Read Siyin Chin Pianciilna 45 Bible Online

Pianciilna 45 - Siyin Chin bible

Pianciilna 45

¹Joseph in a naseamte mai ah a nenona khaam zo ngawl ahikom a inndoi sung pan a naseam theampo a pusua natu in thupia hi. Joseph in a suapuite tungah ama akua ci in a kison laitak kuama dang om ngawl hi.

²Joseph nasia tak kap ahikom Egypt te in za a, tua thu kumpi inn sungah thang hi.

³Joseph in a suapuite tungah, “Keima Joseph khi hi. Ka pa nungta lai ziam?” ci hi. Ahizong hi thu a suapuite in a zaak ciang amate lau mama ahikom zo thei ngawl uh hi.

⁴Tua zawkciang Joseph in amate tungah, “Hesuakna taw hong neak tavun,” ci hi. Amate in neak a, ama in, “Egypt te tungah na zuak uh na suapuipa Joseph khi hi.

⁵Hi lai ah nong zuak uh manin nuammaw sa in kimawsiat heak vun. Mihingte nuntakna ngum tu in note mai ah Pathian in kei hong paisak khol hi.

⁶Tu kum sia ngam sungah kialpi tun kum niina hi pheang a, lotho ngawl, anlaak ngawl tu hun kum nga sung om lai hi.

⁷Note le na suan na paalte nuntak thei natu le hi bang a lamdangin note kong suatak thei natu in note mai ah Pathian in kei hong paisak khol hi.

⁸Tua hi a, hi munah kei hong then sia no hi ngawl het a Pathian ahi hi. Pathian in kumpipa ii ulianbel in hong koi hi. Ama ngam bup thuzeakpa ka hi a; Egypt ngam theampo a ukpa ka hi hi.

⁹“Tu in, ka pa kungah manlang in cia tavun a, na tapa Joseph in hi bang hong ci hi ci in son tavun: ‘Pathian in Egypt ngam theampo a ukpa in hong koi zo hi; kei kungah hai ngawlin hong pai ta'n.

¹⁰Kei taw nong kinai thei natu in Goshen ngam ah — nangma, na tate, na tute, na tuute, na kealte, na khuite le na neisa theampo taw na teang thei tu uh hi.

¹¹Goshen ah nong om le kong khoi thei tu hi. Kialpi hun kum nga bang om lai hi; nangma, na innkuanpuite le na ngannote na pukthi tu uh ka dei bua hi” ci hi.

¹²Joseph in a thuson zom a, “Tu in note theampo le Benjamin awng, nang zongh in Joseph tatak ka hi sia nong mu thei hi.

¹³Hi lai Egypt ngam sungah ka vaang neizia le na mu theampo ka pa tungah son tavun. Tua zawkciang manlang in ama hi munah hong paipui tavun,” ci hi.

¹⁴Joseph in a suapuipa Benjamin koai in kap a; Benjamin zongh in koai in kap hi.

¹⁵Tuaciang Joseph in a suapui teng khat zawkciang khat kap kawmin ngawngkoai in namh hi. Tua zawkciang a suapuite ama taw thuson tu kipan hi.

¹⁶Joseph suapuite hong paina thu kumpi inn sung dongah theng a, kumpipa le a uliante lungdam hi.

¹⁷Kumpipa in Joseph tungah, “A ngante vanh suanhin, Canaan ngam ah a heak kik natu in na suapuite sawl in.

¹⁸A pa le a innkuanpuite puisak in a, hi lai ah pai kiksak in. Egypt ngam sungah leitang phabel sia amate ka pia tu a, amate nuntak khomna za sangin a tamzaw nei tu uh hi.

¹⁹A zite, a tanote le a pa to natu in Egypt pan leang a ken natu zongh son in.

²⁰Amate in a neisa te a nusiat tu sia thinbot heak hen; Egypt ngam bup leitang phabel sia amate aa hi tu hi,” ci hi.

²¹Jacob tapate in a kisawl bangin ngamta hi. Kumpipa thupiak bangin Joseph in leangte le lampi a neak tu nguai an pia hi.

²²Joseph in amate puan laih natu zongh puansilh khat tek pia a, ahizong Benjamin sia ngunn dangka 300 le puan laih natu silh nga pia hi.

²³Ama in Egypt ngam pan a piang na phabelte laa sawm ii puakkhop le antang, anluum le lampi a neak tu nguai an laa sawm ii puakkhop ma a pa thaak hi.

²⁴Ama in a suapuite tha a, amate tungah, “Lampi ah kihau heak vun,” ci in vaitha hi.

²⁵Amate Egypt ngam pan dingin Canaan ngam a pa Jacob inn ah cia kik uh hi.

²⁶Amate in a pa tungah, “Joseph nungta lai hi! Ama sia Egypt ngam theampo ukpa hi!” ci in son hi. Jacob in lamdangsa mama in um zo ngawl hi.

²⁷Ahizong Joseph ii kam vaithak teng a son ciang le ama Egypt ngam ah a pai natu in a kipuak, leangte a mu ciang, a pa ingh liangin a omna teng veng hi.

²⁸A pa in, “Ka tapa Joseph nungta tatak lai ziam! Ka kat sia tu teng ma hi ei! Ka thi ma in pai in va kimu nanak tong,” ci hi.