Read Siyin Chin Pianciilna 29 Bible Online

Pianciilna 29 - Siyin Chin bible

Pianciilna 29

¹Jacob sia a pai natu mun nisuana ngam sang manaw in paisuak hi.

²Thakhatin lo sungah a om tuikhuk khat kung theng a, tuikhuk paam ah tuuhon, hon thum lum hi. Ngannote in hi tuikhuk pan tui ne hi, tuikhuk sitna suangtum sia lian mama hi.

³Tualai ah tuuhonte hong thet hon ciang tuucingte in tua suang liikin, tuute tui pia hi. Tua zawkciang amate in a omna ngei ah tua suang koi kik hi.

⁴Jacob in tuucingte tungah, “Ka lawmte awng, koisung pan nu ziam?” ci in dongh hi. Amate in, “Haran pan hi ung,” ci in zo hi.

⁵Ama in, “Nahor ii tapa Laban na he uh ziam?” ci in dongh hi. Amate in, “He khu hi,” ci in zo hi.

⁶Ama in, “Ama a ciidam ziam?” ci in dongh hi. Amate in, “Ama a ciidam hi. En in, a tanu Rachel zongh a tuuhonte taw hi sungah hong pai hi,” ci in zo hi.

⁷Jacob in, “Ni sang lai a, ngan hawl hun ngawl lai ahikom, tuute tui pia in tha kik ngawl tu nu ziam?” ci hi.

⁸Amate in, “Tuuhon theampo hi lai ah om siat in, suangtum a kiliik kik mateng ngan ka tha thei buatu uh hi; tua zawkciang tuuhonte tui ka pia tu uh hi,” ci in zo hi.

⁹Jacob sia amate taw kipaupui in a om laitak, Rachel, tuuhon taw hong theng hi.

¹⁰Jacob in a pu Laban tuuhon le Rachel a mu ciang tuikhuk ah pai in, suangtum liik in, tuute tui pia hi.

¹¹Tua zawkciang Jacob in ama namh a, lungdamin kap hi.

¹²Ama in Rachel tungah, “Keima in Rebecca ii tapa, na pa ii mealheak ka hi hi,” ci hi. Ama sia a pa tungah thu ko tu in tai hi;

¹³Laban in a tupa Jacob ii thu a zaak ciang ama muak tu in tai a, koai in namh a, inn ah ciapui hi. Jacob in thupiang theampo Laban tungah a son zawkciang,

¹⁴Laban in, “Hi hi, nangma in keima chi le sa na hi tatak hi,” ci hi. Tualai ah Jacob tha khat bup taam hi.

¹⁵Laban in Jacob tungah, “Nangma sia ka mealheak na hi manpo in, a thongin ka na nong sepsak buatu hi. Thasum bangza dei tu ni ziam?” ci hi.

¹⁶Laban in ta numei nii nei a; a unu min Leah hi in, a naunu min Rachel ahi hi.

¹⁷Leah sia a mit haa ngaibaang a, Rachel ahile a khan pha in a mealhoi hi.

¹⁸Jacob sia Rachel taw ki it ahikom a pu tungah, “Rachel taw nong kiteangsak tu ahile, kum sali sung noma na kong sepsak tu hi,” ci hi.

¹⁹Laban in, “Midang khat po ka piak sangin ama nang kong pia nuam zaw hi; hilai kei kungah hong om ta'n,” ci in zo hi.

²⁰Jacob in Rachel a nga thei natu in kum sali sung naseam a, ama a itna hangin tua hunte ni tawmno taw kibang sa hi.

²¹Tuaciang, Jacob in Laban tungah, “Ih hun cing hi; na tanu taw hong teangsak ta'n,” ci hi.

²²Tua ahiciang Laban in mopoai vawtsakin ngual theampo sam hi.

²³Ahizong tua zanin a pu in Jacob tungah Rachel taangin Leah pia a, Jacob in Leah luppui hi. (

²⁴Laban in ama ii silanu Zilpah, a tanu Leah tungah a naseam tu in pia hi.)

²⁵A zingsang ciang Leah a hina thu Jacob in he pheang hi. Ama in Laban kungah pai in, “Banghangin hi bang hong vawt thong ni ziam? Rachel nga nuam in hong thalaw hi ngawl khi ziam? Banghangin kei hong theam ni ziam?,” ci hi.

²⁶Laban in, “A u kan in a nau pasal a nei tu sia ko ngeina hi ngawl hi.

²⁷Nipi khat sung mopoai vawt hun ngak phot in a, tuaciang a dang kum sali sung ka na nong sepsak lai tu ahile, Rachel kong pia tu hi,” ci in zo hi.

²⁸Jacob lungkim a, nipi khat sung mopoai hun a bo ciang, Laban in a tanu Rachel, Jacob zi tu in pia hi. (

²⁹Laban in a sila nu Bilhah sia a tanu Rachel tungah a naseam tu in pia hi.)

³⁰Jacob in Rachel zongh luppui a, ama in Leah sang Rachel it zaw hi. Tuasia ciang ama in a dang kum sali sung Laban atu naseam thua lai hi.

³¹Rachel sangin Leah a it ngawl zawkna thu TOPA in a heak ciang, Leah sia ta nei thei tu in siam a, ahizong Rachel sia ta neisak ngawl lai hi.

³²Leah ngai in tapa khat nei hi. Ama in, “Ka thinngimna TOPA in hong mu a, tu in ka pasal in hong it tu hi,” ci a, tua ahiciang a min Reuben phuak hi.

³³Ama ngai kik a, tapa dang khat nei hi. Ama in, “Kei hong ki it ngawlna thu TOPA in za zo ahikom TOPA in hi tapa zongh kei hong pia zo hi,” ci a tua ahiciang a min Simeon phuak hi.

³⁴Khatvei ma ama ngai kik a, tapa dang khat nei hi. Ama in, “Tu in ka pasal in kei hong kholet zaw tu hi, banghang ziam cile tapa thum ka neisak zo hi,” ci a, tua ahiciang a min Levi phuak hi.

³⁵Tuaciang Leah hong ngai kik a, tapa dang khat nei hi. Ama in, “Tu hile TOPA ka pok tu hi,” ci a, tua ahiciang a min Judah phuak hi. Tuasia ciang ama ta tawp hi.