Read Siyin Chin Pianciilna 27 Bible Online

Pianciilna 27 - Siyin Chin bible

Pianciilna 27

¹Tu in Isaac huai zo a, a mittaw hi. Ama in a ta uzaw Esau samin, “Ka tapa awng!” ci hi. A tapa in, “Hi ing” ci in zo hi.

²Isaac in, “Nong mu bangin kei huai zo a, thi pal tha tu khi hi.

³Na thal le thaltangte la in a, ngamvakin kei atu ngamsa khat hong kap ta'n.

⁴Ka du ngei anlim tawm hong huan ta'n a, hong paipui ta'n. Tuasia ka neak zawkciang, ka thi ma in, ka thupha khakbel nang kong pia tu hi,” ci hi.

⁵Isaac in Esau a paupui laitakin, Rebecca in ngai nginge hi. Tua ahikom Esau savai tu in a kuan ciang,

⁶Rebecca in Jacob tungah, “Na pa ii Esau tungah a son teng ka zaak zawk bek hi.

⁷‘Ngamsa khat hong ciapui ta'n a, hong huansak ta'n, tuasia ka neak zawkciang, ka thi ma in TOPA mai ah thupha kong pia tu hi,’ ci hi.

⁸Rebecca in a thuson zom a, “Tu in ka tapa awng, hong ngai ta'n a, kong ci bang seam in.

⁹Nganhon sungah pai in, kealno a thau nii hong man ta'n, tua hile na pa du mama ngei tua an sia kong huan thei tu hi.

¹⁰Tuasia a neak tu in na pa kungah na paipui thei tu a, a thi ma in a thupha nang hong pia tu hi,” ci hi.

¹¹Ahizong Jacob in a nu tungah, “Na heak bangma Esau in mul hau a, ahizong kei ka vun neal hi.

¹²Ka pa in hong tham luilam thong le, ama ka theamna hong tel tu hi; hi bangin keima tungah thupha luangin haamsiatna ka thengsak zaw tu hi,” ci hi.

¹³A nu in, “Ka tapa awng, nang tungah haamsiatna khat pawpo sia kei tungah hong tung tahen; kong ci bangin ngamta in; va pai ta'n a, keima atu in kealte hong paipui ta'n,” ci in zo hi.

¹⁴Tua ahiciang kealte man tu in pai a, a nu kung then hi, tuaciang a nu in a pa du bangin huansak hi.

¹⁵Tua zawkciang ama in inn sungah a kep Esau ii puan phabelte la in, Jacob silhsak hi.

¹⁶Ama in, kealvunte a baan tung le a ngawng mul om ngawlna teng ah koisak hi.

¹⁷Ama ii huan anlim le anluumte a tapa khut ah aap hi.

¹⁸Tuaciang Jacob sia a pa kungah pai in, “Pa!” ci hi. A pa in, “Hi ing, ka tapate akua hi zaw ni ziam?” ci in zo hi.

¹⁹Jacob in, “Keima in na tapa u zaw Esau khi hi; nong sawl bangin vawt zo khi hi. Hesuakna taw hong to ta'n a, na thupha nong piak thei natu in, sa pawlkhat kong paipui sia ne in,” ci in zo hi.

²⁰Isaac in, “Ka tapa awng, hi bang manlang takin bangbang nga thei ni ziam?” ci hi. Jacob in, “TOPA na Pathian in ka nga natu hong hu hi,” ci in zo hi.

²¹Isaac in Jacob tungah, “Hesuakna taw kong tham thei tu in hong neak lai ta'n. Nang Esau ma hi takpi ni ziam?” ci hi.

²²Jacob sia a pa nai hong neak zaw hi, a pa in tham a, “Na aw ahile Jacob awsua taw kibang a, ahizong na baan sia Esau baan tham taw kibang hi” ci hi.

²³A pa in Jacob a hina tel zo ngawl hi, banghang ziam cile Esau baan bangma in baanmul nei hi. A thuphate ama pia tu ahihang,

²⁴“Nang Esau ma hi takpi ni ziam?” ci in dongh kik hi. Ama in, “Hi khi hi,” ci in zo hi.

²⁵Isaac in, “Na sa huan tawm hong paipui ta'n. Ka neak zawkciang ka thupha hong pia tu khi hi,” ci hi. Jacob in a pa kungah a sa huan paipui in, a neak tu in sapittui zongh paipui hi.

