Read Sinhala Revised Old Version 2 කොරින්ති 7 Bible Online

2 කොරින්ති 7 - Sinhala Revised Old Version bible

2 කොරින්ති 7

¹එබැවින්, ප්‍රේමවන්තයෙනි, මේ පොරොන්දු අපට තිබෙන නිසා, මාංසයේද ආත්මයේද සියලු කිලුටුකම්වලින් අපම පවිත්‍රකර ගනිමින්, දෙවියන්වහන්සේ කෙරෙහි භයින් යුක්තව, ශුද්ධකම සම්පූර්ණකරගනිමු.

²ඔබ සැමගේ සිත් අපට විවරකරන්න. අපි කිසිවෙකුට අයුත්තක් නොකළෙමුව, කිසිවෙකු නරක් නොකළෙමුව, කිසිවෙකුගෙන් වාසි නොගතිමුව.

³මා එසේ කියන්නේ ඔබ සැමට වරද තබන පිණිස නොවේ. මක්නිසාද ඔබ සැම එක්ව මැරෙන්ටත් එක්ව ජීවත්වෙන්ටත් ඔබ සැම අපේ සිත්වල දරමුයයි පළමුවෙන්ම කීවෙමි.

⁴ඔබ සැම කෙරෙහි තිබෙන මාගේ විශ්වාසය මහත්ය, ඔබ සැම ගැන මාගේ පාරට්ටුකිරීම මහත්ය. සැනසිල්ලෙන් පූර්ණව සිටිමි, අපේ සියලු දුක්වලදී ප්‍රීතියෙන් පිනමි.

⁵මක්නිසාද අප මකිදෝනියට ආ කල පවා අපේ මාංසයට කිසි පහසුවක් නැතුව හැම අතින්ම දුක්වින්දෙමුව; පිටතින් විරුද්ධකම්ද ඇතුළතින් භයද විය.

⁶නුමුත් යටහතුන් සනසන්නාවූ තැනන්වහන්සේ එනම් දෙවියන්වහන්සේ තීතස්ගේ ඊමෙන් අප සැනසූසේක;

⁷ඔහුගේ ඊමෙන් පමණක් නොව ඔබ සැම ගැන ඔහු ලැබූ සැනසිල්ලත් කරණකොටගෙනය; ඔබ සැමගේ මහත් ආශාවද ඔබ සැමගේ වැලපීමද මා උදෙසා ඔබ සැමගේ ජ්වලිතකමද ගැන ඔහු දැන්වූ කල, මම තව වඩා ප්‍රීතිවීමි.

⁸මෙසේ මම ඒ ලියුමෙන් ඔබ සැම ශෝකයට පැමිණෙවු නිසා කනගාටුවූ නුමුත්, දැන් කනගාටු නොවෙමි; කලකට පමණක් වුවත් ඒ ලියුම ඔබ සැම ශෝකයට පැමිණෙවු බව මට පෙනේ.

⁹ඔබ සැම ශෝකයට පමුණුවනු ලැබූ නිසා නොව පසුතැවිලිවීම සඳහා ඔබ සැම ශෝකයට පමුණුවනු ලැබූ බැවින් දැන් ප්‍රීතිවෙමි. එසේය, කොයි ප්‍රකාරයකින්වත් ඔබ සැම අපෙන් අලාභ නොවිඳින පිණිස දේවකැමැත්තේ හැටියට ඔබ සැම ශෝකවුණහුය.

¹⁰මක්නිසාද දේවකැමැත්තට එකඟවූ ශෝකයෙන්, තැවෙන්ට කාරණයක් නොවන්නාවූ ගැළවීමට පමුණුවන පසුතැවිලිවීම හටගන්නේය. නුමුත් ලෞකික ශෝකය මරණය උපදවන්නේය.

¹¹එසේය, මෙන්න, දේවකැමැත්තේ හැටියට ශෝකවීම යන කාරණයෙන් ඔබ සැම තුළ කොපමණ උනන්දුකමත් කොපමණ නිදොස්කරගැනීමත් කොපමණ අමනාපවීමත් කොපමණ භයත් කොපමණ ආශාවත් කොපමණ ජ්වලිතකමත් කොපමණ යුක්තිය සිදුකිරීමේ අදහසත් හටගත්තා නොවේද! මේ කාරණය සම්බන්ධව ඔබ සැම නිදොස් බව ඔබ සැම සියලු ආකාරයෙන්ම ඔප්පුකළහුය.

¹²ඉතින් මා ඔබ සැමට ලියා එවූ නුමුත් එසේ ලියුවේ අයුතුකම කළ අය නිසාවත් අයුතුකම වින්ද අය නිසාවත් නොව, අප ගැන ඔබ සැමගේ ඇති මහත් සැලකිල්ල දෙවියන්වහන්සේ ඉදිරියෙහි ඔබ සැමටම ප්‍රකාශවන පිණිසය.

¹³එහෙයින් අපි සැනසීම ලබා සිටිමුව. නුමුත් අපේ සැනසිල්ලේදී අප වඩාම ප්‍රීතිවුණේ තීතස්ගේ ප්‍රීතිය නිසාය, මක්නිසාද ඔහුගේ ආත්මයට ඔබ සැම සියල්ලන්ගෙන් පහසුව ලැබී තිබේ.

¹⁴එසේය, මම ඔබ සැම ගැන පාරට්ටුකර ඔහුට යමක් කීවෙම් නම්, මම ලජ්ජාවට පමුණුවනු නොලැබුවෙමි; එහෙත් අප ඔබ සැමට සැබෑකමින් සියල්ල කී හැටියටම තීතස් ඉදිරියෙහි අප විසින් ඔබ සැම ගැන කළ පාරට්ටුවත් සැබෑවුණේය.

¹⁵තවද ඔබ සැම සියල්ලන්ගේ කීකරුකම, එනම් භයත් වෙවුලුමත් ඇතුව ඔහුව පිළිගත් හැටි ඔහු සිහිකරන කල, ඔහුගේ මෘදු ප්‍රේමය ඔබ සැම කෙරෙහි වඩාත් අධිකවන්නේය.

¹⁶සියලු කාරණාවලදී මම ඔබ සැම ගැන නිසැකව සිටින බැවින් ප්‍රීතිවෙමි.