Read Siyin Chin Pianciilna 18 Bible Online

Pianciilna 18 - Siyin Chin bible

Pianciilna 18

¹TOPA sia Mamre thingkung thiangthote kungah a om Abraham tungah kilangh hi. Abraham sia a puanbuk kongbiang ah sun nisatbel laitakin to hi,

²ama khua a etto le tuak san ah mihing thum a ding mu hi. Ama in amate a mu po ciang kimu tu in tai hi. A maitang lei a phak dong kunsuk in,

³ama in, “Syate awng, nong hesuakna in hong baang ngawlin ka inn hong kaantan heak vun; hi sungah note leangna hong do tu in om khi hi.

⁴Na peang sil natu tui kong toai tu a; hi thingkung nuai ah na tawlnga tu uh hi.

⁵An tawm kong pia tu a, tua an in na khualhawna ah hong thahatsak tu hi. Vaang nong piakna taw ka inn hong zuan zo na hi uh ciang, zin hong dosak tavun,” ci hi. Amate in, “Lungdam ung; hong saang khu hi,” ci in zo kik uh hi.

⁶Abraham a puanbuk sungah tai in Sarah tungah, “Na anvui a pha belte ip khat la in anluum in em paih in” ci hi.

⁷Tua zawkciang ama in a nganhon omna ah tai in khuino thau a limcibel khat tealin, a naseampa tungah aap a, neak thei tu in vawtsak memeang hi.

⁸Ama in amate mai ah khuinoai diat, khuinoai, khuisa le an hong lui hi. Ama mama in tualai thingkung nuai ah leangna do in an nesak hi.

⁹Tua zawkciang leangnate in ama tungah, “Na zi Sarah koisung om ziam?” ci in dongh hi. Ama in, “Puanbuk sungah ama om hi,” ci in zo hi.

¹⁰Amate khat in, “Tu zo tha kua ciang kong pai kik tu a, na zi Sarah in tapa khat nei tu hi,” ci hi. Sarah in a pasal nungsang puanbuk kongkha pan ngai hi.

¹¹Abraham le Sarah sia huai mama zo a, Sarah sia a tha sim numei ngeina kang zo hi.

¹²Tua ahikom Sarah ama nguakin nui a, “Tu in kei sia ka kum tamin huai zo a, numei le pa nopsakna nei thei lai tu khi ziam? Ka pasal zongh le huai zo si hi,” ci hi.

¹³Tuasia ciang TOPA in Abraham tungah, “Banghang Sarah nui a, ‘Ka kum a haam mama zawkciang ta nei thei takpi lai tu khi ziam?’ banghang ci ziam?

¹⁴Na khat pawpo TOPA atu in a haksa leilam om na ziam? Kong ci sa bangin tu zo tha kua ciang kong pai kik tu a, Sarah in tapa khat nei tu hi,” ci hi.

¹⁵Sarah lau ahikom, tuasia nial hi. Ama in, “Kei ka nui bua hi” ci hi. Ama in, “Ahi ma hi, nui ni hi” ci in zo kik hi.

¹⁶Tua zawkciang leangnate in nusia a Sodom khua a etsuk thei natu munah pai uh hi, Abraham in amate tha hi.

¹⁷Tuaciang TOPA in, “Ka hi tu thu teng Abraham tungah ka iim buatu hi.

¹⁸Ama ii suan le paalte minam lian khat le a thahat minam khat suak tu a, ama tungtawnin minam theampo thupha ka pia tu hi.

¹⁹A tapate le a suan a paalte tungah ka thu ni a, thumaan thutang a vawt natu, thu a piak natu in ama ka teal zo hi. Tuabang a vawt uh le ka kamciamsa bangin ama ta tu ka hisak siat tu hi,” ama le ama kici hi.

²⁰Tuasia ciang TOPA in Abraham tungah, “Sodom le Gomorrah a kimawsiatna, nasia mama a, a mawna uh lian mama hi.

²¹A kimawsiatna ka zaak teng maan ziam maan ngawl ziam kantel tu in ka paisuk kul tu hi,” ci hi.

²²Tua zawkciang Abraham ii leangnate nii sia Sodom sangah pai a, ahizong TOPA sia Abraham taw taanglai hi.

²³Abraham in TOPA neak a, “A mawbaang ngawlte a mawte taw susia khawm takpi tu ni ziam?

²⁴Sodom khuapi sungah mawbaang ngawl mihing sawmnga om le khuapi bup lalsak tu ni ziam? Tua sawmnga te huu tu in tua khuapi khoaikhe ngawl tu ni ziam?

²⁵Mawbaang ngawlte a mawte taw thatlum khawm ngeingawl het tu ni hi. Tuasia suak thei ngawl hi! Tuabang vawt thei ngawl tu ni hi. Tuabang vawt thong lete a mawte bangma in a mawbaang ngawlte zongh daan thuak tu hi thong hi. Hi thei ngawl tu hi. Leitung theampo ii thukhenpa in thu a maan in a khen kul tu hi,” ci hi.

²⁶TOPA in, “Sodom khuapi sungah a mawbaang ngawl mihing sawmnga mu leng, amate hangin khuapi bup ka khoaikhe tu hi,” ci in zo hi.

²⁷Abraham in, “TOPA awng, hi bangin hangsan takin kong ci kik sia nong hesuakna in hong maisak ta'n. Kei mihing khat hi lel a, nang tungah thu khat pawpo son natu thu ka nei bua hi.

²⁸Ahihang a mawbaang ngawl mihing sawmnga om zo ngawlin sawmli le nga bek om thei tha tu hi. Mihing nga a kisapna hangin khuapi bup na lalsak veve tu ziam?” ci kik hi. TOPA in mimaw ngawl sawmli le nga mu leng tua khuapi ka lalcipsak buatu hi,” ci in zo kik hi.

²⁹Abraham in, “Sawmli bek om le eh!” ci kik hi. TOPA in sawmli om le ka lalsak buatu hi,” ci in zo kik hi.

³⁰Abraham in, “TOPA awng, nong hesuakna in na thin uuk heak in a, thu khat kong dongh lai tu hi. Sawmthum bek om le bangbang ahi tu ziam?” ci hi. Ama in, “Sawmthum ka mu le ka lalsak buatu hi,” ci hi.

³¹Abraham in, “TOPA awng, nong hesuakna in nang tungah kong ci ngam lalai na hong maisak ta'n. Kul bek kimu luilam le eh!” ci hi. Ama in, “Kul ka mu le khuapi ka lalsak buatu hi,” ci hi.

³²Abraham in, “TOPA awng, nong hesuakna in thin uuk heak in a, khatvei bek hong pausak lai ta'n. Sawm bek kimu le eh?” ci hi. Ama in, “Sawm a om le ka lalsak buatu hi,” ci hi.

³³Abraham taw a thu son tu teng a man zawkciang, TOPA paisuak a, Abraham sia inn ah cia kik hi.