Read Siyin Chin Pianciilna 13 Bible Online

Pianciilna 13 - Siyin Chin bible

Pianciilna 13

¹Abram sia a zi, a neisa theampo le Lot taw Egypt panin saksang zuanin Canaan thangsang mun khat ah pai hi.

²Abram sia a hau mama khat hi a, tuute, kealte le khuite bek dom ngawlin khamh le ngunn zongh nei hi.

³Tua zawkciang tua mun nusia in mun khat pan mun khat ah kikhiin in Bethel sang zuan hi. Bethel le ama ii ngiaphual a saat maksakna, biaknatau khat a sak ngeina mun Ai kilaklaw ah ama theng hi.

⁴Tua munah ama in TOPA bia hi.

⁵Lot zongh in tuute, kealte le khuite a nei bek dom ngawlin innkuanpui le naseamte zongh nei hi.

⁶Tua hi a, ngan tha natu mun kicing ngawl ahikom mun khat ah a nii in teenkhop tu suak thei ngawl hi, banghang ziam cile amate in nganno hau mama uh hi.

⁷Tua hikom Abram ii ngancingte le Lot ii ngancingte kilaklaw ah kihauna piang hi. (Tua hunin Canaan te le Periz te tua ngam ah teang lai uh hi.)

⁸Tuasia ciang Abram in Lot tungah, “Eite sia mealheak khat ih hikom, na mite le ka mite a kihau tute hi ngawl hi.

⁹Tua ahikom kikhen zaw heu tawng. Na deina ngam pawpo teal in. Nang mun khat sang na zuan le kei mundang khat ka zuan tu hi,” ci hi.

¹⁰Tuaciang Lot khuadak a, TOPA ii Huan ahibuale Egypt ngam taw a kibang Jordan kuam buppi le Zoar sang theampo, tui tam mama a omna mun teng mu hi. (Tua hun sia Sodom le Gomorrah khuapite TOPA ii a lalsak ma ahi hi.)

¹¹Lot in Jordan kuam buppi ama atu in teal a, nisuana sangah kikhiin hi. Tuabangin amate nii kikhen hi.

¹²Abram sia Canaan ngam ah teang a, Lot sia tua ngam kuam sung khuapite sungah teangin, Sodom khua hui ah ngiaphual saat hi,

¹³Sodom mite sia seksol a, TOPA tungah nasia takin a maw a khialte ahi uh hi.

¹⁴Lot ii a nusiat zawkciang Abram tungah TOPA in, “Na omna mun panin mun theampo pha tak en in.

¹⁵Na muna ngam theampo nang le na suan na paalte tungah kong pia tu a, a tawntungin noma aa hi tu hi.

¹⁶Suan le paal tam mama kong pia tu a, kuama in sim siat zo ngawl tu hi; tua sia sim tu sia leitung ah leivui theampo sim siat tu ol zaw tu hi!

¹⁷Tu in, pai ta'n a, ngam buppi va en ta'n, banghang ziam cile a vekpi nang tungah kong pia siat tu hi,” ci hi.

¹⁸Tua ahikom Abram in a ngiaphual khiinin, Hebron ngamsung Mamre thingkung thiangthote kungah teang a, tua munah TOPA atu in biaknatau khat sa hi.