Read Siyin Chin Pianciilna 19 Bible Online

Pianciilna 19 - Siyin Chin bible

Pianciilna 19

¹Vantunglalangte nii Sodom a thet nitakin khuapi kongpi ah Lot to hi. Lot in, amate a mu po ciang dingin muak hi. Amate mai ah Lot kunin,

²“Syate awng note leangna hong do tu in kei hi sungah ka om hi. Nong hesuakna in, ka inn ah hong tung tavun. Na peang uh sil in zan hong ngiak thei tu nu hi. Zingsang ciang tho palin na pai natu uh na pai suak thei tu uh hi,” ci hi. Ahizong amate in, “Hi ngawl hi, khuapi khawlmun ah tu zan ka taam tu uh hi,” ci in zo hi.

³Lot in amate kunh top ahikom a khakbel ciang a inn ah zui uh hi. Lot in a naseamte anluum pawlkhat emsak in a zinte anlim vaak hi.

⁴A zinte a lup ma in Sodom te in a inn kiim uum uh hi. Tua munah khuapi sung pan a moi a haam pasal theampo hong pai hi.

⁵Amate in Lot sam a, “Tu nitak na inn ah a taam tu in hong tung pasalte koisungah om ziam? Ko kungah hong pusuaksak ta'n” ci uh hi. Sodom pasalte in amate khialpui nuam hi.

⁶Lot pusuak in innkha kha san hi.

⁷Lot in amate tungah, “Lawmte awng, hong thuum khi hi, hi bang a seksol in ngamta heak vun!

⁸En vun, ngaknu thiangtho ta numei nii ka nei hi. Note kungah amate kong paipui tu a, na uuk babang vawt thei tu nu hi. Ahizong hi mite bangma lawsak heak vun; keima zinte ahikom ka huuk kul hi,” ci hi.

⁹Ahihang amate in, “Nang ngamdangmi awng, hong pial ta'n! Ko, bang seam tu ci hong sawl sia akua ni ziam? Hong pial ta'n, tua ahibuale amate tung ka vawt tu uh sangin a sia zaw in nang kong vawt tu uh hi,” ci uh hi. Amate in Lot a nungsangah sawnin, innkha sutham tu in pai uh hi.

¹⁰Ahizong inn sung a om a zinte nii hong thengin amate omna inn sungah Lot kai a, innkha khak uh hi.

¹¹Tuaciang amate in innkha a mu thei ngawl natu in innpua sangah a om mi theampo a mit uh tawsak hi.

¹²Tua pasalte nii in Lot tungah, “Hi sungah a dangkhat pawpo — tapate, tanute, maakte — ahibuale khuapi sungah a teang mealheak dangte na nei lai le hi mun panin pusua pui in;

¹³banghang ziam cile hi mun lalcipsak tu khu hi. TOPA in hi mihingte a kimawsakna thute za zo ahikom Sodom khua lalcipsak tu in ko hong puak hi,” ci in son hi.

¹⁴Tuaciang Lot va pai in a tanute ii a teenpui tu pasal, a maak tute tungah, “Manlang in hi mun pan pai vun; TOPA in hi mun lalcipsak tu hi,” ci hi. Ahihang amate in ama ciammui thu son in ngaisun uh hi.

¹⁵Zingsang khuavak ciang a manlan natu in vantunglalangte in Lot thawn hi. Amate in “Manlang in khuapi a kilalcipsak ciang na suatak thei natu in, na zi le na ta numeite nii taw tai tavun,” ci hi.

¹⁶Lot sia a thinkaa in om lai hi. Bangbang hikale TOPA in ama hesuak hi; tua ahikom tua pasalte in ama, a zi le a tanute nii a khut lenin khuapi pua sangah masuan hi.

¹⁷Tua zawkciang vantunglalang khat in, “Na nuntak natu in tai vun! Nungsang en kik heak vun a, munkuam ah tawlnga heak vun. Hong kithalup ngawl natu in mualte sangah tai tavun,” ci hi.

¹⁸Ahizong Lot in, “Hi ngawl hi, syapa awng, tuabangin hong ngamtasak heak in.

¹⁹Nangma in maipha nong pia zo a, ka nuntakna nong hun zo hi. Ahizong mualte khuala leih hi; lalna siatna in kei hong pha tu a, tua mun ka thet ma ka thi tu hi.

²⁰Ngalkhat ah khuano sia na mu ziam? Tua khua sia nai lel hi. Tualai ah hong paisak tan — tua mun sia khuano khat ahi sia na mu thei hi — tua hile ngammuang tu khi hi,” ci in zo hi.

²¹Ama in, “Pha hi, na ci bangin ka thukim hi. Tua khua ka lalsak buatu hi.

²²Manlang in! Tai in! Tua khua na thet mateng bangma ka vawt thei buatu hi,” ci in zo hi. Banghang ziam cile Lot in tua khua sia, no hi ci ahikom, a min Zoar kici hi.

²³Zoar ah Lot a thet ciangin ni suak hi.

²⁴TOPA in thakhat thu in Sodom le Gomorrah khuapite tungah kaan meikuang zusak a,

²⁵tuaciang tua khuapite le a ngamkuam bup laltham in, tua munah a teang mihingte theampo le leitung ah a po theampo mon siat hi.

²⁶Ahizong Lot ii zi sia nungsang en kik ahikom cikhuam khat suak hi.

²⁷A zing ciang zingtuung in Abraham sia TOPA taw a kisik ngeina a dinna munah manlang takin pai hi.

²⁸Ama in Sodom le Gomorrah le a ngamkuam bup ensuk a, meiphualpi khat pan meikhu suak taw a kibang, lei pan meikhu a suakto mu hi.

²⁹Ahizong Pathian in Lot ii teenna ngamkuam ii khuapite a lalcipsak ciangin a thinsung ah Abraham mangil ngawl ahikom Lot sia suaktasak hi.

³⁰Lot in Zoar khua ah teen tu lauhuai sa ahikom a tanute nii taw mualte kawm ah kikhiinto in suanghawng khat sungah teang uh hi.

³¹A unu in a nau tungah, “Ih pa huai zo a, ta ih nei thei natu in leitung bup ah ei hong teenpui tu pasal om ngawl hi.

³²Hong pai ta'n, ih pa taw lumkhawmin ta hong neipui natu in ih pa sapittui khamsak tawng,” ci hi.

³³Tua zanin amate in a pa sapittui pia a, a tanu uzaw taw lumin omkhawm hi. Ahizong a pa in sapittui kham leih ahikom a omkhop hunlam he ngawl hi.

³⁴A zing ciang a unu in a suapuinu tungah, “Zeini zan in ama taw ka lumkhawm hi; tu nitak zong sapittui ih khamsak kik tu a, nangma taw na lumkhawm tu hi. Tuasia ciang ih unau in ih pa taw ta khat veve ih nei tu hi,” ci hi.

³⁵Tua hi a, tua zanin, a pa sapittui khamsakin, a naunu le a pa lumin khial hi. A pa sapittui kham leih kik ahikom tuasia hunlam he ngawl hi.

³⁶Tuabangin Lot ii ta numeite ngeal sia a pa taw naupaai uh hi.

³⁷A tanu uzaw in tapa khat nei a, Moab ci in minphuak hi. Ama in tu hun a, Moab te ii pianna taanghpupi ahi hi.

³⁸A tanu nozaw zongh in tapa khat nei a, Benammi ci in min phuak hi. Ama in tu hun a Ammon te pianna taanghpupi ahi hi.