Read Siyin Chin Pianciilna 2 Bible Online

Pianciilna 2 - Siyin Chin bible

Pianciilna 2

¹Tuabangin vaannuai buppi sia kikhuangkhim hi.

²A ni sali ni ciangin Pathian in a nasep teng man siat a, nasep tawlnga hi.

³Tua ni in ama in a bitphua nasep a khuangkhim a, a nasep tawlnga ahi hu in, a ni sali sia thupha pia a, ni thupi khatin tuam koi hi.

⁴Tuaciang vaannuai bitphuana sia tuabang teng ahi hi. TOPA Pathian in vaannuai bup a vawt lai in,

⁵leitung ah thingkung lopate om ngawl a, thaicii a po zongh om ngawl hi, banghang ziam cile ama in nguazusak ngawl a, lotho tu khat zongh om ngawl hi,

⁶ahizong leinuai pan tui pusuakin, lei kawtsak hi.

⁷Tuasia ciang TOPA Pathian in lei pan leivui pawlkhat la in tuasia taw mihingpa khat vawt hi; ama in a naak sungah nuntakna a piangsak hu mopin tua mihingpa hong nungta hi.

⁸Tua zawkciang TOPA Pathian in nisuana sang Eden ah huan khat vawt a, tua munah ama ii vawtsa mihingpa koi hi.

⁹Ama in a et hoi thingkung namcin tua munah posak in, ngaphate ngasak hi. Huan laizang ah nuntakna a pia thingkung le a pha a sia heak theina a pia thingkung posak hi.

¹⁰Eden huan sungah lui khat luang a, huan sung tui kawtsak hi; Eden puasang a thet ciang tua sia ngun li in kikhen hi.

¹¹A masabel ngun sia Pishon hi a; Havilah ngam kiimvealin luang hi. (

¹²Tualai ah khamh ciitak om a, a om vazaak ngawl paaknamtui le suang manphate zongh om hi.)

¹³A niina ngun sia Gihon hi a; Cush ngam kiimvealin luang hi.

¹⁴A thumna ngun sia Tigris hi a, Assyria ngam nisuana sangah luang hi, tuaciang ngun a lina sia Euphrates ahi hi.

¹⁵Tuaciang TOPA Pathian in Eden huan sungah a tho tu le a cing a keam tu in, mihingpa koi hi.

¹⁶Pathian in ama tungah, “Huan sung thingkung khat pawpo ii nga na ne thei tu a,

¹⁷a pha le a sia heak theina thingnga ngawlbuang na ne thei tu hi. Tua thingkung ii nga na ne buahet tu a; na ne le na neak ni ma in na thi tu hi,” ci hi.

¹⁸Tuaciang TOPA Pathian in, “Mihingpa sia ama nguak a om tu pha ngawl hi. Ama a hu tu in a kilawm koppui tu khat ka vawt tu hi,” ci hi.

¹⁹Tua ahiciang Pathian in lei pan leivui pawlkhat la in, nganhing theampo le vacim theampo vawt hi. Tua zawkciang tua teng min a vaw tu in mihingpa ii mu tu in paipui a; ama ii min vaw bangin min nei siat uh hi.

²⁰Tuabangin mihingpa in vacim theampo le nganhing theampo min vaw siat a, ahizong ama a panpui thei tu a kilawm a koppui tu khat zongh om ngawl hi.

²¹Tuasia ciang TOPA Pathian in mihingpa mutthipsak a, a mut lanin a telngu khat laaksakin tua mun a sa khak kik hi.

²²Pathian in tua telngu taw numei khat vawt a, ama ii kungah paipui hi.

²³Tuasia ciang mihingpa in, “Tu pepeet ciang, hisia in keima ii nam bang mihing khat — ka ngu pan a kila ngu le ka sa pan a kila sa ahi hi. Mihingpa sung pan a kila nu ahikom ama ii min ‘numei’ hi,” ci hi.

²⁴Tua ahi hu in mihingpa khat in a nu le a pa nusia in a zi taw kingawm tu a, amate pumkhat suak tu uh hi.

²⁵Tua mihingpa le tua numei a pumnguak hi uh a, ahihang maizum ngawl uh hi.