Read Siyin Chin Pianciilna 37 Bible Online

Pianciilna 37 - Siyin Chin bible

Pianciilna 37

¹Jacob sia a pa teenna ngei Canaan ngam ah teang suak hi,

²hisia sia Jacob innkuan taanghthu ahi hi. Joseph sia tangvalno kum sawm le kum sali pha a, a pa zinote ahi Bilhah le Zilpah ii tapate taw tuu le kealte cing khawm hi. Ama in a suapuite ngamtat siatna teng a pa tungah ko hi.

³Jacob in a tapa dang teng sangin Joseph it zaw hi, banghang ziam cile a huai zawkciang a nei tapa ahi hi. Ama in puantual baansau khat Joseph atu in khuisak hi.

⁴A pa in amate sang in Joseph a it zawkna thu a suapuite in a mu uh ciang a suapuipa ngaimaw mama a, pha takin paupui ngawl hi.

⁵Zan khat Joseph in mang khat man a, tua a mangmat teng a suapuipate tungah a son ciang amate in ngaimaw seseam uh hi.

⁶Ama in, “Ka mangmat sia hong ngai tavun.

⁷Ei teng lo sungah zungtaang vawngte sawm in ih om a, keima taangvawng hong tho in dingtang hi. Keima taangvawng sia noma taangvawngte in kiim uumin a kun uh hi,” ci hi.

⁸A suapuipate in ama tungah, “Nang kumpi khat suakin kote hong uk tu in kingaisun ni ziam?” ci in dongh uh hi. Ama ii mangmatte hu le a thuson teng hu in amate in ngaimaw seseam uh hi.

⁹Tuasia zawkciang Joseph in mang dangkhat man leleau in a suapuipate tungah, “Mang dangkhat ka man a, tua ka mang sungah ni, tha le aksi sawm le khat te in keima hong kunsuk ka mu hi,” ci in son hi.

¹⁰Ama in a pa tungah zongh a mang son a, a pa in: “Tuasia bangbang mang hi thong ziam? Na nu, na suapuipate le kei, na mai ah pai in hong kun tu in ngaisun ni ziam?” ci in teih hi.

¹¹Joseph ii suapuipate in ama eang uh hi, ahizong a pa in hi thute theampo a thinsung ah ngaisun nginge hi.

¹²Ni khat ni in Joseph ii suapuipate a pa tuuhon cing tu in Shechem ah a pai zawkciang,

¹³Jacob in Joseph tungah, “Na suapuite tuu cinna Shechem ah pai lete kong oai hi,” ci hi. Joseph in, “Kithoai zo ing,” ci in zo hi.

¹⁴A pa in ama tungah, “Va pai ta'n a, na suapuite a ngammuang na ziam, a nganhonte a dam na ziam va en ta'n; tua zawkciang hong cia kikin hong son ta'n,” ci hi. Tua ahikom a pa in Hebron Kuam pan pai tu in ama sawl hi. Joseph sia Shechem theng a,

¹⁵ngam sungah a va kawkoai sia pasal khat in a mu ciang, “Bang zong ni ziam?” ci in dongh hi.

¹⁶Ama in “A tuuhon a cing ka suapuite ka zong hi. Amate omna mun nong son thei tu ziam?,” ci in zo hi.

¹⁷Tua pa in, “Amate hi mun nusia zo hi. Dothan ah ka pai tu uh hi, a ci ka za hi,” ci hi. Tua ahiciang Joseph in a suapuite nungzui in Dothan ah amate mu hi.

¹⁸Amate in a ngal khat ah Joseph mu a, amate kung a thet ma in, Joseph thalup tu in vaihawm a thukhensat uh hi.

¹⁹Amate khat le khat, “Hi sungah mangmanpa hong pai hi.

²⁰Tu in hong pai tavun, ama thatin tuikhuk kang sa khat sungah a luang vawk tawng. Ngamsa khat in ama petlum hi, ih ci thei hi. Tuasia ciang a mangmatte bang a suak ziam ih en tu hi,” kici uh hi.

²¹Reuben in a thuson teng a zaak ciang Joseph a suatak natu hanciam hi. Reuben in, “Joseph that bua tawng,

²²duisung ah a om hi tuikhuk sungah ama khia vun ahizong ama liamsua heak vun,” ci hi. Ama suatakin a pa kungah puak kik nuam ahikom ama in tubangin a ci ahi hi.

²³A suapuite kungah Joseph hong thet ciang ama silh lai a puantual baansau laaikeaksak uh hi.

²⁴Tuaciang amate in Joseph manin tuikhuk kang sa sungah khia uh hi.

²⁵An a neak laitak Gilead pan Egypt ah khual a haw Ishmael te honkhat thakhat thu in mu uh hi. A kalaohte sia hel namtui le thingnaai te puasak uh hi.

²⁶Judah in a suapuite tungah, “Ih suapuipa that a tua thu ih ip hu in a bang meetna nga tu hi ziam?

²⁷Hi Ishmael te tungah zuak heu tawng. Tuabang hi leang ama bangma law kul ngawl tu hi; tua bek dom ngawlin ama sia ih suapuipa hi a, eima chi le sa tatak ahi hi,” ci hi. A suapuite zongh lungkim a,

²⁸Midian te sum vawt pawlkhat hong thet nai ciang a suapuite in Joseph tuikhuk sung pan kaito kikin, Ishmael te tungah ngunn dangka kul taw zuak a, amate in Egypt ah paipui uh hi.

²⁹Reuben hong theng kik a, tuikhuk sungah Joseph a mu ngawl ciang khuangai in a puan balkeak hi.

³⁰A suapuite kungah ama heak kikin, “Tangvalpa om ngawl hi! Bang law tu khi ziam?” ci hi.

³¹Tuaciang amate in keal khat ngo a, tua chi sungah Joseph puantual pap hi.

³²Amate in tua puan la a ciapui in a pa tungah, “Hi puan mu ung. Na tapa puan ahi ziam?” ci uh hi.

³³A pa in tua puan tel a, “Hi hi, ama puan hi! Ngamsa khat in thatlum zo hi. Ka tapa Joseph kibalneen zo hi!” ci hi.

³⁴Jacob khuangai in a puan balkeak a, khau-ip puan silh hi. A tapa hangin khuangai a ngei hialma kaikut hi.

³⁵A tapate le a tanute theampo in ama heeneam tu in hong pai hi, ahizong heenep tu nuam ngawlin, “Mithi khua ah ka tapa atu khuangai sa in ka paisuk tu hi,” ci hi. Tua ahiciang a tapa Joseph hangin ama khuangai top hi.

³⁶Tua hun sungin Egypt ngam ah Midian te in Joseph sia Potiphar tungah zuak uh hi, ama sia kumpipa ii ulian khat hi a, kumpi inncing ngalkap hon ukpa ahi hi.