Read Siyin Chin Pianciilna 31 Bible Online

Pianciilna 31 - Siyin Chin bible

Pianciilna 31

¹Laban tapate in, “Ih pa ii neisa theampo Jacob in la siat hi. A hauna theampo sia ih pa ii neisa tungtawnin a nga hi,” a cina thu Jacob in za hi.

²Nidang bang a Laban ii a pawlvawt nawn ngawlna thu zongh Jacob in mu hi.

³Tuasia ciang, TOPA in ama tungah, “Na beete kung le na pate ii ngam le lei zuan kik in. Nang taw kong omkhawm tu hi,” ci hi.

⁴Tua ahikom Jacob in a tuute omna lo sungah ama taw kimu tu in, Rachel le Leah kam vaitha hi.

⁵Ama in a zite tungah, “Na pa ii nidang lai hong pawlvawt ngei bang ahi nawn ngawlna thu ka he hi; ahizong ka pa ii Pathian in kei hong ompui hi.

⁶Ka tha neiza taw na pa ii na ka sep sia na heak uh hi.

⁷Ahizong ama in kei hong theamin ka thamante sawmvei hong khealsak zo hi. Ka tungah siatna hong vawt tu sia Pathian in oai ngawl hi.

⁸Laban in, ‘Keal a pawl iim-iam teng na thaman tu hi,’ hong ci ciang nganno theampo a pawl iim-iam in piang hi. Ama in, ‘Keal a ngial teng na thaman tu hi,’ hong ci ciang nganno theampo a ngialin piang hi.

⁹Pathian in na pa kung pan ngannote la a, kei hong pia hi.

¹⁰“Ngannote a ta nei tu hunin, mang khat ka man a kealpuite sia kealtal a ngial, a pawl te taw omkhawmin ka mu hi.

¹¹Pathian vantunglalang in ka mang sungah hong paupui in, ‘Jacob!’ hong ci a, ‘Om khi hi,’ ci in ka zo hi.

¹²Tuaciang ama in, ‘En in’ kealpuite a ompui kealtalte sia a ngial, a pawl vive hi. Hi bang a piang tu in, keima vawt hi, banghang ziam cile nang tungah Laban ii hong vawtna teng ka mu zo hi.

¹³Keima in Bethel ah nang tung a hong kilangh Pathian ka hi hi, tua munah nong phaw tawntung natu khansuang phutin olive thau na buak a, aapna nei in kei tungah kiciamna khat na vawt hi. Tu in kithoai in a, na pianna ngam le lei zuan kik in’ hong ci hi,” ci hi.

¹⁴Rachel le Leah in Jacob tungah, “Ka pa uh kung pan ka lua tu bangma taang nawn ngawl hi.

¹⁵Ama in ko sia ngamdangmite bangin hong vawt hi. Ama in ko hong zuak a, hong kileina sum teng zongh zangh siat zo hi.

¹⁶Ka pa uh kung pan Pathian ii a laak sa hi nei le lamh theampo sia ko le ka tate aa ahi hi. Pathian hong sawl pawpo seam in,” ci in zo uh hi.

¹⁷Tua ahiciang Jacob sia Canaan ngam a pa kung zuan kik tu in kithoai hi. Ama in a tate le a zite, kalaohte tungah tosak hi, Mesopotamia ngam pan a nga na theampo taw a nganno theampo a mai ah hawl hi.

¹⁸

¹⁹Laban sia a tuute mul meet tu in pai a, ama om ngawl lanin Rachel in a pa ii neisa innkuan pathian milimte nguksak hi.

²⁰Jacob in Laban theam a, a cia natu vai hesak ngawl hi.

²¹Ama in a neisa theampo la in paisan vingveng hi. Ama in Eupharates ngun kaantan in, Gilead mualtung ngam sang manaw hi.

²²Jacob taina thu ni thum zawkciang Laban tungah kison hi.

²³Ama in a mite samin a mite taw Gilead ngam mual tungah Jacob a phak dong ni sali sung del uh hi.

²⁴Tua zanin Laban mang sungah Pathian kilangh in Laban tungah “Bangbang po ahizong Jacob na lauthawn ngawl natu in kidawm ta'n,” ci hi.

²⁵Jacob sia mual tungah ngiaphual saat a, Laban sia a mipuite taw Gilead mualtung ngam sungah ngiaphual saat hi.

²⁶Laban in Jacob tungah, “Banghangin hong theam a, ngal sungah ngalmat numeite bangin ka tanute taipui ni ziam?

²⁷Kei hong theam a, kei hong son ngawlin banghang ngelku ni ziam? Hong son hi lete lungdam in lasa a, daalkual khuangnote, tengtongh tumin hong tha tu khu hi.

²⁸Ka tute le ka tanute mangpha thaakin, nong namhsak beak bua hi. Tua in a mawmawthuai ngamtatna ahi hi!

²⁹Nang kong vawtsiat thei natu in tha nei khi hi, ahizong tu zanin na pa ii Pathian in bangbang po ahizong nang kong lauthawn ngawl natu in kidop tu thu hong pia hi.

³⁰Hi bang nong nusiat sia na inn na thet kik tu thintoi mama na hina kong he hi, ahizong ka innkuan pathian milimte banghang ngu nu ziam?” ci hi.

³¹Jacob in, “Kei kung pan na tanute nong lee kik tu ka lau hang hi.

