Read Sinhala Revised Old Version 1 තෙසලෝනික 1 Bible Online

1 තෙසලෝනික 1 - Sinhala Revised Old Version bible

1 තෙසලෝනික 1

¹පාවුල්ද සිල්වානස්ද තිමෝතියස්ද යන අප විසින් පියවූ දෙවියන්වහන්සේ සහ ස්වාමිවූ යේසුස් ක්‍රිස්තුස්වහන්සේ තුළ තිබෙන තෙසලෝනිකවරුන්ගේ සභාවට ලියා එවන වගනම්: ඔබ සැමට අනුග්‍රහයත් සමාදානයත් වේවා.

²අපගේ පියවූ දෙවියන්වහන්සේ ඉදිරියෙහි ඔබ සැමගේ ඇදහිල්ලේ ක්‍රියාවද ප්‍රේමයේ වීර්යයද අපේ ස්වාමිවූ යේසුස් ක්‍රිස්තුස්වහන්සේ තුළ තිබෙන බලාපොරොත්තුවේ ඉවසීමද අපි නොකඩව සිහිකරමින්,

³අපේ යාච්ඤාවලදී ඔබ සැම ගැන මතක්කරමින්, ඔබ සැම සියල්ලන් ගැන සෑමවේලේම දෙවියන්වහන්සේට ස්තුතිකරමුව.

⁴එසේය, දෙවියන්වහන්සේ ප්‍රේමකරන්නාවූ සහෝදරයෙනි, උන්වහන්සේ ඔබ සැම තෝරාගත් බව අපි දනිමුව.

⁵මක්නිසාද අපේ ශුභාරංචිය ඔබ සැම වෙතට පැමුණුණේ වචනයෙන් පමණක් නොව බලයත් ශුද්ධාත්මයත් බොහෝ නිසැකකමත් ඇතුවය. එසේය, ඔබ සැම නිසා අපි ඔබ සැම අතරෙහි කොයි ආකාර අය වීමුදැයි ඔබ සැම දන්නහුය.

⁶ඔබ සැමද බොහෝ පීඩාවෙන් යුක්තව ශුද්ධාත්මයාණන්ගේ ප්‍රීතියෙන් වචනය පිළිගැනීමෙන් අපද ස්වාමීන්වහන්සේද අනුවයන්නෝ වූහ.

⁷මෙසේ ඔබ සැම මකිදෝනියෙහි සහ අකායෙහි සිටින සියලු ඇදහිලිවන්තයන්ට ආදර්ශවුණහුය.

⁸මක්නිසාද ඔබ සැම වෙතින් ස්වාමීන්වහන්සේගේ වචනයේ හඬ මකිදෝනියෙහිත් අකායෙහිත් පැතිර ගියා පමණක් නොව අප විසින් කිසිවක් කියන්ට ඕනෑ නොකරන හැටියට දෙවියන්වහන්සේ කෙරෙහි තිබෙන ඔබ සැමගේ ඇදහිල්ල සෑම තැනම ප්‍රකාශවිය.

⁹එසේ ඔබ සැම වෙතට අපේ පැමිණීම කොයි ආකාරව තිබුණේද කියාත් ඔබ සැම ජීවමානවූ සැබෑවූ දෙවියන්වහන්සේට මෙහෙකරන පිණිසද, උන්වහන්සේ විසින් මළවුන්ගෙන් නැගුටුවනලද්දාවූ,

¹⁰පැමිණෙන උදහසින් අප ගළවන්නාවූ තමන්ගේ පුත්‍රවූ යේසුස්වහන්සේ ස්වර්ගයෙන් එනවා බලාසිටින පිණිසද, ඔබ සැම දේවතාරූප කෙරෙන් දෙවියන්වහන්සේ වෙතට හැරුණ හැටිත් ඔව්හුම දන්වති.