Read Siyin Chin Pianciilna 1 Bible Online

Pianciilna 1 - Siyin Chin bible

Pianciilna 1

¹A kipatciilin Pathian in vaannuai bup bitphua hi,

²tualai in leitung sia lim le meal nei ngawlin awngthong hi. Na theampo a tuam tuipi kihual sia khuazing in siin bikbek a, Pathian Thaa sia tui tungah diang hi.

³Tuaciang Pathian in, “Khuavak om hen” ci in thupia a — khuavak piang hi.

⁴Pathian in tuasia a mu ciang phasa a, lungkim hi. Tuasia ciang ama in khuazing pan khuavak khen hi,

⁵ama in khuavak sia ‘Sun’ ci a, khuazing sia ‘Zan’ ci hi. Nitak hun bo in zingsang hong theng a — a ni khat ni ahi hi.

⁶Tua zawkciang Pathian in, “Tui sia mun nii in a kikhen tuam natu mun kuampi khat om hen” ci in thupia a — tuaciang tuabangin piang hi. Pathian in tuabang mun kuampi khat vawt a, tuasia in a tung tui sia pan a nuai tui sia khen hi.

⁸Ama in mun kuampi sia “Van” ci hi. Nitak hun bo in zingsang hong theng a — a ni nii ni ahi hi.

⁹Tua zawkciang Pathian in, “Leitang pian natu in, van ii nuai a om tui teng mun khat ah kingawm hen” ci in thupia a — tuaciang tuabangin piang hi.

¹⁰Ama in leitang sia “Leitung” ci a, a kikaikhawm tui teng sia “Tuipi” ci hi. Pathian in tua bang a mu ciang phasa a, lungkim hi.

¹¹Tua zawkciang ama in, “Leitang in thingkung lopa nam theampo, tang a neite le nga a neite piangsak hen” ci in thupia a — tuaciang tuabangin piang hi.

¹²Leitang in thingkung lopa nam theampo piangsak a, Pathian in tuabang a mu ciang phasa a, lungkim hi.

¹³Nitak hun bo in zingsang hong theng a — a ni thum ni ahi hi.

¹⁴Tua zawkciang Pathian in, “Sun le zan kikhen natu, nite, kumte le biakna poaite [1] kipatna lak natu in van ah khuavakte piang hen a;

¹⁵leitung khuavak pia tu in van taang hen” ci in thupia a — tuaciang tuabangin piang hi.

¹⁶Tua ahiciang Pathian in khuavak a lian zaw nii vawt a, sun a uk tu ni le zan a uk tu tha ahi hi; ama in aksite zongh vawt hi.

¹⁷Ama in leitung a taangsak tu in van ah khuavakte koi a,

¹⁸sun le zan a uk tu le khuazing le khuavakte a khen tu ahi uh hi. Pathian in tuabang a mu ciang phasa a, lungkim hi.

¹⁹Nitak hun bo in zingsang hong theng a — a ni li ni ahi hi.

²⁰Tua zawkciang Pathian in, “Tui sia a nungta nganhing nam tam mama te taw kidim hen a, vui sia vacimte taw kidim hen” ci in thupia hi.

²¹Tua ahiciang Pathian in tuipi nganhing liante, tui sung a nungta nganhing nam theampo le vacim nam theampo bitphua hi. Pathian in tuabang a mu ciang phasa a, lungkim hi.

²²Pathian in tuate theampo thupha pia a, tui sung a teang nganhingte no nei in tuipi sung dim tavun, tuaciang vacimte pungin tam mama pha vun, ci hi.

²³Nitak hun bo in zingsang hong theng a — a ni nga ni ahi hi.

²⁴Tua zawkciang Pathian in, “Nganhing nuntakna a nei nam theampo: innsa le ngamsa, a lian le a no leitang in piangsak hen” ci in thupia a — tuaciang tuabangin piang hi.

²⁵Tuabangin tuate Pathian in vawtsiat hi, tuaciang ama ii mu teng sia phasa a, lungkim hi.

²⁶Tua zawkciang Pathian in, “Tu in eite in mihing ih vawt tu hi, amate sia eima taw kibang tu a hong suun tu hi. Amate in, ngasa, vacim le innsa ngamsa, a lian a note tungah vaang nei tu hi,” ci hi.

²⁷Tua ahiciang Pathian in ama mama taw a kibang mihingte bitphua hi. Ama in pa le numei bitphua a,

²⁸thupha pia in, “Na suan na paalte leitung mun theampo ah teangin, amate in leitung a uk tu in, ta tam mama nei tavun. Keima in ngasate, vacimte le nganhingte theampo tungah ukna za kong pia hi.

²⁹Keima in note neak tu in antang nam theampo le thingnga nam theampo kong pia a,

³⁰ahizong ngamsate theampo le vacimte theampo ii an tu in lopa le a tee nei a kungte ka pia hi,” a ci ciang — tuabangin piang hi.

³¹Pathian in a vawtsa theampo a et ciang phasa in lungkim mama hi. Nitak hun bo in zingsang hong theng a — a ni luk ni ahi hi.