Read Siyin Chin Pianciilna 44 Bible Online

Pianciilna 44 - Siyin Chin bible

Pianciilna 44

¹Joseph in a inn uk naseampa tungah, “Hi pasalte ip sungah a puak zawk zaza nguai an hensak in a, amate sum tek a ipngong sungah koisak in.

²Ka ngunn hai sia a moibelpa ii ipngong sung a tungbel ah antawk natu sumte taw koikhawmin,” ci in thupia hi. Ama in a kisawl bangin seam hi.

³Zingsang tuungin a laate uh taw unaute ciasak uh hi.

⁴Khuapi pan tawm a pai zawkciang Joseph in ama inn uk naseampa tungah, “Manlang in tua pasalte del ta'n. Na phak ciang amate tungah, ‘Thupha sia banghang a sia taw hong thuk nu ziam?

⁵Banghangin ka topa ngunn hai ngu nu ziam? Ka topa tui neakna hai hi a, aisaan na in a zak hi. Khialna nasia mama khat vawt nu hi!’ na ci ta'n,” ci hi.

⁶Naseampa in amate a phak ciang, hi kammal teng ma son kik hi.

⁷Amate in, “Topa awng, hi bang teng na pau bang na cinopna ziam? Hi bang lawlawmin ngamta ngawl khu hi ci in ka kiciam uh hi.

⁸Na heaksa bangin ka ipngong sungah ka mu uh sumte Canaan ngam panin nang kungah kong paipui kik uh hi. Tuabang hi a, na topa ii inn pan ngunn ahizong khamh ahizong banghangin ngu tu khu ziam?

⁹Topa awng, khat pawpo tung pan na mu le tua pa kithat tu a, ko a dang teng na sila kong suak tu uh hi,” ci in zo hi.

¹⁰Ama in, “Hi hen; ahizong tua hai a la sia bek ka sila suak tu a, no a dang teng na pai vahial thei tu uh hi,” ci hi.

¹¹Tua ahiciang amate in manlang takin a vanhte lei ah khiasuk uh a, amate ip tek hong uh hi.

¹²Joseph naseampa in a haambel pan a moibel dong pha takin tok a, tua hai Benjamin ii ip sungah mu hi.

¹³Unaute in khuangaina taw a puante balkeak in, laate tungah a vanhte suanhin khuapi ah heakkik uh hi.

¹⁴Judah le a suapuite Joseph inn a thet uh ciang tua munah Joseph om lai hi. Amate Joseph mai ah kunsuk a,

¹⁵Joseph in, “Bang seam thong nu ziam? Keima dinmun ah a om mihing khat in aisaanna zanghin note hong man zo veve tu cisia he ngawl nu ziam?” ci hi.

¹⁶Judah in, “Topa awng, nang tungah bang hong ci thei tu khu ziam? Bangbangin hong nial thei tu khu ziam? Bangbangin kiphel thei tu khu ziam? Pathian in ka mawna uh hong kilanghsak hi. Tua hai a kimuna pa bek hi ngawlin kote theampo zongh tu in na sila ka hi uh hi,” ci in zo hi.

¹⁷Joseph in, “Oh, hi ngawl hi! Tuabang vawt ngeingawl tu khi hi! Hai a kimuna pa bekma ka sila hi tu hi. No a dang teng na pa kungah ciidam ludam in cia thei nu hi,” ci hi.

¹⁸Judah in Joseph kungah paito a, “Topa awng nong hesuakna in, na tungah hi vahial in thu hong sonsak ta'n. Kei tungah hong thin uuk heak in; Nang sia kumpipa tatak bang na hi hi.

¹⁹Topa awng, nangma in, ‘Pa ahizong suapui dang ahizong na nei uh ziam?’ ci in nong dongh hi.

²⁰Kote in, ‘Pa huai khat le a huai zawkciang a nei suapui naupa khat ka nei uh hi. Ama ii suapuipa thi a, nu khat tate sung pan ama bek nungta lai hi; a pa in ama it mama hi,’ kong ci uh hi.

²¹Topa awng, nangma in ama na mu thei natu in hi lai ah hong paipui tavun nong ci a,

²²tangvalpa in a pa nusia thei ngawl tu hi; nusia le a pa thi tu hi ci in kong zo uh hi.

²³Tuasia ciang nangma in, ‘A nobel na suapuipa uh taw nong pai bua uh le ka mai nong mu thei buatu uh hi,’ nong ci hi.

²⁴“Ka pa kungah ka cia kik uh ciang nangma ci bangin ka son uh hi.

²⁵Tuasia ciang ama in, pai kikin, antawm taw lai tu in hong sawl hi.

²⁶Koma in, ‘Ka nau nobel ngawl taw tua pa kung hong kitumsak ngawl tu ahikom ko pai thei ngawl tu khu hi. Ka nau nobel zongh hong pai le tuasia ciang bek pai thei tu khu hi,’ ci in ka zo uh hi.

²⁷Ka pa uh in ko tungah, ‘Ka zi Rachel in tapa nii bek hong neipui sia na he uh hi.

²⁸A khat sia in keima hong nusia zo hi. Ama hong nusiat a kipan tu dong mu kik ngawl ka hikom, ngamsate in ama balneen zo hi nanak tu hi.

²⁹Tu in, hisia kei kung pan paipui in bang khat po tawk thong le haam zo ka hi bangma nong khuangaisakna in kei hong thatlum tu hi,’ hong ci hi.

³⁰Judah in, “Tua hi a, tu in topa awng, ka nau ngawl taw ka pa kungah cia kik thong leng ka naupa kei taw cia khawm ngawl hong mu po ciang ama thi tu hi. Ka pa nuntakna sia ka naupa nuntakna bek mitsuan in nungta a, ama haam mama zo ahikom ama ka khuangaisakna in thisak tu hi.

³²Tua bek dom ngawlin ka naupa atu in ka pa tungah ka nuntakna ka khaam hi. Ka naupa ama kungah ka ciapui kik bua ahile ka nuntak sung theampo mawsiatna ka thuak tu hi, ci in ka son hi.

³³Tuaciang tu in topa awng, ka naupa taangin keima na sila in hi sungah kong om tu a; ama a suapuite taw paisak in.

³⁴Ka naupa kei taw hong om buale bangbangin ka pa kungah cia kik thei tu khi ziam? Ka pa tungah hi tuasiatna a tun ka mu tu sia kei thuak zo ngawl tu khi hi,” ci hi.