Read Siyin Chin Pianciilna 20 Bible Online

Pianciilna 20 - Siyin Chin bible

Pianciilna 20

¹Mamre pan Canaan thangsang ah Abraham kikhiin suk a, Kadesh le Shur kilaklaw ah teang hi. Tua zawk Gerar ah a teen lai in,

²Abraham in a zi Sarah sia ka suapuinu hi, ci hi. Tua hu in Gerar kumpipa Abimelech in a zi tu in la hi.

³Zan khat Abimelech ii mang sungah Pathian kilangh a: “Hi numei na laak hu in, nang na thi tu hi, banghang ziam cile ama in pasal neisa ahi hi,” ci hi.

⁴Ahizong Abimelech in Sarah nai neak ngawl hi, tuaciang ama in, “TOPA awng, kei mawbaang ngawl khi hi. Kei le ka mite hong that tu ni ziam?

⁵Abraham ama mama in ka suapuinu hi hong ci a, Sarah in tuabang ma hong ci hi. Tua ahikom kithasunna nei ngawlin ngamta ka hi a, ka khial bua hi,” ci hi.

⁶Pathian in a mang sungah, “Hi hi, kithasunna nei ngawlin na ngamtatna thu kong he a; tua ahikom kei tungah nong maw ngawl natu in kong keam a, ama kong thuthasak bua hi.

⁷Ahihang tu in, numeinu sia a pasal aap kik in. A pasal sia kamsaang khat hi a, na thi ngawl natu in thu hong ngetsak tu hi. A zi na pia kik bua ahile nangma a kipan na mite theampo na thi siat natu thu kong telkholsak hi,” ci in zo kik hi.

⁸A zing ciang zingsang tuungin Abimelech in a uliante samin, thupiang teng son a, amate lau mama uh hi.

⁹Tua zawkciang Abimelech in Abraham samin, “Kote tungah bang teng hong vawt ni ziam? Kei le ka kumpi ngam sungah hi siatna nong tunsak natu in nang tungah bang khialna hong vawt khi ziam? Kei tungah nong vawt bangin kuama in hong vawt ngeingawl hi.

¹⁰Banghangin hi bang hong vawt ni ziam?” ci in dongh hi.

¹¹Abraham in, “Hi sungah Pathian a thasia khat zongh om ngawl tu ahikom ka zi a dei manin kei hong thatlum tu hi, ci in ka ngaisun hi.

¹²Ama sia ka suapuinu tatak hi; pa khat ii ta ka hi uh a, ka nu uh kibang ngawl ahikom ka teenpui hi.

¹³Pathian in ka pa inn pan ngamdang ah hong pusuaksak ahiciangin Sarah tungah, ‘Kei sia mi theampo tungah ka suapuipa hi nong cina taw kei tungah na thumaanna nong lak thei tu hi,’ ka ci sa hi,” ci in zo hi.

¹⁴Tuaciang Abimelech in Abraham tungah Sarah aap kik a, tuu, khui le silate taw zong pia khawm hi.

¹⁵Ama in Abraham tungah, “Hi ngam bup keima aa hi; na ukna po ah teang in,” ci hi.

¹⁶Ama in Sarah tungah, “Na suapuipa tungah ngunntang tulkhat ka pia hi; nang taw a om mi theampo mai ah mawbaang ngawl na hina, a kilak natu hi a; khialna bangma vawt ngawl hi, ci in a kuama po in hong he tu hi,” ci hi.

¹⁷Abraham ii zi Sarah tungah tubang teng a pian hu in, TOPA in Abimelech inn sung a om numei theampo, ta a nei thei ngawl tu in vawt hi. Tua ahiciang Abraham in Abimelech atu thu ngetsakin, Pathian in ama damsak hi. Amate in hin le toaite a nei thei natu in a zi le a sila numeite zongh damsak siat hi.