Read Siyin Chin Pianciilna 39 Bible Online

Pianciilna 39 - Siyin Chin bible

Pianciilna 39

¹Ishmael mite in Egypt ah Joseph paipui a, kumpipa ii uliante sung pan khat ahi, kumpi inncing ngalkap bupa Potiphar tungah zuak hi.

²TOPA in Joseph panpui a, nasep zosak hi. Ama sia Egypt mi a topa inn ah teang a,

³TOPA in Joseph panpui ahikom a nasepna theampo ah a zawsakna thu a topa in mu hi.

⁴Ama tungah Potiphar lungkim a, ama aituam naseam tu in koi hi; tua ahikom a inn le a neisa theampo uksak hi.

⁵Tua hun a kipan Joseph hangin Egypt mi Potiphar te innkuan, a inn sung le a lo sungah a neisa theampo TOPA in thupha pia hi.

⁶Potiphar in a na theampo Joseph et tu in aap siat a, a anneak tu ngawl buang bangma dang thinbot in nei ngawl hi. Joseph sia a khanpha in a mealhoi a,

⁷tawmvei zawkciang a topa zi in Joseph lungngul in luppui tu in kunh hi.

⁸Ama in nial a, “En in, hi sungah keima om ka hikom ka topa in inn sungah bangma thintoi ngawl hi. A neisa theampo ka et tu in hong aap siat hi.

⁹Hi inn sungah ama taw kibangin a thu neiza ma ka nei a, nangma simngawl buang kei atu in khaam hong nei ngawl hi. Tua ahiciang hi bang ngamtat pha ngawl vawtin Pathian tungah maw thei tu khi ziam?” ci hi.

¹⁰A topa zi in Joseph luppui tu ni khat zawk ni khat in kunh hi napi ama in luppui nuam ngawl hi.

¹¹Ahizong ni khat ni in Joseph sia inn sungah ama ii na seam tu in a tum ciang tualai ah inn naseamte kuama om ngawl hi.

¹²A tonu in Joseph puantual pan man a, “Kei taw lumkhawm tawng,” ci hi. Ahizong a tonu khut sungah a puantual nusiat a, suakta in a pua sangah tai hi.

¹³A tonu in a puantual nusia in inn pan a tai a mu ciang,

¹⁴ama in a inn naseamte samin, “Hi sia en vun! Ka pasal ii inn ah hong ciapui, hi Hebrew sia pa in ei hong zawnsak vawt hi. Ama ka inndoi sungah hong tum a, buanin khialpui tu in hong kipan hi, ahizong a nging theiza in ka cik-au hi.

¹⁵Ama in ka cik-au a zaak ciang a puantual kei kungah nusia in doipua ah tai hi,” ci hi.

¹⁶Joseph ii topa, inn ah hong cia dong ama in Joseph puantual keam hi.

¹⁷Tuaciang a pasal tungah ama in thupiang a son ngei teng ma son a: “Hi lai ah nong ciapui Hebrew sila pa in ka inndoi sungah tumin, kei hong zawnsak vawt hi.

¹⁸Ahizong ka cik-au ciang a puantual ka kungah nusia in doipua ah tai hi,” ci hi.

¹⁹Joseph ii topa a thin uuk mama a,

²⁰Joseph mansak in kumpipa ii thongtaakte a koina thong sungah khum hi.

²¹Ahihang thong ukpa ii Joseph tungah a lungkim natu in TOPA in Joseph panpui a, thupha pia hi.

²²Ama in Joseph sia thongtaak dang theampo uk tu in koi a, thong sungah nasep theampo vaipuak neisak hi.

²³Joseph ii nasepnate thong ukpa ii et kik kul ngawl hi, banghang ziam cile TOPA in Joseph panpui a, a nasepna theampo zosak hi.