Read Sinhala Revised Old Version 1 සාමුවෙල් 12 Bible Online

1 සාමුවෙල් 12 - Sinhala Revised Old Version bible

1 සාමුවෙල් 12

¹සාමුවෙල් සියලු ඉශ්‍රායෙල්වරුන්ට කථාකොට: මෙන්න, ඔබ සැම මට කී සියල්ල ගැන මම ඔබ සැමගේ හඬට ඇහුම්කන්දී ඔබ සැම කෙරෙහි රජෙකු පත්කෙළෙමි.

²දැන් රජ්ජුරුවෝ ඔබ සැම ඉදිරියෙහි හැසිරෙන්නෝය. මම නම් මහලුය, මාගේ හිසකෙස් පැහී තිබේ; මාගේ පුත්‍රයෝත් ඔබ සැම සමඟ සිටිති. මම බාල වයසේ පටන් අද දක්වා ඔබ සැම ඉදිරියෙහි හැසුරුණෙමි.

³මම මෙහිය. මම කාගේ හරකා ගතිම්ද? කාගේ කොටළුවා ගතිම්ද? කාට අයුක්තියක් කෙළෙම්ද? කාට බලාත්කාරකමක් කෙළෙම්ද? මාගේ ඇස් වසාගන්න පිණිස කාගෙන් අල්ලසක් ගතිම්දැයි ස්වාමීන්වහන්සේද උන්වහන්සේගේ අභිෂේකලත් තැනැත්තාද ඉදිරියෙහි මට විරුද්ධව සාක්ෂි දෙන්න, එවිට මම එය නැවත ඔබ සැමට දෙන්නෙමියි කීවේය.

⁴ඔව්හුද: ඔබ අපට අයුක්තියක් කළේවත් බලාත්කාරකමක් කළේවත් කිසිවෙකුගේ අතින් මොකවත් ගත්තේවත් නැතැයි කීවෝය.

⁵ඔහුද: ඔබ සැමට මා අත වරදක් සම්බනූණු බවට ස්වාමීන්වහන්සේද උන්වහන්සේගේ අභිෂේකලත් තැනැත්තේද අද දවසේ ඔබ සැමට විරුද්ධව සාක්ෂිකාරයෝ ව සිටිතියි ඔවුන්ට කීවේය. ඔව්හුද: උන්වහන්සේ සාක්ෂියයි කීවෝය.

⁶සාමුවෙල් සෙනඟට කථාකොට: මෝසෙස් සහ ආරොන් පත්කළෙත් මිසරයෙන් ඔබ සැමගේ පියවරුන් ගෙනාවෙත් ස්වාමීන්වහන්සේය.

⁷එබැවින් ඔබ සැමටත් ඔබ සැමගේ පියවරුන්ටත් ස්වාමීන්වහන්සේ කළාවූ සියලු ධර්මිෂ්ඨ ක්‍රියා ගැන මා විසින් ස්වාමීන්වහන්සේ ඉදිරියෙහි ඔබ සැමට මතක්කර දෙන පිණිස නිශ්චලව සිටින්න.

⁸යාකොබ් මිසරයට පැමිණියාට පසු ඔබ සැමගේ පියවරුන් ස්වාමීන්වහන්සේට මොරගැසූ විට ස්වාමීන්වහන්සේ මෝසෙස්ද ආරොන්ද යවා ඔබ සැමගේ පියවරුන් මිසරයෙන් ගෙන්වා මේ ස්ථානයෙහි වාසයකෙරෙවුසේක.

⁹එහෙත් ඔව්හු තමුන්ගේ දෙවිවූ ස්වාමීන්වහන්සේ මතකනැතිකළෝය, එවිට උන්වහන්සේ හාශොර්හි සේනාපතියාවූ සීසෙරා අතටත් පිලිස්තිවරුන් අතටත් මෝවබ්හි රජු අතටත් ඔවුන් පාවාදුන්සේක, ඔව්හුද ඔවුන්ට විරුද්ධව යුද්ධකළෝය;

¹⁰එවිට ඔව්හු ස්වාමීන්වහන්සේට මොරගසමින්: අපි ස්වාමීන්වහන්සේ අත්හැර බාල් දේවතාවන්ටත් අෂ්ටාරොත්ටත් සේවයකිරීමෙන් පව්කෙළෙමුව. එහෙත් දැන් අපේ සතුරන්ගේ අතින් අප ගැළවුව මැනව, අපි ඔබවහන්සේට සේවයකරන්නෙමුයයි කීවෝය.

¹¹ස්වාමීන්වහන්සේ යෙරුබ්බාල්ද බෙදාන්ද යෙප්තාද සාමුවෙල්ද එවා වටකර සිටි ඔබ සැමගේ සතුරන්ගේ අතින් ගැළවූසේක, එවිට ඔබ සැම සුරක්ෂිතව වාසයකළහුය.

