Read Siyin Chin Pianciilna 15 Bible Online

Pianciilna 15 - Siyin Chin bible

Pianciilna 15

¹Hi teng zawkciang Abram in mukholna nei a, TOPA in, “Abram awng, lau heak in, Keima in lauhuaina panin nang kong dal tu a, thaman lian khat kong pia tu hi,” a cisia za hi.

²Ahizong Abram in, “Vaanglianpipa TOPA awng, ta nei ngawl ka hi ciang nong piak tu thaman sia kei atu in bang phatuam tu ziam? Ka innlua tu pa sia Damascus khua mi Eliezer bekma ahi hi.

³Ta hong pia ngawl na hi ciang ka sila khat in ka neisa teng lua tu hi,” ci in zo hi.

⁴Tuasia ciang TOPA in ama paupui kik a: “Hi sila, Eliezar in na neisate lua ngawl tu a; nangma tapa tatak ma na innlua hi tu hi,” a cisia za hi.

⁵TOPA in ama doipua sangah pusuapui a, “Van en in a, aksite sim sin in; tuaza a tam suan le paal na nei tu hi,” ci hi.

⁶Abram in TOPA pummuan a, hisia hangin TOPA lungkim in ama saang hi.

⁷Tuaciang TOPA in ama tungah, “Hi ngam teng nangma hong pia tu in, Babylon ngam Ur khua pan hong masuanpa sia Keima TOPA ka hi hi,” ci hi.

⁸Ahizong Abram in, “Vaanglianpipa TOPA awng, tua ngam teng kei atu ahi sia bangbangin he thei tu khi ziam?,” ci in dongh hi.

⁹TOPA in “Kum thum a pha khuipui khat, kum thum a pha keal khat, kum thum a pha tuutal khat, tuaciang inn vakhu khat le ngam vakhu khat hong paipui ta'n,” ci in zo hi.

¹⁰Abram in hi nganno teng Pathian kungah paipui a, phel nii veu sua a phel khat teng le phel dang khat teng ngual nii a kinungngat in koisak hi; ahizong vacimte pheltham ngawl hi.

¹¹Tua saluangte tungah vaciikte tuaksuk hi, ahizong Abram in bengkeak hi.

¹²Ni tum ciang Abram mutthip a, ama tungah launa le patauna theng hi.

¹³TOPA in ama tungah, “Na suan na paalte ngamdang ah khualmi suak tu hi; amate sia tua munah kum zali sung sila kaai in kivawtsia tu hi.

¹⁴Ahizong amate sila in a khoai minam sia daan ka pia tu a, tua ngamdang a nusiat ciang nei le lam tam mama hong ciapui tu uh hi.

¹⁵Nangma na hile kicing takin huaikut teakkut in na nungta tu a, nuam takin thi in, hong kivui tu hi.

¹⁶Khang li zawkciang na suan na paalte hi ngam ah hong cia kik tu hi, banghang ziam cile hi sungah Amor te sia hong seksol mama tu a, daan a kipiak mateng hi mun pan ka notkeak buatu hi,” ci hi.

¹⁷Ni tumin khua a zin ciang meikhu a suak meibeal le meisip kuang sia thakhat thu in kilangh a, nganhing sabekte kilaklaw kaantan hi.

¹⁸Tuasia ciang tua munah TOPA in Abram taw thuciamna khat vawt hi. Ama in, “Na suan na paalte tungah Egypt ngamngi pan Euphrates ngun dong,

¹⁹tua ngamte sungah Ken te ngam, Keniz te ngam, Kadmon te ngam,

²⁰Hit te ngam, Periz te ngam, Rephaim te ngam,

²¹Amor te ngam, Canaan te ngam, Girgash te ngam le Jebus te ngam teng a kihel hi leitang theampo piak tu kong kamciam hi,” ci hi.