Read Siyin Chin Pianciilna 40 Bible Online

Pianciilna 40 - Siyin Chin bible

Pianciilna 40

¹Tua zawk hun khat ciangin Egypt kumpipa ii sapittui piapa le anluum empipa in kumpipa thin uuksak hi.

²Hi naseam ulian niite tungah kumpipa thin uuk in,

³Joseph kikhumna mun, kumpi inncing ngalkap bupa inn sungah thongtaaksak hi.

⁴Amate khuangeipi ma thong sungah om a, tua ngalkap bupa in Joseph sia amate naseamin koi hi.

⁵Zan khat tua thong sungah sapittui piapa le anluum empipa in mang khat veve man a, a mangte in khiakna tuam tetek nei hi.

⁶Zingsang in amate kungah Joseph a pai ciang thinngim a, a om sia mu hi.

⁷Joseph in amate tungah “Banghangin tuni in na thin uh ngim tuak mama ziam?” ci in dongh hi.

⁸Amate in, “Mang khat veve ka man uh a, tua mangte ii khiakna hong son thei tu hi sungah kuama dang om ngawl hi,” ci in zo hi. Joseph in, “Mang khiak theina hong pia sia Pathian hi, na mang uh hong son tavun,” ci hi.

⁹Tuasia ciang sapittui piapa in, “Ka mang sungah sapitkung khat ka mai ah om a,

¹⁰tua tungah sapitbaak thum om hi. A teete a meen po ciang hong mom in sapitngate min hi.

¹¹Kumpipa hai ka toai a; sapitngate ka lo a, hai sungah suukin ama ka pia hi,” ci hi.

¹²Joseph in, “A khiakna hi bang hi: sapitbaak thum sia ni thum hi.

¹³Ni thum sungin kumpipa in nang hong suatak tu a, hong maisakin na nasep ngei hong pia kik tu hi. Ama sapittui piapa na hi lai a, na sep ngei bangma in a hai na pia tu hi.

¹⁴Ahizong na dau a pai ciang nong hesuakna in kei hong phawk kik ta'n a, hi thongsung pan ka suatak thei natu in kumpipa tungah ka thu teng hesuakna taw hong sonsak ta'n.

¹⁵A tatakin ci leang Hebrew ngam panin kei hong kiman hi a, hi lai Egypt ngam zongh ah thong sung hong kikhum natu in bangma ka vawt bua hi” ci hi.

¹⁶Anluum empipa in sapittui piapa ii mang a khiakna sia thupha hi ci in a mu ciang ama in Joseph tungah, “Kei zongh mang khat man khi hi; anluum law thum thuapin ka lu tungah ka pua hi.

¹⁷A tungbel law sungah kumpipa atu in moh namcin om a, vacimte in tuate ne uh hi,” ci hi.

¹⁸Joseph in, “A khiakna hi bang hi: law thumte sia ni thum ahi hi.

¹⁹Ni thum sungin kumpipa in nang hong pusua tu a, — tuaciang na ngawng hong tan tu hi! Tua zawkciang ama in na luang khuam khat tungah hong khai tu a, vacimte in na sa ne tu uh hi,” ci in zo hi.

²⁰Ni thum zawkciang kumpipa suani in, ama in a uliante theampo atu in poai khat khaam a; sapittui piapa le anluum empipa sia ama in tha in, a uliante mai ah paipui hi.

²¹Ama in sapittui piapa sia a nasep ngei ma pia kik a,

²²ahizong anluum empipa sia thatlum hi. Joseph son bang tatakin hi teng theampo piang siat hi.

²³Ahizong sapittui piapa in Joseph phawk ngei nawn ngawl hi — ama ii thu theampo mangil cip hi.