Read Siyin Chin Pianciilna 30 Bible Online

Pianciilna 30 - Siyin Chin bible

Pianciilna 30

¹Ahihang Rachel in Jacob taw ta khat zongh nei ngawl hi, tua ahikom ama in a suapuinu Leah eangin Jacob tungah, “Ta hong pia tan tua ahibuale ka thi tu hi,” ci hi.

²Rachel tungah Jacob thin uuk a, “Pathian dinmun ka la thei buatu hi. Ta nei tu hong khak pa sia ama hi,” ci hi.

³Ama in, “Hi lai ah, ka silanu Bilhah om hi; ama taw lumkhawm lete kei atu in ta nei thei tu hi. Hi bangin kei sia ama tungtawnin nu khat ka suak thei tu hi,” ci hi.

⁴Tua ahiciang ama in a pasal tungah Bilhah pia a, a pasal in ama ompui hi.

⁵Bilhah ngai in Jacob taw tapa khat nei hi.

⁶Rachel in, “Pathian in thukhen a, maipha hong pia hi. Ama in ka thungetna hong za in tapa khat hong pia hi,” ci a, tua ahiciang a min Dan phuak hi.

⁷Bilhah ngai kikin, Jacob taw tapa a niina nei hi.

⁸Rachel in, “Haksa takin ka suapuinu ka do a, ahizong keima in ka zo zo hi,” ci a tua ahiciang a min Naphtali phuak hi.

⁹Leah in a tatawp hunlam a kiheak ciang, a sila nu Zilpah sia Jacob ii zi tu in pia hi.

¹⁰Tuasia ciang Zilpah in Jacob taw tapa khat nei hi.

¹¹Leah in, “Ka kaampha zo hi,” ci a, tua ahiciang a min Gad phuak hi.

¹²Zilpah in Jacob taw tapa dang khat nei hi.

¹³Leah in, “Bangza in ka lungdam ziam! Tu in, numeite in a lungdam nu hong ci tu hi,” ci a, tua ahiciang a min Asher phuak hi.

¹⁴Zungtaang laak hun laitakin Reuben sia lo sungah pai a, mandrake ai ngate [3] mu in a nu Leah puak hi. Rachel in Leah tungah, “Hesuakna taw na tapa ii mandrake ai ngate tawm hong pia ta'n,” ci hi.

¹⁵Leah in, “Ka pasal nong laaksak sia pha zo ngawl ziam? Tu in ka tapa ii mandrake ai ngate ngawngawn laaksak nong sawm lai hi,” ci in zo hi. Rachel in, “Na tapa ii mandrake ai ngate nong pia le, tu zan Jacob taw lumkhawm thei tu ni hi,” ci hi.

¹⁶Nitakin lo pan Jacob hong cia ciang, Jacob taw kimu tu in Leah pai a, “Tu zan kei kung hong lum tu ni hi, banghang ziam cile ka tapa ii mandrake ai ngate taw nang kong thapsa hi,” ci hi. Tua ahikom tua zanin Jacob le Leah omkhawm hi.

¹⁷Pathian in Leah ii thungetna zo a, ama ngai in Jacob taw tapa a ngana nei hi.

¹⁸Leah in, “Ka silanu ka pasal pia ka hikom Pathian in keima thaman hong pia zo hi,” ci a, tua ahiciang a tapa min Issachar phuak hi.

¹⁹Leah ngai kik a, Jacob taw tapa a lukna nei hi.

²⁰Ama in, “Pathian in letsong pha khat hong pia zo hi. Tu in ka pasal in kei hong saang tu hi, banghang ziam cile ama atu in tapa luk ka neisak zo hi,” ci a, tua ahiciang a min Zebulun phuak hi.

²¹Tua zawkin ta numei khat nei a, ama in a min Dinah phuak hi.

²²Tua zawkciang Pathian in Rachel phawk hi; ama ii thungetna zo in, ta nei thei tu in siam hi.

²³Rachel ngai in tapa khat nei hi. Ama in, “Pathian in tapa khat hong piakna taw ka maizumna teng bosak zo hi.

