Read Sinhala Revised Old Version 2 කොරින්ති 9 Bible Online

2 කොරින්ති 9 - Sinhala Revised Old Version bible

2 කොරින්ති 9

¹ශුද්ධවන්තයන්ට උපස්ථානකිරීම ගැන මා විසින් ඔබ සැමට ලිවීම ඕනෑ නැත.

²මක්නිසාද ඔබ සැමගේ මනාපකම දනිමි, අකාය ගිය අවුරුද්දේ පටන්ම සූදානම්ව සිටියායයි මකිදෝනිවරුන්ට ඔබ සැම ගැන පාරට්ටුකරමි; ඔබ සැමගේ ජ්වලිතකමින් ඔවුන්ගෙන් බොහෝ දෙනෙක් පොලඹවනු ලැබුවෝය.

³එසේවී නුමුත් මේ ගැන ඔබ සැම උදෙසා අපේ පාරට්ටුව හිස් නොවන පිණිසද මා කී හැටියට ඔබ සැම සූදානම්ව සිටින පිණිසද සහෝදරයන් එවීමි.

⁴නැත්නම් යම් විධියකින් මකිදෝනිවරු මා සමඟ එන්ට යෙදී ඔබ සැම සූදානම් නැති බව දුටුවොත්, ඔබ සැම කොහොම නුමුත් අපි නම් මේ විශ්වාසය නිසා ලජ්ජාවට පැමිණෙන්නෙමුව.

⁵එබැවින් කලින් පොරොන්දු වුණාවූ ඔබ සැමගේ දීමනාව බලාත්කාරයෙන් ගැනීමක් මෙන් නොව ත්‍යාගවත් දීමනාවක්ව තිබෙන පිණිස කලින් ඔබ සැම වෙතට ඇවිත් එය පිළියෙළ කරන ලෙස ඒ සහෝදරයන්ගෙන් ඉල්ලන්ට යුතුයයි සිතුවෙමි.

⁶නුමුත් මේක කියමි: මසුරුලෙස වපුරන්නා මසුරුලෙස කපාගන්නේය; නොමසුරුව වපුරන්නා නොමසුරුව කපාගන්නේය.

⁷කනගාටුවෙන්වත් ඕනෑම නිසාවත් නොව එක් එක්කෙනා තම තමාගේ සිතින් නියමකරගත් ලෙස දේවා. මක්නිසාද සතුටු සිතින් දෙන්නාට දෙවියන්වහන්සේ ප්‍රේමකරනසේක.

⁸තවද ඔබ සැම සියලු දේවලදී නිතරම පූර්ණකම ලැබ සියලු යහපත් ක්‍රියා සඳහා පූර්ණව සිටින පිණිස ඔබ සැමට සියලු අනුග්‍රහය වැඩිකරදෙන්ට දෙවියන්වහන්සේට පුළුවන.

⁹ඒ හැටියට- ඔහු විසිරෙවුවේය, දිළිඳුන්ට දුන්නේය; ඔහුගේ ධර්මිෂ්ඨකම සදාකල් පවතින්නේයයි ලියා තිබේ.

¹⁰ඉතින් වපුරන්නාට බීජද කෑමට රොටිද සපයාදෙන්නාවූ තැනන්වහන්සේ ඔබ සැමට වැපිරීම පිණිස බීජ සපයාදී, වැඩිකොට, ඔබ සැමගේ ධර්මිෂ්ඨකමේ ඵල වර්ධනයකරනසේක.

¹¹මෙසේ ඔබ සැම සියලු ත්‍යාගවන්තකමට සියලු ආකාරයෙන් පොහොසත් වන්නහුය, එය අප කරණකොටගෙන දෙවියන්වහන්සේට ස්තුති උපදවන්නේය.

¹²මක්නිසාද මේ උපස්ථානකිරීමේ සේවයෙන් ශුද්ධවන්තයන්ගේ හිඟකම පිරිමැසෙනවා පමණක් නොව දෙවියන්වහන්සේට බොහෝ ස්තුතිදීම්ද උපදින්නේය.

¹³මේ උපස්ථානයෙන් ඔබ සැම සෝදිසිකිරීම කරණකොටගෙන ඔව්හු ක්‍රිස්තුස්වහන්සේගේ ශුභාරංචිය ඔබ සැම විසින් පිළිගැනීමේ කීකරුකමද, ඔවුන් සහ සියල්ලන් කෙරෙහි ඔබ සැමගේ සම්මාදමේ ත්‍යාගවන්තකමද නිසා දෙවියන්වහන්සේට ප්‍රශංසාකරනවාත් හැර,

¹⁴ඔබ සැම උදෙසා කන්නලව්කරමින්, ඔබ සැම කෙරෙහි ඇත්තාවූ දෙවියන්වහන්සේගේ ඉතා මහත් අනුග්‍රහය නිසා තුමූම ඔබ සැම කෙරෙහි ඉතා ඇලුම්වෙති.

¹⁵දෙවියන්වහන්සේගේ කියා නිමකළ නොහැකි දීමනාව ගැන උන්වහන්සේට ස්තුතිවේවා.