Read Sinhala Revised Old Version කොලොස්සි 4 Bible Online

කොලොස්සි 4 - Sinhala Revised Old Version bible

කොලොස්සි 4

¹ස්වාමිවරුනි, ස්වර්ගයෙහි ඔබ සැමටත් ස්වාමි කෙනෙක් සිටින බව දැන, ඔබ සැමගේ දාසයන්ට ධර්මිෂ්ඨවූ සාධාරණවූ දේ දෙන්න.

²ස්තුතිදීමෙන් යුක්තව යාච්ඤාවෙහි අවදිව සිට, නොකඩව එහි පැවතෙන්න;

³තවද මා විසින් කථාකළයුතුව තිබෙන අන්දමට ක්‍රිස්තුස්වහන්සේගේ රහස එළිදරව්කරන පිණිස,

⁴එය කියාදීමට දෙවියන්වහන්සේ අපට වචනයේ දොරක් අරින ලෙස අප උදෙසාත් යාච්ඤාකරන්න. ඒ රහස නිසා මම බැඳුම් ලැබ සිටි.

⁵ඔබ සැම ප්‍රස්තාව[3] අල්ලාගනිමින්, පිටත සිටින්නන් කෙරෙහි ප්‍රඥාවෙන් ක්‍රියාකරන්න.

⁶ඔබ සැම එකිනෙකාට උත්තරදිය යුතු කෙසේදැයි දැනගන්නා පිණිස, ඔබ සැමගේ කථාව නිතරම ලුණෙන් රසවත්ව, අනුග්‍රහයෙන් යුක්තව තිබේවා.

⁷ස්වාමීන්වහන්සේ තුළ ප්‍රේමවන්ත සහෝදරයාද විශ්වාස සේවකයාද හවුල් දාසයාද වූ තුඛීකස් මාගේ සියලු කාරණා ඔබ සැමට දන්වනවා ඇත.

⁸ඒ පිණිසම එනම් ඔබ සැම අපේ කාරණා දැනගන්න පිණිසත්, ඔහු ඔබ සැමගේ සිත් සනසන පිණිසත්,

⁹ඔබ සැමගෙන් එක්කෙනෙක් වන විශ්වාස ප්‍රේමවන්ත සහෝදරයාවූ ඔනේසිමස් සමඟ ඔහු ඔබ සැම ළඟට එවමි. මෙහි සියලු කාරණා ඔවුන් ඔබ සැමට දන්වනවා ඇත.

¹⁰මාගේ හවුල් හිරකාරයාවූ අරිස්තාර්කස්ද බාර්ණබස්ගේ ඥාති සහෝදරයෙක්වූ මාර්ක්ද යුස්තස් කියන යේසුස්ද ඔබ සැමට ආචාරකරති. මාර්ක් ගැන ඔබ සැම අණ ලැබුවහුය. ඔහු ඔබ සැම වෙතට ආවොත් පිළිගන්න.

¹¹චර්මඡේදිතයන්ගෙන් මොව්හු පමණක් මට සැනසිල්ලක් වූවෝය, මොව්හු දෙවියන්වහන්සේගේ රාජ්‍යය උදෙසා මාගේ හවුල් සේවකයෝවද සිටිති.

¹²ඔබ සැමගෙන් එක්කෙනෙක්වූ, ක්‍රිස්තුස් යේසුස්වහන්සේගේ දාසෙයක්වූ එපප්‍රස් ඔබ සැමට ආචාරකරන්නේය; ඔබ සැම දෙවියන්වහන්සේගේ මුළු කැමැත්තෙහි සම්පූර්ණව නිසැකව සිටින පිණිස ඔහු යාච්ඤාවලින් ඔබ සැම ගැන නිතරම වීර්යකරන්නේය.

¹³මක්නිසාද ඔබ සැම උදෙසාත් ලවොදිකයෙහිද හියරපොලිසෙහිද සිටින්නන් උදෙසාත් ඔහු බොහෝ වෙහෙසෙන බවට මම සාක්ෂිදරමි.

¹⁴ලූක් නම් ප්‍රේමවන්ත වෛද්‍යාචාරි තැනද දේමස්ද ඔබ සැමට ආචාරකරති.

¹⁵ලවොදිකයෙහි සිටින සහෝදරයන්ටත් නිම්පස්ටත් ඔවුන්ගේ ගෙදර තිබෙන සභාවටත් ආචාරකරන්න.

¹⁶මේ ලියුම ඔබ සැම අතරෙහි කියෙවු පසු, මේක ලවොදිකයන්ගේ සභාවෙහිද කියවනු ලබන්ට සලස්වන්න; ලවොදිකයෙන් ලැබෙන ලියුම ඔබ සැමත් කියවන්ට බලාගන්න.

¹⁷ස්වාමීන්වහන්සේ තුළ ඔබ ලැබූ සේවය සම්පූර්ණකරන පිණිස ඒ ගැන බලාගන්නැයි අර්කිපස්ට කියන්න.

¹⁸පාවුල් නම්වූ මාගේම අතින් ලියන ආචාරයය. මාගේ බැඳුම් සිහිකරන්න. අනුග්‍රහය ඔබ සැම සමඟ වේවා.