²⁴TOPA in tapa dang khat hong pia lai tahen,” ci a, tua ahiciang a min Joseph phuak hi.

²⁵Joseph a sua zawkciang Jacob in Laban tungah, “Ka inn ah a cia kik tu in hong paisak ta'n.

²⁶Nang atu naseamin kong thalawsa ka zite le ka tate hong pia ta'n, cia tu khi hi. Pha takpi na kong sepsak na he hi,” ci hi.

²⁷Laban in ama tungah, “Thu hong son tong: TOPA in nang hangin kei thupha hong piak hunlam mukholna nei in, ka he zo hi.

²⁸Na thaman hong son lete kong pia tu hi,” ci hi.

²⁹Jacob in, “Na na kong sepsakna thu le keima sep sungin na nganhonte a pun mama na thu na he hi.

³⁰Kei kong thet ma in nganno tawm bek na nei hi, tu in tam mama in khang hi. Ka va ka ciana po ah TOPA in nang thupha hong pia zo hi. Tu in keima phattuam natu ka ngaisut tu hun zo hi,” ci in zo hi.

³¹Laban in, “Bang hong pia tu khi ziam?” ci in dongh hi. Jacob in, “Thaman bangma dei bong. Hi ka ngaisutna bang na thukim le na nganhonte ka cing lai tu hi:

³²Tuni in na nganhon theampo sungah hong paisak ta'n a, tuu a vom teng, kealno a ngial teng ahibuale a pawl teng hong theisak ta'n. Tua teng ka thaman tu in dei khi hi.

³³Ka thumaanna sia mai sangah ol takin hong mu thei tu ni hi. Ka thamante sit tu in nong pai ciang kealte sung pan a pawl ngawl, a ngial ngawl khat, tuute sung pan a vom ngawl khat pawpo ka nei le ka nguk ahi hunlam he tu ni hi,” ci in zo hi.

³⁴Laban in, “Thukim ing. Nangma ci bangin ih vawt tu hi,” ci in zo hi.

³⁵Ahizong tua ni in Laban in kealtal a ngial, a pawl teng le kealnu a ngial, a pawl ahibuale a kaang kihel teng khenkhia hi; tuu vom teng zongh khentuam hi. Ama in, tua teng a tapate kep tu in koi a,

³⁶tua zawkciang, Jacob kung pan ni thum paina munah hi nganhon teng paipui hi. Jacob in Laban ii nganno a taanglai teng keam hi.

³⁷Jacob in hiang, thuangthi le pakngiam kungte pan a baak hingte saatin, a haw tawm ngiam a, a pawlin vawtin, a kaang ngialte kimusak hi.

³⁸Ama in tua thingbaakte sia nganhonte ii mai, a tui neakna kuangte ii kungah koisak hi. Ama in tua munah thingbaak pawlte banghangin koi ziam cile ngannote tui ne tu in hong pai ciang a nu le a pa omkhopna mun ahihang hi.

³⁹Tua ahikom, kealte tua thingbaak pawlte mai ah omkhawm a, no a nei uh ciang a ngial, a pawl veu piang uh hi.

⁴⁰Jacob in tuute le kealte khenin tuam koi a, Laban ii nganno a ngial le a vom honte omna sang maingatsak hi. Hi bangin ama in a ngannote pungtosakin Laban ii ngannote taw kihelsak ngawl hi.

⁴¹Nganno ciidamte tua thingbaakte sungah a omkhop ciang, a no a pawlte a nei thei natu in thingbaak pawlte sia a maingatna uh tuikuang kungah Jacob in koi hi.

⁴²Ahizong ama in tua thingbaakte sia nganno thazawmte mai ah koi ngawl hi. Hai ngawlin nganno thazawm teng Laban neisa suak a, nganno ciidam teng Jacob neisa suak hi.

⁴³Hi bangin Jacob sia a hau mama suak hi. Ama in nganhonte, silate, kalaohte le laate tam mama nei hi.