Read Siyin Chin Pianciilna 41 Bible Online

Pianciilna 41 - Siyin Chin bible

Pianciilna 41

¹Tua zawk kum nii zawkciang Egypt kumpipa in mang man a, a mang sungah Nile ngunhui ah ding a,

²Nile ngun sung panin khuipui a thau, a zol sali pusuak to in, lopa ne tu kipan uh hi.

³Tua zawkciang a ngawm, a ngu nguak a om khuipui salite pusuak to hi. Tua teng hong pai a, Nile ngunhui a khuipui dangte kungah dingin,

⁴a ngawm khuipui salite in a thau khuipui salite netum uh hi. Tuasia ciang kumpipa khanglo hi.

⁵Ama mu kikin mang dang khat man hi. A hui bup taknei in a min, taanghui sali sia kung khat tung pan hui hi.

⁶Tuaciang senneal vui in theapsak in a ngeau singseng taanghui dang sali hong po hi,

⁷a theap taanghui teng in a tak nei taanghui teng valhtum hi. Kumpipa khanglo a, mang maman ahi sia tel hi.

⁸A zingsang ciang ama thinngim ahikom mitbum thiamte le Egypt mipil miciim theampo samsak hi. Ama in amate tungah a mang teng son a, ahizong kuama in a mang khiaksak thei ngawl hi.

⁹Tuasia ciang sapittui pia pa in kumpipa tungah, “Tuni in ka khialna kong pualaak kul hi.

¹⁰Kei le anluum empipa tungah na thin uuk a, kumpi inncing ngalkap bupa inn sung thong sungah nong khum hi.

¹¹Zan khat ka nii in mang khat veve ka man uh a, ka mangte uh in khiakna tuatuam nei hi.

¹²Tua munah kumpi inncing ngalkap bupa ii silapa, Hebrew tangvalno khat kote taw omkhawm hi. Ama tungah koma mangte ka son uh ciang a khiakna hong son hi.

¹³Ama son bang tatakin piang a: kei sia ka nasep nong pia kik a, ahizong anluum empipa sia na thatlum hi,” ci hi.

¹⁴Kumpipa in Joseph samsak a, thong sung pan thakhat ma in hong kipaipui hi. Joseph a mul meet thiangin, a puante a laih zawkciang kumpipa omna ah pai hi.

¹⁵Kumpipa in ama tungah, “Mang khat ka man a, kuama in a khiakna hong son thei ngawl hi, nang sia mangkhia thei ci in hong kison hi,” ci hi.

¹⁶Joseph in, “Kumpipa awng, kei hi thei hi ngawl hi, ahizong Pathian in mang khiakna maan hong son tu hi,” ci in zo hi.

¹⁷Kumpipa in, “Ka mang sungah Nile ngunhui ah ka ding a,

¹⁸limci in a thau khuipui sali, ngun sung pan hong pusuak to a, lohingte ne tu in kipan hi.

¹⁹Tua zawkciang a ngawm a ngu nguak a om a dang khuipui sali hong pusuak to hi. Tuate sia Egypt ngam sungah ka mu ngei khuipui zawngkhal belte ahi hi.

²⁰Khuipui ngawmte in khuipui thaute netum a,

²¹ahizong kuama in a neak hunlam he ngawl tu hi, banghang ziam cile amate sia nidang bangma in ngawm veve hi. Tuasia ciang ka khanglo hi.

²²Mang ka man kik a, taangkung khat tung pan a hui bup taknei in a min taanghui salite ka mu hi.

²³Tuaciang senneal vui in theapsakin a ngeau singseng taanghui sali hong po a,

²⁴tuaciang a theap taanghuite in a taknei taanghuite valhtum hi. Mitbum thiamte tungah ka mang ka son a, ahizong amate khat zongh in ka mang khiakna hong son thei ngawl hi,” ci hi.

²⁵Joseph in kumpipa tungah, “Na mangte nii ii a khiakna sia kibang hi; Pathian in a sep tu teng nang tungah hong son zo hi.

²⁶Khuipui thau salite sia kum sali hi a, taanghui a taknei salite zongh kum sali ma hi; a khiakna kibang hi.

²⁷A khak sang a hong pusuak khuipui ngawm sali le senneal vui ii a ngeausak singseng taanghui theap salite sia kialpi kum sali ahi hi.

²⁸Tuasia kong sonsa bangma hi — Pathian in a sep tu teng nang tungah hong lak zo hi.

²⁹Egypt ngamsung theampo ah kum sali sung an kihau mama tu hi.

³⁰Tua zawkciang kum sali sung kialpi tungin an hau hun kum teng kimangil cip tu hi, banghang ziam cile kialpi in ngam lalsak tu hi.

