Read Siyin Chin Pianciilna 25 Bible Online

Pianciilna 25 - Siyin Chin bible

Pianciilna 25

¹Abraham in zi dang khat nei a, a min Keturah ahi hi.

²Ama taw ta Zimran, Jokshan, Medan, Midian, Ishbak le Shuah nei hi.

³Jokshan sia Sheba le Dedan ii pa hi a, Dedan ii suan le paalte sia Asshurim, Letushim le Leummim te ahi hi.

⁴Midian tapate sia Ephah, Epher, Hanoch, Abida le Eldaah ahi uh hi. Hite theampo sia Keturah ii suan le paalte ahi hi.

⁵Abraham in a neisa theampo Isaac nusiat hi.

⁶Ahizong ama nuntak sungin zi dangte taw a nei a tapate tungah letsongte pia hi. Tua zawkciang hi a tapate sia a tapa Isaac kung panin a khuala nisuana ngam ah paisak hi.

⁷Abraham sia kum 175 a phak ciang thi hi.

⁹A ta Isaac le Ishmael te in Mamre nisuana sangah a om, Hit mi Zohar ii tapa Ephron ii lo sung, Machpelah Suanghawng sungah ama phum uh hi.

¹⁰Tua lo sia Hit te tung pan Abraham ii a lei hi a; Abraham le a zi Sarah tua munah kiphum khawm hi.

¹¹Abraham thi zawkciang, “A Nungta Hong Mu Pa ii Tuikhuk” nai ah a teang a tapa Isaac sia Pathian in thupha pia hi.

¹²Abraham ii zi Sarah ii sila nu ahi, Egypt mi Hagar ii Abraham taw a nei Ishmael in

¹³amate ii suana taw kizui in a nuai a bang tapate nei hi: Nebaioth, Kedar, Adbeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Naphish le Kedemah ahi hi.

¹⁶Amate sia minam sawm le nii te ii taanghpupite hi a, amate minte la in khuanote le ngiaphual munte ii min in a kipia ahi hi.

¹⁷Ishmael sia kum 137 a phak ciang thi hi.

¹⁸Ishmael ii suan le paalte sia Egypt nisuana sang Assyria paina lampi, Havilah le Shur kilaklaw ah teang uh hi. Abraham suan le paal dangte taw kikhenin a tuamin teang uh hi.

¹⁹Hi teng sia Abraham ii tapa Isaac ii taanghthu ahi hi.

²⁰Isaac sia, Laban suapuinu, (Mesopotamia ngam Arameante) Bethuel tanu Rebecca taw a kiteen in kum sawmli pha hi.

²¹Rebecca in ta nei ngawl ahikom Isaac in TOPA tungah thungetsak hi. TOPA in ama thungetna zo a, Rebecca naupaai hi.

²²Ama in naupeang nei tu a, a sua ma in a naubu sungah amate khat le khat kihau hi. Ama in, “Banghangin kei tungah hi bang thu hong piang thong ziam?” ci hi. Tua ahiciang ama in TOPA kungah pai in, ahang dongh hi.

²³TOPA in ama ii tungah “Minam nii na sungah om a; A kidem minam niite nang sung pan piang tu hi. Khat sia a dang khat sangin hat zaw tu a; A u zaw in a nau zaw sia ii na sepsak tu hi,” ci hi.

²⁴A nau sua hun hong cing a, ama in tapa peang nei hi.

²⁵A suak masa sia a ci san a, a vun sia mul nei puantual taw kibang hi, tua ahikom a min Esau kiphuak hi.

²⁶A niina pa in Esau khuatul len cinten sa in hong suak ahikom ama min Jacob kiphuak hi. Amate a sua lai in Isaac kum sawmluk pha hi.

²⁷Tua patangte hong khang a, Esau sia ngamsung vak a uuk sakap thiam khat suak hi. Ahizong Jacob sia mihing cinghkamh khat hi a, inn ah om hi.

²⁸Isaac in Esau ii a samatte ii sa nene ahikom Esau diksa zaw a, ahizong Rebecca in Jacob diksa zaw hi.

²⁹Ni khat Jacob in be mee huanin a om laitak Esau a savaina pan hong theng hi. Ama a ngilkial a,

³⁰Jacob tungah, “Ngilkial in pukhong khi hi; na meetui san tawm hong pia ta'n,” ci hi. (Tua ahikom ama Edom kici hi.)

³¹Jacob in, “Tapaciil hina taw na nga na innluaza hong pia lete kong pia tu hi,” ci in zo hi.

³²Esau in, “Hi hen! A thi tu ka hi hi; tua ahiciang ka innluaza bang a mang tu khi ziam?” ci hi.

³³Jacob in, “Ka innluaza hong pia tu khi hi ci in kiciam masa in,” ci in zo hi. Esau kiciam in a taciil innluaza Jacob tungah pia hi.

³⁴Tuaciang Jacob in anluum pawlkhat le antui pawlkhat Esau pia hi. Esau in a an le antuite ne in, dawnin, tua zawkciang dingto in paisan hi. Esau in taciil a hina innluaza a awlmawk ngawlna sia tu a bang ahi hi.