Read Siyin Chin Pianciilna 26 Bible Online

Pianciilna 26 - Siyin Chin bible

Pianciilna 26

¹Abraham hun lai in kialpi masa a tun bek dom ngawlin tua ngam sungah kialpi dangkhat tung hi. Philistine kumpi Abimelech kung Gerar ah Isaac pai hi.

²Isaac kungah TOPA kilangh a, “Egypt ah pai heak in; om a kong sonna mun hi ngam sungah om po in.

³Hi lai ah teang in, nang taw kong omkhawm tu a, thupha kong pia tu hi. Nang le na suan na paalte tungah hi ngam theampo kong pia tu hi. Na pa Abraham tungah ka kamciam ka kholet tu hi.

⁴Na suan na paalte van ah aksi za in, ka tamsak tu a, amate tungah hi ngam theampo ka pia tu hi. Na suan na paalte thupha ka piak bangin leitung minam theampo in thupha ka piak natu kei tungah hong ngen tu uh hi.

⁵Abraham in ka thu ni a, ka thukhamte le ka thupiakte theampo kholet ahikom, nangma thupha kong pia tu hi,” ci hi.

⁶Tua ahiciang Isaac sia Gerar ah teang hi.

⁷Tua munah om mite in a zi taw kisai thu a dok ciang, ka suapuinu hi, ci hi. Ama in ka zi ci ngam ngawl hi, banghang ziam cile Rebecca sia a mealpha mama a, tua mite in Rebecca a nga nop manin, ama a thalup tu lau hi.

⁸Tualai ah Isaac tawmvei sung a om zawkciang Abimelech kumpipa in a khelki pan khua a etsuk le, Isaac le Rebecca a kino laitak mu hi.

⁹Abimelech in Isaac samsak a, “Rebecca sia na zi hi! Banghangin ka suapuinu hi ci ni ziam?” ci hi. Ama in, “Ama ka zi hi ci leng kei hong kithatlum tu ci in ka ngaisun hi,” ci in zo hi.

¹⁰Abimelech in, “Ko tungah banghang hi bang hong vawt ni ziam? Ka mite khat in olno takin na zi luppui thong le ko mawna sia nangma hang ahi hi,” ci hi.

¹¹Abimelech in mihingte theampo kidop natu thupia a: “Hisia pa ahizong, a zi ahizong a vawtsia peuma, kithatlum tu hi,” ci hi.

¹²Isaac in tua leitang ah thaicii poai a, tua kum in a thaicii poai za sangin a za zakhat in an a tamzaw la hi, banghang ziam cile TOPA in ama thupha pia hi.

¹³Ama nuamsa paisuak a, mihau mama khat suak hi.

¹⁴Banghang ziam cile ama in tuuhon, khuihon le naseam tam mama nei ahikom Philistine te in ama eang uh hi.

¹⁵Tua ahikom a pa Abraham nuntak lai a, a naseamte ii a tawsa tuikhuk theampo Philistine te in lei huk siat hi.

¹⁶Tuasia zawkciang Abimelech in Isaac tungah, “Ko ngam pan tai vun. Ko sangin thahat zaw zo nu hi,” ci hi.

¹⁷Tua ahiciang Isaac in tua mun nusia in Gerar Kuam ah ngiaphual saatin, tua munah tawmvei sung om hi.

¹⁸Abraham hun lai a, a taw, Abraham thi zawkciang Philistine te ii lei a huk siat tuikhukte ama in khatvei to kik hi. Tuate a pa ii min a phua sa bangin Isaac in min vaw hi.

¹⁹Isaac ii naseamte in tua kuam ah tuikhuk khat to in tui mu hi.

²⁰Gerar tuucingte in Isaac tuucingte taw kihau uh a, “Hi tui koma aa hi,” ci uh hi. Tua ahikom Isaac in tua tuikhuk, “Kihauna” ci in min phua hi.

²¹Isaac ii naseamte in tuikhuk dangkhat to a, kihauna om kik leleau ahikom ama in, “Kingal vawtna” ci in minphua hi.

²²Tua mun pan kiinin tuikhuk dangkhat to hi. Tua tungtaang ah kikamtamna om ngawl ahikom ama in, “Suatakna” ci in min phuak hi. Ama in, “Tu in hi leitang ah teen thei natu in, TOPA in suatakna hong pia zo ahiciang hi munah eite ih nuamsa tu hi,” ci hi.

²³Isaac in tua mun nusia in, Beersheba zuan hi.

²⁴Tua zanin TOPA ama tungah kilangh a, “Keima in na pa Abraham ii Pathian ka hi hi. Lau heak in; nang taw kong omkhawm hi. Nang thupha kong pia tu a, suan le paal tam mama kong pia tu hi, banghang ziam cile ka naseampa Abraham tungah ka kamciamna hang ahi hi,” ci hi.

²⁵Isaac in biaknatau khat tua munah vawtin TOPA bia hi. Tua zawkciang tualai ah a ngiaphual saatin, a naseamte in tuikhuk dang khat to hi.

²⁶Isaac taw kimu tu in Gerar pan Abimelech sia a thudokpa Ahuzzath le a ngalkaphonpi ukpa Phicol taw pai hi.

²⁷Tua ahikom Isaac in amate tungah, “Kei taw kisi tu in banghang hong pai nu ziam, tu masia in nong pawl vawt peuma bua a, na ngam pan hong not hi ngawl nu ziam?” ci in dongh hi.

²⁸Amate in, “Nang taw TOPA a om hunlam tu in ka he uh a, eite kilaklaw ah thukimna pha khat nei tu in ka ngaisun uh hi. Ko deina ah,

²⁹kote in nang kong natsak ngawl bangma in, nang zongh in kote nong natsak ngawl natuin kamciam nong piak natu ahi hi. Na tungah kong thuthiam uh a, nuam takin kong paisak uh hi. TOPA in nang thupha hong piak sia tu in kitelthiang hi,” ci in zo hi.

³⁰Isaac in amate atu in anneakpoai khat vawtsak a, amate anne in tuidawn uh hi.

³¹A zing ciang zingtuung in mi simin kiciamna nei a, kipsak uh hi. Isaac in amate mangpha thaakin pawl le lawm khat bangin kikhen uh hi.

³²Tua ni in, Isaac ii naseamte hong pai in amate tawsa, tuikhuk thu ama tungah son hi. Amate in, “Tui ka mu zo uh hi,” ci hi.

³³Ama in tuikhuk sia, “Kiciamna” ci in minphua hi. Tuabangin Beersheba khuapi in a min nga hi.

³⁴Esau kum sawmli a phak ciang, Hit te numei te nii Beeri ii tanu Judith le Elon ii tanu Basemath teenpui hi.

³⁵Amate in Isaac le Rebecca nuntak sung in thinngim pia uh hi.