Read Sinhala Revised Old Version එළිදරව් 3 Bible Online

එළිදරව් 3 - Sinhala Revised Old Version bible

එළිදරව් 3

¹තවද සර්දිස්හි සභාවේ දූතයාට මෙසේ ලියන්න: දෙවියන්වහන්සේගේ ආත්මයාණන් සත්දෙනාද තාරකා සතද ඇත්තාවූ තැනන්වහන්සේ මේ කාරණා කියනසේක. එනම්, ඔබේ ක්‍රියා දනිමි, ඔබ ජීවත්ව සිටින බවට නාමයක් ඇතුව සිටින නුමුත් ඔබ මැරිලාය.

²අවදිව සිට, ඉතිරිවූ, නැසීයාමට ළංවූ දේ ස්ථිරකරන්න. මක්නිසාද මාගේ දෙවියන්වහන්සේ ඉදිරියෙහි ඔබේ කිසි ක්‍රියාවක් සම්පූර්ණ බව මට සම්බවුණේ නැත.

³එබැවින් ඔබ ලැබුවේ කෙසේද, ඇසුවේ කෙසේදැයි සිහිකර, ඒ දේ පවත්වා, පසුතැවිලිවෙන්න. මෙසේ ඔබ අවදිව නොසිටිනෙහි නම්, සොරෙකු මෙන් එන්නෙමි, මා ඔබ කරා කොයි පැයේ එනවා ඇද්ද කියා ඔබ නොදැනම සිටිනවා ඇත.

⁴එහෙත් තමුන්ගේ වස්ත්‍ර කිලුටුකර නොගත් ස්වල්ප දෙනෙක් සර්දිස්හි ඔබට සිටිති. ඔවුන් වටින්නන් නිසා සුදු ඇඳුමෙන් මා සමඟ ඇවිදිනවා ඇත.

⁵ජයගන්නා නම් මෙසේ සුදු වස්ත්‍රයෙන් පළඳවනු ලැබේ; ඔහුගේ නම ජීවන-පොතෙන් කිසිසේත් මකා නොහැර, මාගේ පියාණන්වහන්සේද උන්වහන්සේගේ දූතයන්ද ඉදිරියෙහි ඔහුගේ නාමය පිළිගන්නෙමි.

⁶ආත්මයාණන්වහන්සේ සභාවලට කියන දේ කන් ඇත්තේ අසාවා.

⁷තවද පිලෙදල්පියාවෙහි සභාවේ දූතයාට මෙසේ ලියන්න: ශුද්ධවූ, සැබෑවූ, දාවිත්ගේ යතුර ඇත්තාවූ, කිසිවෙක් නොපියන ලෙස අරින්නාවූ, කිසිවෙක් නාරින ලෙස පියන්නාවූ තැනන්-වහන්සේ මේ කාරණා කියනසේක.

⁸එනම්: මම ඔබේ ක්‍රියා දනිමි, (මෙන්න, කිසිවෙකුට පියන්ට බැරිවූ ඇරපු දොරක් ඔබ ඉදිරියෙහි මා විසින් තබා තිබේ.) ඔබට ඇත්තේ ස්වල්ප බලයක්ය. ඔබ මාගේ වචන රක්ෂාකෙළෙහිය, මාගේ නාමය ඔබ එපාකළේ නැත.

⁹බලව, යුදෙව්වරුව නොසිට තුමූ යුදෙව්වරුයයි බොරුවෙන් කියන්නාවූ, සාතන්ගේ සිනගෝගයේවූ අය ඇවිත් ඔබේ පාද ඉදිරියෙහි වැඳවැටෙන්ටත් මම ඔබට ප්‍රේමකළ බව දැනගන්ටත් සලස්වන්නෙමි.

