Read Siyin Chin Pianciilna 21 Bible Online

Pianciilna 21 - Siyin Chin bible

Pianciilna 21

¹A kamciamsa bangin TOPA in Sarah thupha pia hi,

²tuaciang Sarah naupaai in Abraham huai zawkciang ama atu tapa khat nei hi. Tua tapano sia Pathian in ama piang tu a ci hun ma in suak hi.

³Abraham in a tapa min Isaac phuak hi,

⁴tuaciang Pathian thupiak bangin Isaac ni liat a phak ciang Abraham in a vunteap atsak hi.

⁵Isaac a sua in Abraham kum zakhat pha hi.

⁶Sarah in, “Pathian in lungnopna le nuina hong pia zo hi. Hi thu a za peuma in hong nuipui tu hi,” ci hi.

⁷Tua zawkciang, “Sarah in patangte noaitui taw vaakin a omh tu hi, ci in akua in Abraham tungah son ngei natu ziam? Ahizong a huai ciang ama atu in tapa khat ka nei zo hi,” Sarah in ci thua hi.

⁸Nauno hong khang a, noai a kitensak ni in Abraham in anneakpoai lian khat vawt hi.

⁹Ni khat ni in, Egypt mi Hagar ii Abraham atu a nei a tapa Ishmael le Sarah tapa Isaac kimai hi.

¹⁰Sarah in amate a mu ciang Abraham tungah, “Hi sila numei le a tapa hawlkhia in. Ka tapa Isaac ii lua tu nei le lamh khen khat zongh hisia nu ii tapa in nga thei ngawl tu hi,” ci hi.

¹¹Tua in Abraham thinngimsak mama hi, banghang ziam cile Ishmael zongh ama ta ma ahi hi.

¹²Ahizong Pathian in Abraham tungah, “Hi tapano sia le na sila Hagar huvau in thinngim heak in. Sarah hong ci bang pawpo in seam in; banghang ziam cile kong kamciamsa suan le paalte Isaac tungtawnin na nei tu hi.

¹³Na silanu ii tapa tung zongh ah amate minam khat a suak tu in ta tam mama ka pia tu hi. Ama zongh nangma tapa ahi hi,” ci hi.

¹⁴A zing ciang zingtuung in, Abraham in Hagar tungah an pawl khat le savun thawl khat dim tui pia hi. Ama in a tapa, a nu nungzaang ah suanhin paikhiasak hi. Hagar pai in Beersheba duisung tengah vak kawkoai hi.

¹⁵A tui ken teng a bo ciang ama in sawlpaang nuai khat ah a tapa nusia a,

¹⁶meter zakhat bang a khuala na mun khat ah tosuk hi. Ama le ama, “Ka tapa a thi ka en ngam buatu hi,” ci hi. Tualai ah to in kap hi.

¹⁷Pathian in patang kaana aw za hi. Pathian vantunglalang in vantung pan Hagar paupui a, “Hagar awng, bang in nang hong thinngimsak ziam? Lau heak in! Pathian in patang kaana aw za zo hi.

¹⁸Ding in, pai in a, ama la in va theam ta'n. Ama ii suan le paal sia minam lian khat ka suaksak tu hi,” ci hi.

¹⁹Tua zawkciang Pathian in Hagar mit vaaksak a, ama in tuikhuk khat mu hi. Ama pai in savun tuithawl sia dim a, pawlkhat tua patang pia hi.

²⁰Patang sia hong khangin Pathian in ompui hi; ama Paran dui sungah teang a, savai thiam khat suak hi.

²¹A nu in Egypt numei khat a zi tu in zonsak hi.

²²Tua hun in Abimelech sia a ngalkaphonpi ukpa Phicol taw Abraham kungah pai in, “Na nasepna theampo ah Pathian in hong ompui hi.

²³Tua ahikom keima, ka tate ahibuale, ka suan ka paalte kong theam buatu hi ci in hisung Pathian mai ah kiciamna khat vawt in. Nang tungah kong thumaan zo hi, tua ahiciang kei tung le na teenna hi ngam zong ah nong thumaan natu in kamciam hong pia ta'n,” ci hi.

²⁴Abraham in, “Kamciam kong pia hi,” ci hi.

²⁵Abimelech naseamte ii a sutol tuikhuk khat taw kisai, Abraham in a lungkim ngawlna thu Abimelech tungah son hi.

²⁶Abimelech in, “Akua in hong sut ziam, ka he bua hi. Nangma nong son bua a, tu a sia ka zaak ciilna hi,” ci hi.

²⁷Tuaciang Abraham in tuu le khui pawlkhat Abimelech pia in, amate nii in thukimna khat vawt uh hi.

²⁸Abraham in a tuuhon sung panin tuuno sali tuamkoi hi,

²⁹tuaciang Abimelech in ama tungah, “Banghang tuabang hi ni ziam?” ci in dongh hi.

³⁰Abraham in, “Hi tuuno salite hong sang ta'n. Hi bang nong saanna in hi tuikhuk a to sia keima ka hina thu nong pualaak na ahi hi” ci in zo hi.

³¹Tua ahikom in tua mun sia, Beersheba kici hi, banghang ziam cile amate nii tua munah kiciamna khat vawt uh hi.

³²Beersheba ah hi thukimna a vawt zawk uh ciang, Abimelech le Phicol, Philistia ah cia kik uh hi.

³³Tuaciang Abraham in Beersheba ah makeang kung khat suan a, Tawntung Pathian, TOPA bia hi.

³⁴Philistia ngam ah Abraham khuangei ma teang hi.