³¹An hau hun teng kimangil bit tu hi, banghang ziam cile hong zui tu kialpi sia lauhuai mama tu hi.

³²Mang nii a kipee in na matna sia Pathian in hi thu kipsak zo a, hai ngawlin tungsak tu cinopna ahi hi.

³³“Tu in mipil miciim thuhe pasal khat teal in a, ngam uk tu in koi in.

³⁴A dang vaihawm uliante ngam sungah koi kul a, kum sali an hau hun sungin lo ante ii see nga sua see khat la khol in.

³⁵Thu pia in a, hong tung tu kumphate sungah an theampo kaikhawmsak in, tuaciang amate thuneina taw khuapite sungah an kholin a, cingsak in.

³⁶Hi ante sia Egypt ngam ah hong tung tu kialpi kum sali sungah ngam sungah zeak tu in, a kikhol kholsa suak tu hi. Hi bang vaihawmna taw mihingte pukthi ngawl tu hi,” ci hi.

³⁷Kumpipa le a uliante in hi vaihawmna lungkim a,

³⁸kumpipa in amate tungah, “Joseph sangin a phazaw mi ih mu ngei buatu hi, ama sia a sungah Pathian thaa a nei mihing khat ahi hi,” ci hi.

³⁹Kumpipa in Joseph tungah, “Pathian in nang tungah hite theampo hong lak zo hi, tua ahikom nang saang a, a ciim zaw le thu thuk mu zaw kuama dang om ngawl ahi sia kilangh hi.

⁴⁰Ka ngam ukpa tu in nang kong koi tu a, nangma thupiakte ka mihingte theampo in zui tu hi. Nangma thuneina tungsia ah keima bek ka om tu hi.

⁴¹Tu in Egypt ngamsung theampo a ukpa tu in panmun kong pia hi,” ci hi.

⁴²Kumpipa in a min tupna khutzungbu, a khutme pan suutin Joseph khutme ah bunsak hi. Ama in puantual neal a pha khat silhsakin a ngawng ah khamh khi khat awsak hi.

⁴³A to natu in kumpi siphu ngalleang niina sia pia a, ama a cing ngalkapte a mai ah pai in, “Lam na awn vun! Lam na awn vun!” ci in ausak hi. Tuabangin Joseph sia Egypt ngamsung theampo a ukpa in panmun pia hi.

⁴⁴Kumpipa in ama tungah, “Keima in kumpi ka hi hi — nangma oaina om ngawlin Egypt ngamsung theampo ah kuama in a khut a peang ngawngawn laam thei ngawl tu hi,” ci hi.

⁴⁵Ama in Joseph sia Zaphenath Paneah ci in Egypt min thak pia a, a zi tu in Heliopolis khua thiampi khat ahi Potiphera ii tanu Asenath pia hi. Joseph sia Egypt kumpipa na a sep kipatin kum sawmthum pha hi. Ama sia kumpi zum nusia in ngamsung theampo ah khualhaw kawkoai hi.

⁴⁶

⁴⁷An hau hun kum sali sung in leitang pan an tam mama piang a,

⁴⁸tua teng theampo Joseph in kaikhawmin khuapi tengah kholsak hi. Ama in khua kiim a lote panin a piang ante sia a khuapi tek ah khol hi.

⁴⁹A ankholte sia tamlei ahikom Joseph in sim vanglak ngawlin, tee nawn ngawl hi — tua teng sia tuipi vaal senvui taw kibang hi.

⁵⁰Kialpi kumte hong tun ma in Joseph in Asenath taw tapa nii nei hi.

⁵¹Ama in, “Pathian in ka thuakna theampo le ka pa innkuanpui theampo hong mangilsak hi,” ci hi. Tua ahikom a tapa masa min Manasseh phuak hi.

⁵²Ama in, “Ka ngim thuakna munah Pathian in tate hong pia hi,” ci ahikom a tapa niina ii min sia Ephraim phuak hi.

⁵³An hau in Egypt ii nopsakna hun kum salite hong bo a,

⁵⁴Joseph sonsa bangin kum sali kialpi kipan hi. Ngamdang theampo ah kialpi tung a, ahizong Egypt ngamsung teng ah an om hi.

⁵⁵Egypt te ngilkial tu hong kipat ciang kumpipa tungah an ngen uh hi. Tuaciang kumpipa in amate Joseph kungah pai in, ama ci bang a vawt natu in thupia hi.

⁵⁶Kialpi nasia vaial in ngam bup ah hong kizel a, tua ahiciang Joseph in ankholna inn theampo hongin Egypt te tungah antang zuak hi.

⁵⁷Mun theampo ah kialpi nasia mama tung ahikom leitung mun theampo pan mihingte Joseph kungah antaw tu in Egypt ah hong pai uh hi.