¹²නුමුත් අම්මොන් පුත්‍රයන්ගේ රජවූ නාහාෂ් ඔබ සැමට විරුද්ධව එන බව ඔබ සැම දුටු කල, ඔබ සැමගේ දෙවිවූ ස්වාමීන්වහන්සේ ඔබ සැමගේ රජව සිටි නුමුත් ඔබ සැම-එසේ නොවේ, රජකෙනෙක් අප කෙරෙහි රජකම්කරන්ට ඕනෑයයි කීවහුය.

¹³ඉතින් ඔබ සැම තෝරාගත්තාවූ ඔබ සැම ඉල්ලුවාවූ රජ්ජුරුවන් බලන්න. ස්වාමීන්වහන්සේ ඔබ සැම කෙරෙහි රජ කෙනෙකු පත්කළසේක.

¹⁴ඔබ සැම ස්වාමීන්වහන්සේගේ අණට විරුද්ධව කැරළි නොගසා උන්වහන්සේට භයව උන්වහන්සේට සේවයකොට උන්වහන්සේගේ හඬට කීකරුව සිටිනවානම්, ඔබ සැමත් ඔබ සැම කෙරෙහි රජකම්කරන රජුත් ඔබ සැමගේ දෙවිවූ ස්වාමීන්වහන්සේ පස්සේ යනවානම්, යෙහෙකි.

¹⁵නුමුත් ඔබ සැම ස්වාමීන්වහන්සේගේ හඬට ඇහුම්කන් නොදී උන්වහන්සේගේ අණට විරුද්ධව කැරළි ගසන්නහුනම්, උන්වහන්සේගේ හස්තය ඔබ සැමගේ පියවරුන්ට විරුද්ධව තිබුණාක් මෙන් ඔබ සැමටත් විරුද්ධවන්නේය.

¹⁶එබැවින් දැන් නිශ්චලව සිට ස්වාමීන්වහන්සේ ඔබ සැමගේ ඇස් හමුවෙහි කරන්ට යන මේ මහත් දෙය බලන්න.

¹⁷දැන් තිරිඟු කපන කාලය නොවේද? අහස් ගර්ජනාවද වර්ෂාවද එවන ලෙස මම ස්වාමීන්වහන්සේට යාච්ඤා- කරන්නෙමි; රජෙකු ඉල්ලීමෙන් ඔබ සැම ස්වාමීන්වහන්සේ ඉදිරියෙහි කළ දුෂ්ටකම මහත් බව එයින් ඔබ සැම දැන තේරුම් ගන්නවා ඇතැයි කීවේය.

¹⁸සාමුවෙල් ස්වාමීන්වහන්සේට යාච්ඤා කෙළේය; ස්වාමීන්වහන්සේ එදා අහස් ගර්ජනාවද වර්ෂාවද එවූසේක. එවිට මුළු සෙනඟ ස්වාමීන්වහන්සේටත් සාමුවෙල්ටත් බොහෝසෙයින් භයවූහ.

¹⁹එවිට මුළු සෙනඟද: අප නොනසින පිණිස ඔබගේ දෙවිවූ ස්වාමීන්වහන්සේට ඔබගේ මෙහෙකරුවන් උදෙසා යාච්ඤාකළමැනවි. මක්නිසාද රජෙකු ඉල්ලීමේ වැරැද්ද අපේ අනික් සියලු පාපවලට එකතුකෙළෙමුයයි සාමුවෙල්ට කීවෝය.

²⁰සාමුවෙල් සෙනඟට කථාකොට: භයනොවන්න. ඔබ සැම ඇත්තෙන්ම මේ මුළු වැරැද්ද කළහුය. එහෙත් ස්වාමීන්වහන්සේ අනුව යාම අත්නොහැර ඔබ සැමගේ මුළු සිතින් ස්වාමීන්වහන්සේට සේවයකරන්න; අහක්ව නොයන්න.

²¹එසේ ගියොත් පිහිටවෙන්ටවත් ගළවන්ටවත් නොහැකිවූ නිරර්ථක දේ අනුව යන්නෝ වන්නහුය. මක්නිසාද ඒවා නිරර්ථක දේවල්මය.

²²ස්වාමීන්වහන්සේ ඔබ සැම ස්වකීය සෙනඟ කරගන්ට ප්‍රසන්නවූ බැවින් තමන්ගේ මහත් නාමය නිසා තමන් සෙනඟ අත්නොහරිනසේක.

²³ඇරත් මා විසින් ඔබ සැම උදෙසා යාච්ඤා නොකර සිටීමෙන් ස්වාමීන්වහන්සේට විරුද්ධව පව්කිරීම මාගෙන් දුරුවේවා. මම යහපත්වූ හරිවූ මාර්ගය ඔබ සැමට උගන්වන්නෙමි.

²⁴ස්වාමීන්වහන්සේට භයව ඔබ සැමගේ මුළු සිතින් උන්වහන්සේට සැබෑලෙස සේවයකරන්න. මක්නිසාද උන්වහන්සේ ඔබ සැම උදෙසා කොපමණ මහත්දේ කළසේක්ද කියා බලන්න.

²⁵නුමුත් ඔබ සැම තවත් නපුරම කරනවානම් ඔබ සැමද ඔබ සැමගේ රජුද නාස්ති වෙනවා ඇතැයි කීවේය.