Read Siyin Chin Pianciilna 46 Bible Online

Pianciilna 46 - Siyin Chin bible

Pianciilna 46

¹Jacob in a vanh nei theampo heangin Beersheba ah pai a, tua munah a pa Isaac ii Pathian tungah biakpiakna nei hi.

²Tua zanin Jacob ii mukholna sungah Pathian in paupui a, “Jacob, Jacob awng!” ci in sam hi. Jacob in, “Hi hi, hi sungah om ing,” ci in zo hi.

³Ama in, “Keima in Pathian, na pa ii Pathian ka hi hi,” ci hi. “Egypt ah na pai tu sia lau heak in; na suan na paalte tualai ah minam lian khat in ka siam tu hi.

⁴Egypt ah nangma taw kong paikhawm tu a, na suan na paalte hi ngam le lei ah kong ciapui kik tu hi. Na thi ciang Joseph sia nangma taw om tu hi,” ci hi.

⁵Beersheba pan Jacob vaiding hi. A tate in a ma, a tanote le a zite, Egypt kumpipa ii a puaksak leangte tungah tosak hi.

⁶Canaan ngam pan ngannote le a vanh nei teng taw kithoai in Egypt ngam zuan hi. Jacob in a suan a paal theampo ahi:

⁷a tapate, a tupate, a tanute le a tunute a vekpi in paipui hi.

⁸Ama taw Egypt a zuan Jacob ii innkuanpui teng sia a tapa lianbel Reuben,

⁹tuaciang Reuben ii tapate: Hanoch, Pallu, Hezron le Carmi,

¹⁰Simeon le a tapate: Jemuel, Jamin, Ohad, Jachin, Zohar le Canaan numeinu ii tapa Shaul,

¹¹Levi le a tapate: Gershon, Kohath le Merari,

¹²Judah le a tapate: Shelah, Perez le Zerah, (Judah ii tapa dangte Er le Onan hi a, Canaan ah thi uh hi.) Perez ii tapate: Hezron le Hamul,

¹³Issachar le a tapate: Tola, Puah, Jashub le Shimron,

¹⁴Zebulun le a tapate: Sered, Elon le Jahleel ahi hi.

¹⁵Hi tapa teng sia a tanu Dinah banah Jacob atu Leah ii Mesopotamia ah a nei tate ahi hi. Leah taw a nei a suan le a paal a vekpi in 33 pha hi.

¹⁶Gad le a tapate: Zephon, Haggi, Shuni, Ezbon, Eri, Arod le Areli ahi hi.

¹⁷Asher le a tapate: Imnah, Ishvah, Ishvi, Beriah le a suapuinu uh Serah ahi hi. Beriah ii tapate sia Heber le Malchiel ahi hi.

¹⁸Hi sawm le luk te sia Laban ii a tanu Leah a piak, a sila nu Zilpah taw a nei Jacob ii suan le paalte ahi hi.

¹⁹Jacob in a zi Rachel taw tapa nii nei a: Joseph le Benjamin ahi hi.

²⁰Joseph in Heliopolis khua thiampi Potiphera ii tanu Asenath taw Egypt ah tapa nii nei a, Manasseh le Ephraim ahi hi.

²¹Benjamin ii tapate sia Bela, Becher, Ashbel, Gera, Naaman, Ehi, Rosh, Muppim, Huppim le Ard ahi hi.

²²Hi sawm le lite sia Jacob le Rachel suan le paalte ahi uh hi.

²³Dan le a tapa Hushim.

²⁴Naphtali le a tapate: Jahzeel, Guni, Jezer le Shillem ahi hi.

²⁵Hi salite Laban ii a tanu Rachel a piak a sila nu Bilhah taw a hin, Jacob ii suan le paalte ahi hi.

²⁶Egypt ah a pai Jacob ii a suan le a paalte a vekpi in 66 hi a, tuate sungah a tapate ii zite kihel ngawl hi.

²⁷Joseph in Egypt ah tapa nii nei a, Jacob innkuanpuite tua mun a thet ciang a vekpi in 70 pha uh hi.

²⁸Goshen ah Joseph ii amate a mua natu a son tu in, Jacob in Judah pai kholsak hi. Amate a thet ciang,

²⁹Joseph, a siphu ngalleang tung to in a pa muak tu in Goshen ah pai hi. A kimu ciang Joseph in a pa ngawngkoai in ngei hialma kap hi.

³⁰Jacob in Joseph tungah, “Tu hile na meal kong mu zo a, na nuntak lai hunlam hong he zo ka hikom kei a thi tu kinging khi hi,” ci hi.

³¹Tua zawkciang Joseph in a suapuite le a pa innkuanpui dang teng tungah, “Kumpipa kungah ka na pai tu a, Canaan ah a teang ka suapuite le ka pa innkuanpui theampo ka kung hong zuan zo hi, ci in ka son tu hi.

³²Note sia tuucingte le ngan khoaite hi a, na tuute na ngante le na neisa dang teng theampo nong paipui uh sia ka son tu hi.

³³Kumpipa in note hong samin, bang na seam nu ziam ci in hong dok ciang,

³⁴ka taanghpupite bangma in ka khan tawntungin ngankhoai na seam ung, na ci tu uh hi. Tuabang na ci uh ciang ama in Goshen ngam ah hong teangsak tu hi,” ci hi. Egypt te in tuucingte sia thu a sim ngawl ahikom Joseph in tu a bangin a ci ahi hi.