Read Siyin Chin Pianciilna 4 Bible Online

Pianciilna 4 - Siyin Chin bible

Pianciilna 4

¹Tuaciang Adam in a zi ompui a, a zi naupaai hi. Ama in tapa khat nei a, “TOPA huna taw tapa khat ka nei hi,” ci hi. Tua ahikom ama in a min Cain phuak hi.

²Nungsang ciang tapa khat nei kik a, Abel ahi hi. Abel sia tuucingpa khat suak a, ahizong Cain sia lothopa khat ahi hi.

³Hun khat zawkciang Cain in a lo sung pan a piang ante hong paipui a, TOPA tungah biakpiakna pia hi.

⁴Tuaciang Abel in a tuute khat pan a suak a taciil sia ngoin a sa limci belna teng taw biakpiakna pia hi. Abel biakpiakna tungah TOPA lungkim hi,

⁵ahizong ama in Cain le a biakpiakna nial hi. Cain sia a thin uuk mama a, lungkim ngawlin a mainguum hi.

⁶Tuaciang TOPA in Cain tungah, “Banghang thin uuk ni ziam? Banghang na mai nguumsak ni ziam?

⁷A maan seam na hile na maitai tu a, ahizong a sia na vawt hu in, mawna in na innkha ah bok nginge hi. Tua in nang hong uk nuam a, ahizong nangma in tuasia na zaw kul tu hi,” ci hi.

⁸Tuaciang Cain in a suapuipa Abel tungah, “Dui sungah pai tawng,” ci hi. Amate dui sung a thet ciang Cain in a suapuipa ngalvawtin thatlum hi.

⁹TOPA in Cain tungah, “Na suapuipa Abel koi sungah om ziam?” ci in dongh hi. Cain in, “He ngawl khi hi. Ka suapuipa a cingpa hi na khi ziam?” ci in zo hi.

¹⁰Tuasia ciang TOPA in, “Banghangin hi bang a, a sia mama na seam thong ni ziam? Phula nuam a, a au aw khat bangin na suapuipa chisan in lei pan kei hong biakpui hi.

¹¹Nang sia haamsiat thuakpa na hi a, leitangh tho thei nawn ngawl tu ni hi. Na thalup lai in na naupa chisan dong tu in a kamkaa sa bang keakin tua lei in na naupa chisan huup zo hi.

¹²An ciin tu na hanciam zong lei pan bangma piang ngawl tu a, inn nei ngawlin leitung ah na vakthap tu hi,” ci hi.

¹³Tuaciang Cain in TOPA tungah, “Hi daanpiakna sia kei thuak tu in haksa leih hi.

¹⁴Ka omna ngam pan nong hawlkhia a, nong ompuina pan a khualana ah nong notkeak hi. Inn nei ngawlin leitung ah a vakthap ka hi tu a, hong mu po in kei hong that tu hi,” ci hi.

¹⁵Ahizong TOPA in, “Hi ngawl hi. Khat po in nang hong that le phu kilamna in nuntakna sali kila tu hi,” ci in zo hi. Tua ahikom a kisik pui khat po in a thalup ngawl natu in, Cain tungah TOPA in tepteena khat koi hi.

¹⁶Tuaciang TOPA omna panin Cain paikhia a, Eden ii nisuana sang “Vakkot” a kicina ngam le lei ah teang hi.

¹⁷Cain le a zi in tapa khat nei a, a min Enoch phuak hi. Tuasia ciang Cain in khuapi khat saat a, a min tu in a tapa min vaw in Enoch ci hi.

¹⁸Enoch in tapa khat nei a, a min Irad ci hi, Irad sia Mehujael ii pa hi a, Mehujael in tapa Methushael nei a, ama sia Lamech ii pa ahi hi.

¹⁹Lamech in zi nii nei a, Adah le Zillah ahi hi.

²⁰Adah in ta Jabal nei a, ama sia puanbuk sungah a teang ngankhoaite ii taanghpupi ahi hi.

²¹A suapuipa sia Jubal hi a, ama sia tengtongh le tamngai a tum thei, music thiamte theampo ii taanghpupi ahi hi.

²²Zillah in Tubal Cain nei a, ama in thik le taau panin nazak namcin vawt hi. Tubal Cain ii suapuinu sia Naamah ahi hi.

²³Lamech in a zite tungah, “Adah le Zillah awng, hong ngai tavun: tangvalno khat thatlum zo khi hi, banghang ziam cile ama in kei hong vua hi.

²⁴Cain kithalup manin a nuntakna sali taw kithuk kik ahile, kei hong thatlum a om le a sawmsali le salivei in kithuk kik tu hi,” ci hi.

²⁵Adam le a zi in tapa dang khat nei hi. A zi in, “Cain ii a thalup Abel taang tu in, Pathian in tapa khat hong pia hi,” ci hi. Tua ahikom a min Seth phuak hi.

²⁶Seth in Enosh kici tapa khat nei hi. Tua hun panin mihingte in biakpiakna ah TOPA ii min thiangtho law kipan uh hi.