¹⁰මාගේ ඉවසීමේ වචනය ඔබ රක්ෂාකළ හෙයින් පොළොවේ වසන්නන් පරීක්ෂාකිරීමට මුළු ලෝකය පිටට පැමිණෙන්ට තිබෙන්නාවූ පරීක්ෂාවේ පැයෙන් මමත් ඔබ ආරක්ෂාකරන්නෙමි.

¹¹ඉක්මනින් එමි. කිසිවෙක් ඔබේ ඔටුන්න නොගන්නා ලෙස ඔබට තිබෙන දේ තදින් අල්ලාගන්න.

¹²ජයගන්නා මාගේ දෙවියන්වහන්සේගේ මාළිගාවෙහි කණුවක් කරන්නෙමි, ඔහු තවත් එතැනින් පිටතට නොයන්නේය මාගේ දෙවියන්වහන්සේගේ නාමයද මාගේ දෙවියන්වහන්සේ කෙරෙන් ස්වර්ගයෙන් බසින අලුත් යෙරුසලම වන මාගේ දෙවියන්වහන්සේගේ නුවරේ නාමයද මාගේම අලුත් නාමයද ඔහු පිට ලියන්නෙමි.

¹³ආත්මයාණන්වහන්සේ සභාවට කියන දේ කන් ඇත්තේ අසාවා.

¹⁴තවද ලවොදිකයෙහි සභාවේ දූතයාට මෙසේ ලියන්න: ආමෙන් නමැත්තාවූ, විශ්වාස සැබෑ සාක්ෂිකාරවූ, දෙවියන්වහන්සේගේ මැවිල්ලේ මුලවූ තැනන්වහන්සේ මේ කාරණා කියනසේක.

¹⁵එනම්, මම ඔබේ ක්‍රියා දනිමි, ඔබ ශීතලව හෝ උෂ්ණව හෝ නොසිටින බවද දනිමි. ඔබ ශීතලව හෝ උෂ්ණව හෝ සිටිනවාට කැමැත්තෙමි.

¹⁶ඔබ උෂ්ණව හෝ ශීතලව හෝ නොසිටි ඇල්මැරී සිටින බැවින් මාගේ මුඛයෙන් ඔබ වමාරන්නෙමි.

¹⁷කාලකණ්ණියාද දුක්ඛිතයාද දිළින්දාද අන්ධයාද නග්නව සිටින්නාද ඔබම බව ඔබ නොදැන: මම ධනවත්ය, මට ධනය ඇත්තේය, කිසි දෙයකින් හිඟයක් නැතැයි ඔබ කියන බැවින්,

¹⁸ඔබ ධනවත්වන පිණිස ගින්නෙන් පවිත්‍රකරනලද රන්ද, ඔබේ නග්නභාවයේ ලජ්ජාව ප්‍රකාශ නොවන පිණිස හැඳගන්ට සුදු වස්ත්‍රද, ඔබේ ඇස් පෙනෙන පිණිස ඇස්වල ගාගන්ට අඳුන්ද මාගෙන් ලබාගන්ට ඔබට අවවාදකරමි.

¹⁹මම ප්‍රේමකරන සියල්ලන්ට තරවටුකොට දඬුවම්කරමි. එබැවින් ඔබ ජ්වලිතව සිට පශ්චාත්තාපවෙන්න.

²⁰මෙන්න, මම දොර ළඟ සිට තට්ටුකරමි, යමෙක් මාගේ හඬ අසා දොර ඇරියොත්, ඔහු වෙතට ඇතුල්ව, ඔහු සමඟ කෑම කන්නෙමි, ඔහුද මා සමඟ කන්නේය.

²¹මම ජයගෙන මාගේ පියාණන්වහන්සේ සමඟ උන්වහන්සේගේ සිංහාසනයෙහි හිඳගත් සේම, ජයගන්නාටත් මාගේ සිංහාසනයෙහි මා සමඟ ඉඳගන්ට දෙන්නෙමි.

²²ආත්මයාණන්වහන්සේ සභාවලට කියන දේ කන් ඇත්තේ අසාවා.