Read Siyin Chin Pianciilna 17 Bible Online

Pianciilna 17 - Siyin Chin bible

Pianciilna 17

¹Abram kum sawmkua le kum kua a phak ciang ama tungah TOPA kilangh a, “Keima in Vaanglianbelpa Pathian ka hi hi. Ka thu hong ni ta'n a, a maan in seam tawntung in.

²Nangma taw ka thuciamna ka vawt tu a, suan le paal tam tatak kong pia tu hi,” ci hi.

³Abram sia a maitang lei a phak dong kunsuk a, Pathian in,

⁴“Nang taw hi thuciamna ka vawt hi: nang in minam tam mama te ii taanghpupi na hi tu hi ci in kong kamciam hi.

⁵Na min, Abram hi nawn ngawl tu a, Abraham kici zaw tu hi; banghang ziam cile minam tamte ii taanghpupi tu in kong siam zo hi.

⁶Keima in suan le paal tam mama kong pia tu a, kimkhatte kumpi suak tu hi. Nangma in suan le paal tam mama na nei tu a, amate sia minamte suak tu uh hi.

⁷“Ka kamciam ka kipsak tu a, nangma le na suan na paal khangkikte tungah, tawntung thuciamna hi tu hi. Keima in na Pathian ka hi tu a, na suan na paalte ii Pathian ka hi tu hi.

⁸Tu in ngamdangmi khat bangin na omna hi leitang sia nangma le na suan na paalte tungah kong pia tu hi. Canaan ngam bup sia na suan na paalte in a tawntungin lua tu a, keima in amate ii Pathian ka hi tu hi,” ci hi.

⁹Pathian in Abraham tungah, “Nangma le na suan na paal khangkikte in keima taw ih thuciamna sia a zui tu in nangma zongh na thukim kul hi.

¹⁰Nangma le na suan na paalte theampo in no sung pan pa a minpiang ii vunteap at tu na thukim uh kul hi.

¹¹Tu pan kipan note sung pan a sua zawk ni liat a pha pano peuma, vunteap ki at tu a, na inn sungsuak silate le ngamdang pan na lei silate zongh kihel tu hi.

¹²Note vunteap ki atna in, no le kei kilaklaw a thuciamna khat a om hunlam lak tu hi.

¹³A mi simin vunteap ki at nanak tu hi, hisia in note taw ka thuciamna kip tawntung hi ci in a lak tu na pumpi tungah limlakna khat hi tu hi.

¹⁴Pasal a minpiang vunteap a ki at ngawl peuma keima mi khatin kingaisun nawn ngawl tu hi, banghang ziam cile keima taw ka thuciamna ama in paltan hi,” ci hi.

¹⁵Pathian in Abraham tungah, “Na zi sia Sarai na ci nawn bua het tu hi; tu pan kipan ama min Sarah hi.

¹⁶Ama thupha ka pia tu a, ama taw tapa khat kong pia tu hi. Ama thupha ka pia tu a, ama in minamte ii nu hi tu hi, tuaciang ama suan le paal sung pan kumpite piang tu hi,” ci hi.

¹⁷Abraham sia a maitang lei a phak dong kunsuk a, ahizong hi bang thu teng a ngaisut ciang a nuiza hi; a thinsung ah, “Kum zakhat a pha pasal khat in ta khat nei thei tu ziam? Kum sawmkua a pha Sarah in ta khat nei thei tu ziam?” ci hi.

¹⁸Ama in Pathian tungah, “Banghangin, Ishmael sia ka inn lua tu suaksak ngawl tu ni ziam?” ci in dongh hi.

¹⁹Ahizong Pathian in, “Hi ngawl hi, na zi Sarah in nang atu in tapa khat hong nei tu a, a min Isaac na phuak tu hi. Ama tung ahizong a suan a paalte tung ahizong ka thuciamna sia a tawntungin ka kholet tu hi. Tua in a tawntung a kip thuciamna khat ahi hi.

²⁰Ishmael huvau nong ngetna ka za zo hi, tua ahiciang ama thupha ka pia tu a, ta tam mama, suan le paal tam mama ka pia tu hi. Ama in kumpi sawm le nii te ii pa hi tu a, a suan a paalte sia minam lian khatin ka siam tu hi.

²¹Ahizong mai kum tu hun khawng ciangin Sarah sung pan hong suak tu na tapa Isaac taw ka thuciamna ka kholet tu hi,” ci hi.

²²Abraham tungah a thuson tu teng a man ciang, Pathian in ama nusia hi.

²³Tua ni mama in, Abraham in Pathian thu ni a, ama tapa Ishmael, a inn sungsuak pasal dang theampo, a inn sungsuak silate le a lei silate zongh vunteap atsak hi.

²⁴Abraham vunteap a ki at lai in kum sawmkua le kum kua pha a,

²⁵a tapa Ishmael kum sawm le kum thum pha hi.

²⁶Ni khat sungin, amate nii sia

²⁷Abraham ii silate theampo taw vunteap at khawm uh hi.