Read Siyin Chin Pianciilna 33 Bible Online

Pianciilna 33 - Siyin Chin bible

Pianciilna 33

¹Jacob in, Esau le a mi zali hong pai a mu ciang ama in a tate teng sia Leah, Rachel le a zinote nii kawmah khenin koi hi.

²Ama in a zinote le a tate teng masasak a, tua zawkciang Leah le a tate, a khakbel in Rachel le Joseph tonsak hi.

³Jacob sia amate mai ah pai a, a suapuipa kung a thet tu ciang salivei lei ah kun hi.

⁴Ahizong Esau sia ama muak tu in hong tai a, ama koai in namh hi. Amate kap khawm hi.

⁵Esau in a kiim a paam a et ciang numeite le patangte mu a, “Nang taw a om hi mihingte a kuate ziam?” ci in dongh hi. Jacob in, “Hite sia Pathian ii a phatna hangin keima hong piak ka tate hi topa awng,” ci in zo hi.

⁶Tua zawkciang a zinote le a tate teng pai in kun hi;

⁷tua zawkciang Leah le a tate teng pai in kun a, a khakbel in Joseph le Rachel pai in kun uh hi.

⁸Esau in, “Ka kisik puisa pawldang sia bangbangziam? Bang cinopna ahi ziam?” ci in dongh hi. Jacob in, “Tuate sia na mai kong etna hi,” ci in zo hi.

⁹Ahizong Esau in, “A kicing nei ing, suapui awng, na nei teng keam po ta'n,” ci hi.

¹⁰Jacob in, “Hi ngawl hi, hesuakna taw, na maipha a nga ka hile ka letsong hong saang ta'n. Tu in kei hong pawlvawt mama zo na hikom na maitang kong mu sia, Pathian maitang mu bang ka hi hi.

¹¹Nang atu kong ken hi letsong sia hesuakna taw hong saang ta'n; Pathian in kei tungah hong thuthiam a, ka taangsap theampo hong pia hi,” ci hi. A saan mateng Jacob in sonpui top hi.

¹²Esau in, “Kithoai vun a, pai tek tawng. Na mai ah kei pai tu khi hi,” ci hi.

¹³Jacob in, “Patangte thazawm a, tuute, ngannote le a note atu ka ngaisut a kul sia na he hi. Amate hawlngawp thong leng ni khat sung ngawngawn zong thi siat tu hi.

¹⁴Hesuakna taw paikhol ta'n, ngannote le patangte pai zawk babangin Edom ah kong phak dong dadam in kong zui tu uh hi,” ci in zo hi.

¹⁵Esau in, “Tua ahile ka mite pawlkhat nang taw ton tu in hong nusiat tong,” ci hi. Ahizong Jacob in, “Tuabang kisamh bo, na maipha ka nga tu uuk bek khi hi,” ci in zo hi.

¹⁶Tua ahiciang Esau sia, Edom ah cia kik tu in tua ni in kipan hi.

¹⁷Ahizong Jacob in Sukkoth ah pai a, tua munah ama atu inn khat le ngannote atu thaampheangte sa hi. Tua ahikom tua mun sia Sukkoth kici hi.

¹⁸Jacob sia Mesopotamia pan hong heak kik ciang Canaan ngam Shechem khuapi ciidam takin hong theng a, tua khuapi hui lo khat sungah ngiaphual saat hi.

¹⁹Ama in Shechem ii pa Hamor suan le paalte tung pan tua lo ii khen khat sia ngunntang zakhat taw lei hi.

²⁰Ama in tua munah biaknatau khat ciang in, a min El, Israel ii Pathian, ci in phuak hi.