Read Sinhala Revised Old Version පිලෙමොන් 1 Bible Online

පිලෙමොන් 1 - Sinhala Revised Old Version bible

පිලෙමොන් 1

¹ක්‍රිස්තුස් යේසුස්වහන්සේගේ හිරකාරයෙක් වන පාවුල්ද සහෝදරවූ තිමෝතියස්ද යන අප විසින් අපේ ප්‍රේමවන්තවූ හවුල් සේවකයෙක්වූ පිලෙමොන්ටද,

²අපේ සහෝදරීවූ අපියාටද අපේ හවුල් හේවායෙක්වූ අර්කිපස්ටද ඔබේ ගෙදර තිබෙන සභාවටද ලියා එවන වග නම්:

³අපේ පියවූ දෙවියන්වහන්සේගෙන්ද ස්වාමිවූ යේසුස් ක්‍රිස්තුස්වහන්සේගෙන්ද කරුණාවත් සමාදානයත් ඔබ සැමට වේවා.

⁴ස්වාමිවූ යේසුස්වහන්සේ කෙරෙහිද සියලු ශුද්ධවන්තයන් කෙරෙහිද තිබෙන ඔබේ ප්‍රේමයත් ඇදහිල්ලත් ගැන මම අසා,

⁵ඔබ තුළ පවතින සියලු යහපත් දේ ගැන දැනගැනීමෙන් ඔබේ ඇදහිල්ලේ හවුල්කාරකම ක්‍රිස්තුස්වහන්සේ උදෙසා බලවත්වන පිණිස,

⁶මාගේ යාච්ඤාවලදී ඔබ ගැන මතක්කරමින් නිතරම මාගේ දෙවියන්වහන්සේට ස්තුතිකරමි.

⁷මක්නිසාද සහෝදරය, ඔබ කරණකොටගෙන ශුද්ධවන්තයන්ගේ සිත් ප්‍රාණවත්කරනු ලබන බැවින් ඔබේ ප්‍රේමය නිසා බොහෝ සන්තෝෂයද සැනසිල්ලද මට ලැබුණේය.

⁸ඒ නිසා සුදුසුව තිබෙන දෙය ඔබට ආඥාකරන්ට ක්‍රිස්තුස්වහන්සේ තුළ මට බොහෝ නිසැකකම තිබෙන නුමුත්,

⁹එසේ නොකර, මහලුව, දැනට ක්‍රිස්තුස් යේසුස්වහන්සේගේ හිරකාරයෙක්ව සිටින පාවුල් නම් මම, ප්‍රේමය නිසා ඉල්ලා සිටිමි.

¹⁰එසේ මා ඔබෙන් උදක්ම ඉල්ලන්නේ මා බැඳුම්වල සිටියදී ජාතකකළ මාගේ දරුවෙක්වූ ඔනේසිමස් ගැනය.

¹¹ඔහු වරක් ඔබට නිෂ්ප්‍රයෝජනව සිටිය නුමුත් දැන් ඔබටත් මටත් ප්‍රයෝජනව සිටියි.

¹²මාගේම සිත වැනිවූ ඔහු ඔබ වෙත නැවත එවීමි.

¹³ශුභාරංචිය නිසාවූ බැඳුම්වලදී ඔහු ඔබ වෙනුවෙන් මට උපස්ථාන කරන පිණිස මා වෙත සිටුවාගන්ට කැමතිව සිටියෙමි.

¹⁴නුමුත් ඔබේ යහපත්කම බලයෙන් වාගේ නොව නිදහස් කැමැත්තෙන් වන පිණිස, ඔබේ කැමැත්ත නැතුව කිසිත් කරන්ට සතුටුනූණෙමි.

¹⁵මක්නිසාද සමහරවිට ඔහු කලකට ඔබෙන් වෙන්වුණේ, මෙතැන් පටන් දාසයෙකු කොට නොව දාසයෙකුට වඩා ප්‍රේමවන්ත සහෝදරයෙකු කොට සදාකාලේටම ඔහු ඔබට ලැබෙන පිණිස වෙන්ට පුළුවන.

¹⁶විශේෂ ලෙස මට ප්‍රේමවන්ත සහෝදරයෙක්වූ ඔහු කොපමණ වැඩියෙන් මාංසාකාරයෙන් සහ ස්වාමීන්වහන්සේ තුළ ඔබටත් එසේ නොවන්නේද.

¹⁷ඉඳින් ඔබ මා පංගුකාරයෙකු කොට සිතනවා නම්, මා වාගේ ඔහු පිළිගන්න.

¹⁸ඔහු ඔබට අයුත්තක් කළා නම්, නොහොත් ඔබට ණයව සිටිනවා නම්, ඒක මාගේ ගණනට තබන්න.

¹⁹පාවුල් නම් මම මාගේම අතින් මේක ලියමි: මම ඒක ගෙවන්නෙමි. [මෙසේ කියන්නේ] ඔබම මට ණයක්ව සිටින බව ඔබට නොකියන පිණිසය.

²⁰එසේය, සහෝදරය, ස්වාමීන්වහන්සේ තුළ ඔබෙන් මට ප්‍රීතිය[1] ලැබේවා. ක්‍රිස්තුස්වහන්සේ තුළ මාගේ සිත ප්‍රාණවත්කරන්න.

²¹මා ඔබට ලියා එවන්නේ මා කියනවාටත් වඩා ඔබ කරන බව මා දැන, ඔබේ කීකරුකම විශ්වාසකරගනය.

²²ඒ ඇර මට නවාතැනක් සූදානම් කරන්න. මක්නිසාද ඔබ සැමගේ යාච්ඤා කරණකොටගෙන මා ඔබ සැමට දෙනු ලැබේයයි බලාපොරොත්තුවෙමි.

²³ක්‍රිස්තුස් යේසුස්වහන්සේ තුළ මාගේ හවුල් හිරකාරයාවූ එපප්‍රස්ද

²⁴මාගේ හවුල් සේවකයන් වන මාර්ක්ද අරිස්තාර්කිස්ද දේමස්ද ලූක්ද ඔබට ආචාර කරති.

²⁵අපගේ ස්වාමිවූ යේසුස් ක්‍රිස්තුස්වහන්සේගේ කරුණාව ඔබ සැමගේ ආත්ම සමඟ වේවා. ආමෙන්.