීසේක.

⁵⁷එබැවින් යුදෙව්වරු: ඔබ තවම අවුරුදු පණහක් වයස නැතුව, ආබ්‍රහම් දුටුවෙහිදැයි උන්වහන්සේට කීවෝය.

⁵⁸යේසුස්වහන්සේ ඔවුන්ට කථාකොට: සැබවක් සැබවක් ඔබ සැමට කියමි- ආබ්‍රහම් උපදින්ට පළමුවෙන් මම සිටියිමි කීසේක.

⁵⁹එබැවින් ඔව්හු උන්වහන්සේට ගසන පිණිස ගල් අතට ගත්තෝය. නුමුත් යේසුස්වහන්සේ සැඟවී දේවමාළිගාවෙන් පිටවී ගියසේක.