Read Siyin Chin Pianciilna 14 Bible Online

Pianciilna 14 - Siyin Chin bible

Pianciilna 14

¹Babylon kumpipa Amraphel, Ellasar kumpipa Arioch, Elam kumpipa Chedorlaomer le Goiim kumpipa Tidal, hi kumpi lite in

²a dang kumpi ngate: Sodom kumpipa Bera, Gomorrah kumpipa Birsha, Admah kumpipa Shinab, Zeboiim kumpipa Shemeber le Bela ahibuale Zoar kumpipa te sim uh hi.

³Hi kumpi ngate in kipawlna vawtin tu in Tuipi Thi a kici Siddim Kuam ah a ngalkapte ngawmtua uh hi.

⁴Amate kum sawm le kum nii sung Chedorlaomer khutnuai ah om uh a, ahizong kum sawm le kum thum kum ciang amate in ama leedo kik uh hi.

⁵A kum sawm le li kum ciangin Chedorlaomer le ama taw a kipawl kumpite in a ngalkaphonpite taw sim kik a, Ashteroth Karnaim ah Rephaim, Ham ah Zuzim, Kiriathaim zaanglei ah Emim

⁶le Edom mualte tungah Hor te zo in, sennealngam mong ah a om Elparan ciang dong del uh hi.

⁷Tua zawkciang amate kiheak a Kadesh (tua hun in Enmishpat kici) ah pai kik hi. Amalek te ngam theampo le Hazazon Tamar ah a teang Amor te zo uh hi.

⁸Tuaciang Sodom, Gomorrah, Admah, Zeboiim le Bela kumpi ngate in, a ngalkaphonpi nei teng ngalsim tu in kaikhawm a,

⁹kumpi nga teng in Elam, Goiim, Babylon le Ellasar kumpi lite taw Siddim Kuam ah kido uh hi.

¹⁰Tua kuam sia kattaza dumte taw kidim a, Sodom le Gomorrah kumpite ngal kisimna pan a tai uh ciangin tua dumte sungah taakin, a dang kumpi thum teng sia mual tungah suakta uh hi.

¹¹Kumpi lite in Sodom le Gomorrah ah omna theampo, a an teng zongh la in paipui uh hi.

¹²Sodom ah Abram suapuipa ii tapa Lot teang ahikom amate in a neisa teng taw paipui uh hi.

¹³Ahizong ngalte khut sung pan a suakta khat in Hebrew mi Abram kungah pai in hi thu theampo son hi, Abram sia Amor mi Mamre ii neisa thingkung thiangthote kungah teang hi. Mamre le a suapuipate Eshcol le Aner sia Abram kipawlpui te ahi uh hi.

¹⁴Abram in a suapuipa tapa a kimatna thu a zaak ciang, ngalsim tu ngalkap 318 teng a ngiaphual ah kaikhawmin, tua kumpi li te Dan ciang dong del uh hi.

¹⁵Tua munah a mite a pawlin khen a, zan in ngal a sim ciang zo uh hi. A ngalte sia Damascus saksang Hobah ciang dong del uh a,

¹⁶tuaciang a kisuttol vanh teng nga kik hi. Ama in a suapuipa tapa Lot le a neisa teng, numeite le thongtaak dang teng zongh ciapui kik siat hi.

¹⁷Abram in kumpipa Chedorlaomer le kumpi dangte a zawna pan a cia kik ciang, Sodom kumpipa in Shaveh Kuam (Kumpipa Kuam zong kici) ah ama taw kisi tu in pai hi.

¹⁸Tuaciang Saangbel Pathian ii thiampi zongh ahi, Salem kumpipa Melchizedek in zongh anluum le sapittui Abram kungah puak a,

¹⁹ ama in “Vantung le leitung a vawt Saangbel Pathian in Abram thupha pia tahen!

²⁰Na ngalte hong zosak Saangbel Pathian sia kipok tahen!” ci in Abraham thupha pia hi. Tuaciang Abram in a kisuttol a nga kik vanh theampo sung pan sawm a khat Melchizedek tungah pia hi.

²¹Sodom kumpipa in Abram tungah, “Sutol vanh teng tang in a, ahizong ka mi teng hong pia kik ta'n,” ci hi.

²²Abram in, “Vantung le leitung Vawtpa, Saangbel Pathian, TOPA mai ah

²³khauzam khat ahizong, peangdap khau ngawngawn ahizong, na neisa bangma ka la buatu hi, ci in ciliapna taw ka kiciam hi. Tuasia ahibuale nangma in, ‘Abram a hausak pa keima khi hi,’ ci tha tu ni hi.

²⁴Ka mite ii zak sa teng ngawl buang keima tan tu in bangma ka la buatu hi. Ahizong keima hong panpui Aner, Eshcol le Mamre te in amate tel tu teng la tahen” ci in zo hi.