Read Siyin Chin Pianciilna 34 Bible Online

Pianciilna 34 - Siyin Chin bible

Pianciilna 34

¹Ni khat ni in Jacob le Leah te ii tanu Dinah sia Canaan numei pawlkhat kungah haw tu in pai hi.

²Tua ngam ukpi, Hiv te Hamor ii tapa Shechem in ama a mu ciang manin buanin khialpui hi.

³Ama in tua numei sia deihuai mama sa a, it ahikom tua nu ii a it natu in zongh hanciam hi.

⁴Ama in a pa tungah, “Hi numei ka zi tu in hong puisak ta'n,” ci hi.

⁵Jacob in a tanu Dinah ii minsiatna thu za ahihang a tapate duisung ah ngan cingin om ahikom amate hong cia mateng bangma vawt ngawl hi.

⁶Shechem ii pa Hamor sia Jacob taw thu son tu in a pai le,

⁷Jacob ii tapate duisung pan hong cia taw kisi hi. Amate in a thu teng a zaak ciangin Shechem ii hi bang tengin ngamta a, Jacob ii tanu a buanna taw in Israel mite a zawnsak manin thuak zo ngawl a, amate thin uuk ngawp uh hi.

⁸Hamor in Jacob tungah, “Ka tapa Shechem sia na tanu taw ki it zo hi; nong hesuakna in kiteangsak tawng.

⁹Ko mite le no mite kiteen natu in thukimna khat ih vawt tu hi.

¹⁰Tuasia ciang ko ngam hi sungah ko taw nong om thei tu uh a; na teen nopna mun po ah teangin, na uuk bangin sum vawtin, nei le lamh na heang thei tu uh hi,” ci hi.

¹¹Tua zawkciang Shechem in Dinah ii pa le a suapuipate tungah, “Kei maipha hong pia tavun, na dei pawpo kong pia tu hi.

¹²Bang letsong teng dei nu ziam hong son tavun; mo man tu na deiza po hong ngen tavun; hong kiteangsak tu hi pole uhte nong nget zaza kong pia tu uh hi,” ci hi.

¹³Shechem in, a suapuinu uh Dinah min siasak zo ahikom Jacob ii tapate in Shechem le a pa Hamor kam a zona ah theambawl uh hi.

¹⁴Amate in Shechem tungah, “Vunteap at ngawl khat tungah ka suapuinu kong teangsak thei buatu uh hi; hong teangsak hi le ung ko atu in min siatna khat hi tu hi.

¹⁵Koma taw na kiban natu uh in, pa theampo vunteap na at uh ciang bekin thukim thei tu khu hi.

¹⁶Tua zawkciang tuabang a kiteen tu thukim tu khu hi. Note sungah kong teang tu uh a, ci khat sa khat ih suak tu hi.

¹⁷Ahizong ko ii ci teng hong saang ngawlin vunteap na at nuam bua uh le, ka suapuinu la in ka ciapui tu uh hi,” ci hi.

¹⁸Hamor le a tapa Shechem in hi thu teng pha tuak sa a,

¹⁹tangvalpa in hai ngawlin a ci bangin a vunteap at paih hi, banghang ziam cile Jacob ii tanu a dei hang ahi hi. Shechem sia amate innkuan sungah a thupibel ahi hi.

²⁰Hamor le a tapa Shechem in taangpi kikhopna khuapi kongpi ah pai a, a khuapuite tungah thu a sonna panin:

²¹“Hi mite sia ih lawmte hi a, ih ngam sungah eima taw teang khawmin a ukna po ah paisak tawng. Ih ngam zongh lian a, amate atu taw in kicing lel hi. A tanute ih teenpui tu a, ei a te zongh ih pia tu hi.

²²Ahihang hi mihingte ei sungah hong teen tu a thukim thei natu le eima taw ci khat sa khat a sua natu in amate vunteap a ki at bangin ei, pa a minpiang vunteap ih at kulsak hi.

²³A nganno teng le a neisa dang theampo ei aa hi lel tu ngawl ziam? Tua ahiciang thukim in amate ei sungah teangsak tawng,” ci hi.

²⁴Hamor le Shechem ii son thu teng a khuapuite theampo in lungkim pui a, pa theampo vunteap ki at siat hi.

²⁵Ni thum zawkciang amate vunteap atna meima nat saanin a om laitak, Jacob tapa teng sung pan niite, Dinah ii suapuipate ahi Simeon le Levi te in a namsau tek la in, muanmawk khol ngawlin khuapi sungah tum a, pasal theampo thatlum siat uh hi,

²⁶Hamor le a tapa Shechem zongh kihel hi. Tua zawkciang Shechem inn pan Dinah la in ciapui uh hi.

²⁷Tuabang a thalup zawkciang Jacob tapa dangte in, a suapuinu a kiminsiatsak huvau in a phula tu in a khua phuul uh hi.

²⁸Amate in a tuuhonte, a khuite, a laate, khua sung le lo sung a om na theampo laaksak siat uh hi.

²⁹Amate in na manpha theampo la in, numei patang theampo man a, inn sung vanh theampo pua in ciapui uh hi.

³⁰Jacob in Simeon le Levi tungah, “Kei thinngim haksatna sungah hong then zo nu hi; tu in Canaan te, Periz te le mi dang theampo in kei hong ngaimaw tu hi. Kei la mihing tam nei ngawl a; amate teng kikop in kei hong sim thong le ih innkuan bup in hong mon tu uh hi,” ci hi.

³¹Ahizong amate in, “Ka suapuinu uh sia pumpi kizuak khat bangin a kivawt tu sia suaksak thei mama ngawl khu hi,” ci in zo uh hi.