Read Siyin Chin Pianciilna 16 Bible Online

Pianciilna 16 - Siyin Chin bible

Pianciilna 16

¹Abram zi Sarai in ta khat zongh nei ngawl hi. Ahizong ama in Egypt te Hagar a kici sila numei khat nei hi,

²tua ahiciang Sarai in Abram tungah, “TOPA in keima ta hong neisak ngawl hi. Ka silanu taw banghang lumkhawm ngawl tu ni ziam? Ama in kei atu in ta khat hong neisak thei tha tu hi,” ci hi. Abram sia Sarai ii ci bang thukim hi.

³Tua ahiciang Sarai in Hagar sia Abram tungah a zino tu in pia hi. (Canaan ngam ah Abram kum 10 a teen zawkciang hi thu piang hi, )

⁴Abram in Hagar ompui a, ama naungil om hi. Ama in a ngai hunlam a heak ciang, hong kiphasak a, Sarai zawngsak hi.

⁵Tuaciang Sarai in Abram tungah, “Hagar ii hong zawnsakna sia nangma khialna hang hi. Keima mama in nangma tungah ama kong pia a, ama in a ngai hunlam a heak pan kipan, kei hong zawngsak hi. TOPA in nang ahibuale kei, akua a maan ci sia thu hong khen tahen,” ci hi.

⁶Abram in, “Pha mama hi, ama sia na sila nu hi a, nangma khutnuai ah om hi; na uuk bang po vawt in,” ci in zo hi. Tua zawkciang Sarai in Hagar vawtsia mama ahikom Hagar tai hi.

⁷TOPA vantunglalang sia Shur paina lampi senneal ngamsung ciktui khat ah Hagar taw kisi a,

⁸ama in, “Sarai sila nu Hagar awng, koisung pan hong pai a, koisung zot sawm ni ziam?” ci hi. Ama in, “Ka tonu kung pan a tai ka hi hi,” ci in zo hi.

⁹Vantunglalang in, “Na tonu kungah cia kik ta'n a, ama sila ma in om ta'n,” ci hi.

¹⁰Tua zawkciang ama in, “Suan le paal tam mama kong pia tu a, kuama in sim zo ngawl tu hi.

¹¹Tapa khat na nei tu a, a min Ishmael na phuak tu hi, banghang ziam cile thinngim in na kaana TOPA in za zo hi.

¹²Ahizong na tapa sia ngamlaa khat taw kibang tu hi, ama in mihingte theampo langpan in, mihingte theampo in zongh, ama langpan tu hi. A mealheakte theampo om ngawlna ah ama teang tu hi, ci hi.

¹³Tuaciang Hagar in, “Pathian a mu tatak khi ziam, tua thu son tu in nungta lai khi ziam?,” ci in ama le ama kidongh hi. Tua ahikom ama a paupui TOPA sia, “Hong Mu Pathian khat” ci hi

¹⁴Tua ahi hu in mite in Kadesh le Bered kilaklaw ah tuikhuk sia, “A Nungta Hong Mu Pa ii Tuikhuk, ‘Beer Lahai Roi’ ” ci uh hi.

¹⁵Hagar in Abram taw tapa khat nei a, Abram in a min Ishmael, phuak hi.

¹⁶Tua hun in, Abram sia kum sawmliat le kum luk pha hi.