Read Siyin Chin Pianciilna 28 Bible Online

Pianciilna 28 - Siyin Chin bible

Pianciilna 28

¹Isaac in Jacob samin a nukset zawkciang, “Canaan numei peuma teenpui heak in.

²Tua sangin Mesopotamia ngam na pupi Bethuel inn ah pai in, na pu Laban tanute khat teenpui in.

³Minam tam te ii pa na sua natu in Vaanglianbelpa Pathian in na mopoai ah thupha hong pia hen a, ta tam mama hong pia tahen!

⁴Pathian in, Abraham thupha a piak bangin nang le na suan na paalte thupha hong pia tahen a, Abraham tungah a piak, na teenna leitang sia nang neisa hisak tahen!” ci hi.

⁵Isaac in Laban teenna Mesopotamia ah Jacob paisak a, Laban sia Arameante Bethuel tapa hi a, Jacob le Esau te ii nu, Rebecca suapuipa ahi hi.

⁶Isaac in Jacob thupha pia a, Mesopotamia ah zi zong tu in a paisakna thu Esau in he hi. Isaac in Jacob thupha a piak ciang Canaan numeite a teenpui ngawl natu in a thupiak zongh ama in he hi.

⁷Jacob in a nu le a pa thu ni in Mesopotamia ah a paina thu Esau in tel hi.

⁸Tua zawkciang Esau in a pa Isaac ii Canaan numeite a lungkim ngawlna thu tel hi.

⁹Tua ahiciang ama in Abraham tapa Ishmael kungah pai in a tanu Mahalath, Nebaioth ii suapuinu teenpui hi.

¹⁰Jacob in Beersheba nusia in Haran sang zuan hi.

¹¹Nitum ciang mun thiangtho khat theng a, tua munah ngiaphual saat hi. Ama mu tu in, suang khat khamhin lumsuk hi.

¹²Ama in mangman a, keallei khat leitung pan vantung dong kidawto in, vantunglalangte tua keallei ah a tuaksuk a kaato mu hi.

¹³Tuaciang ama kungah TOPA ding hi. Ama in, “Keima in Abraham le Isaac te ii Pathian, TOPA ka hi hi. Nang le na suan na paalte tungah na lupna hi leitang kong pia tu hi.

¹⁴Amate leitung ah leivui za in tam tu hi. Amate in mun theampo ah ngamkeak tu uh a, nang le na suan na paalte tungtawnin minamte theampo thupha ka pia tu hi.

¹⁵Ciamtee ta'n, na paina po ah nang taw om in, kong dal tu a, hi leitang ah kong thet pui kik tu hi. Kong kamciamsa teng ka vawt siat mateng in, nang kong nusia buatu hi,” ci hi.

¹⁶Jacob khanglo in, “TOPA hi sungah om hi! Ama hi munah om hi, keima in hi thu ka he bua hi,” ci hi.

¹⁷Ama lau in, “Hi mun bangza in lauhuai ziam! Hi sia Pathian inn hi nanak tu hi; hi mun in vantung tum natu kongpi hi nanak tu hi,” ci hi.

¹⁸A zing ciang zingtuungin Jacob tho a, a suang lukham la in khansuang khat in phut hi. Tua zawkciang ama in khansuang sia olive thau buakin Pathian tungah aap hi.

¹⁹Ama in tua mun sia Bethel ci hi. (Nidangin tuak ah om khua sia Luz kici hi.)

²⁰Tua zawkciang Jacob in Pathian tungah kiciamna khat vawt a: “Nangma in kei taw nong om a, ka khualhawna ah hong dalin, an le puan nong pia a,

²¹tuaciang ciidam in ka pa inn ah ka cia kik le, tuasia ciang nangma in ka Pathian na hi tu hi.

²²Hi khansuang ka phuna sia nangma hong kibiakna mun hi tu hi, tuaciang nong piak theampo sung pan sawm a khat, nang kong pia tu hi,” ci hi.