²⁶Tuasia ciang a pa in ama tungah, “Ka tapa awng, hong neak ta'n a, hong namh ta'n,” ci hi.

²⁷Ama in a pa namh tu hong pai le, a pa in a puan ngimnam za a — tua ahiciang ama thupha pia hi. Ama in, “Ka tapa ngimnamtui sia TOPA ii thupha a piaksa lo khat ii ngim taw kibang hi.

²⁸Pathian in na tungah vantung daaitui hong pia hen a, na lote lei phasak tahen! An le sapittui tam mama hong pia tahen!

²⁹Minamte na naseam suakin mihingte na mai ah kun tahen. Na beete theampo uk in, na nu suan le paalte na mai ah kun tahen. Nang hong haamsiatte haamsiatna thuak hen a, nang thupha hong piate thupha nga tahen,” ci hi.

³⁰Isaac in thupha pia siat zo a, Jacob ii a nusiat zawk po ciang, a suapuipa Esau a savaina panin theng hi.

³¹Ama zongh in anlim pawl khat huan a, a pa kungah paipui hi. Ama in, “Pa awng, hesuakna taw hong to ta'n a, na thupha kei nong piak thei natu in na tapa ii kong paipui sate ne in,” ci hi.

³²Isaac in, “Nang akua ni ziam?” ci in dongh hi. Ama in, “Na tapa u zaw Esau khi hi,” ci in zo hi.

³³Tuaciang Isaac a ci liing ngawpin, a pumpi bup ngawk a, ama in, “Tua ahile, ngamsa khat kaplumin kei kungah hong paipui sia akua ziam? Nang nong thet mahiat in ka ne hi. Ama tungah ka thupha khakbel ka pia zo a, tua ahikom a tawntungin ama aa hi zo hi,” ci hi.

³⁴Esau sia hi thu a zaak ciang, nging takin kapngawp a, “Pa awng, kei zongh na thupha hong pia ta'n!” ci hi.

³⁵Isaac in, “Na suapuipa hong pai in kei hong theam hi. Ama in na thupha hong laaksak zo hi,” ci in zo hi.

³⁶Esau in, “Tu a sia kei hong theam a nii veina hi. A min Jacob ahi sia lamdang ngawl hi. Ama in ka taciil innluaza la zo a, tu in ka thupha hong laksak leleau hi. Kei atu in thupha khat khe ngawl ni ziam?” ci hi.

³⁷Isaac in, “Ama sia nangma to ka suaksak zo a, a beete theampo a ma sila te ka hisak zo hi. An le sapittui ama ka pia zo hi. Ka tapa awng, tu in nang atu kong vawtsak thei tu, bangma om nawn ngawl hi!” ci in zo hi.

³⁸Esau in a pa tungah ngen veve lai a: “Pa awng, thupha khat bek ma nei ni ziam? Kei zongh thupha hong pia ta'n, Pa awng!” ci in ama kap hi.

³⁹Tuaciang Isaac in ama tungah “Nang atu vantung pan daaitui om ngawl a, Nang atu a leipha lote om ngawl hi.

⁴⁰Na namsau suangin na nungta tu a, Ahizong na suapuipa ii sila na hi tu hi Ahihang ama na leedo ciangin ama ii ukna panin na peng tu hi,” ci hi.

⁴¹Esau in Jacob ngaimaw hi, banghang ziam cile a pa in a thupha Jacob pia zo hi. Ama in “Ka pa thina hangin khuangai tu hun hong nai zo hi: tuasia zawkciang Jacob ka that tu hi,” ci in ngaisun hi.

⁴²Ahizong, Esau ii sawmna thu Rebecca in a zaak ciang Jacob sam a, ama in “Ngai in, na suapuipa Esau in nang thatlumin phulaak hong sawm hi.

⁴³Tu in ka tapa awng, kong ci bangin ngamta in. Haran ah a teang ka suapuipa Laban kungah thakhatin tai zawzok ta'n,

⁴⁴na suapuipa thin uuk thai dong tawmvei sung Laban taw omkhawm ta'n,

⁴⁵tua hile ama tungah na vawtnate mangil tu hi. Tuasia ciang mihing khat po sawlin nang kong samsak kik tu hi. Banghangin ka tate nii, ni khat thu in khuai tu khi ziam?” ci hi.

⁴⁶Rebecca in Isaac tungah, “Esau ii ngamdang zite hangin cimtakin ka nat law hi. Jacob zongh Hit te numei khat taw kiteang thong le, thi law liang tu khi hi,” ci hi.