³²Ahizong na pathian milimte hi sung khat pawpo tungah na mu le ama kithatlum tu hi. Hi lai ah ih mite sia ih tetti tu hi, zong in a, nangma neisa pawpo la in,” ci in zo hi. Laban ii pathian milimte Rachel nguk hunlam Jacob in he ngawl hi.

³³Laban pai in, Jacob puanbuk sung zong hi; tua zawkciang Leah puanbuk sung le sila numei niite puanbuk sung teng zong a, ahizong a pathian milimte mu ngawl hi. Tuasia ciang Rachel puanbuk sungah pai hi.

³⁴Rachel in innkuan milimte ngu a, kalaoh tung tona ip sungah koi in topha hi. Laban in buk sung bup zong a, ahizong mu ngawl hi.

³⁵Rachel in a pa tungah, “Na mai ah hong ding thei ngawl ka hikom topa awng, thin uuk heak in; numei ngeina ka nei laitak hi,” ci hi. Laban in zong a, ahihang a innkuan milimte mu ngawl hi.

³⁶Tuaciang Jacob a thin uuk hi. “A bang khialna lian vawt khi ziam?” ci a, thin uuk tatakin dongh hi. “A bang thukham ka palsat hu in, bang thu nga a, hong zuizen thei ni ziam?

³⁷Tu in ka vanh nei theampo tok siat zo ni hi, na neisa na innkuan vanh bang mu ni ziam? Tuasia, hi lai ah na mite le ka mite mu thei tu in hong pusua ta'n, akua maan hi ziam, thukhensak tawng.

³⁸Nangma kungah tu in kum kul sung kong om a; na tuu le na kealte a ciing om ngawl hi, tuaciang na nganhonte sung pan tuutal khat pawpo ka ne bua hi.

³⁹Ngamsate in tuu khat hong matsak simin keima supna vive hi. Kei khialna hi ngawl hi, ci sia a lak tu in na kungah kong paipui ngei bua hi. Sun ahizong zan ahizong a kingute peuma, a taang nong ngen hi.

⁴⁰Tamvei tatak sun nisa le zan khuadap ka thuak hi. Ka mu thei bua hi.

⁴¹Tuabangin kum kul sung tawntung nang kungah kong om hi. Kum sawm le kum li sung na tanute nii — kum luk sung na ngannote ka nga natu in na ka seam hi. Tua zawk ngawngawn in ka thaman sawmvei nong kheal hi.

⁴²Ka pate ii Pathian, Abraham le Isaac ii Pathian in kei taw omkhawm buathong le khut hawm nguakin nong hawlkhia zo tu hi. Ahizong Pathian in ka thinngimna le ka nasepna te mu zo a, tu zanin nang tungah thukhenna hong pia hi.”

⁴³Laban in Jacob tungah, “Hi numeite sia ka tanute hi; a tate keima neisa hi, nganhonte keima neisa hi. A tatakin ci leang hi sungah na mu theampo keima neisa hi. Ahizong ka tanute le a tate ka kep natu in bangma ka vawt thei tu om ngawl ahikom

⁴⁴nang taw thukimna khat vawt tu in ka kinging hi. Ih thukimna phaw kik natu in suangtumte ciang tawng,” ci in zo hi.

⁴⁵Tua ahiciang Jacob in suangtum khat la a phaw kik natu khansuang in phut hi.

⁴⁶Jacob in a mite suang pawlkhat khawmsak in ciangto hi. Tuaciang a suang cianna hui ah amate an ne uh hi.

⁴⁷Laban in Jegar Sahadutha ci in min vaw ahihang Jacob in Galeed ci in min pia hi.

⁴⁸Laban in Jacob tungah, “Hi ih suangcian sia nang le kei atu in phawk sakna hi tu hi,” ci hi. Tua ahiciang tua mun sia Galeed kina hi.

⁴⁹Laban zongh in, “Eite khat le khat ih kikhen hangin TOPA in ei hong mitsuan tahen,” ci hi. Tua ahikom tua mun zongh Mizpah ci in min phuak hi.

⁵⁰Laban in, “Ka tanute na vawtsia a, ahibuale numei dang na teenpui le kei kong he bua zong TOPA in eite hong en nginge ci in, ciamtee ta'n.

⁵¹Hi lai ah ka suang ciante ih kilaklaw ah om hi, hi sungah phawna khansuang om hi.

⁵²Hi suangcian le phawna khansuangte ngeal in ih kiciamnate hong phawksak kikte ahi hi. Nangma hong sim tu in hi suangcian kong kaantan ngei buatu a, nangma zongh in keima hong sim tu in hi suangcian ahibuale hi phawna khansuang nong kaantan ngei buatu hi.

⁵³Abraham ii Pathian le Nahor ii Pathian in eite kilaklaw ah thukhen tu hi,” ci lai hi. Tua zawkciang Jacob in a pa Isaac ii biak Pathian min taw hi kamciamna keamcing tu in ciliap huai takin kiciam hi.

⁵⁴Ama in ngan khat ngo a, mual tungah sangaw biakpiakna pia in, an ne tu in a mite sam hi. Amate an a neak zawkciang mual tungah zankhuateak om uh hi.

⁵⁵A zing ciang zingtuung in, Laban in a tute le a tanumeite namhin mangpha thaak a, tuaciang nusia in a inn ah cia hi.