Read Siyin Chin Pianciilna 47 Bible Online

Pianciilna 47 - Siyin Chin bible

Pianciilna 47

¹Tua ahiciang Joseph sia a suapuite nga taw kumpipa kungah pai hi. Ama in, “Ka pa le ka suapuite Canaan ngam pan a tuute, a ngannote le a neisa teng theampo taw hong pai zo hi. Tu in amate Goshen ngam ah om uh hi,” ci hi.

²Tua zawkciang ama in kumpipa mai ah a suapuite paipui hi.

³Kumpipa in, “Bang na seam nu ziam?” ci in amate dongh hi. Amate in, “Topa awng, ka taanghpupite bangma in tuucingte hi ung.

⁴Canaan ngam ah nasia tak kialpi tung a, ngantha natu mun om ngawl ahikom hi ngam ah a teang tu in kong pai uh hi. Hesuakna taw Goshen ngamkhen ah ka teen thei natu uh in thu hong pia ta'n,” ci in zo uh hi.

⁵Kumpipa in Joseph tungah, “Tu in na pa le na suapuite hong theng zo ahiciang

⁶Egypt leitang sia amate aa hi. Leitang phabelna mun ahi, Goshen ah teang tahen. Amate sung pan naseam thiam a om le ka ngannote a uk tu in koi in,” ci hi.

⁷Tuasia ciang Joseph in kumpipa mai ah a pa Jacob paipui in aap hi. Jacob in kumpipa thupha pia hi,

⁸tuaciang kumpipa in ama tungah, “Kum bangza pha ni ziam?” ci in dongh hi.

⁹Jacob in, “Vak kawkoai in ka nuntak zawk kum za le kum sawmthum pha zo hi. Ka taanghpupite ii kum tampi a vak kawkoai sia za zongh hi ngawl lai in, kum tawm napi ka haksa hi,” ci in zo kik hi.

¹⁰Jacob in kumpipa sia vaithakna thupha pia in nusia hi.

¹¹Tuaciang Joseph in a pa le a suapuite kumpipa thupiak bangin Egypt ngamsung lei phabelna Rameses khuapi nai ah mun pia in teangsak hi.

¹²Joseph in a pa, a suapuite le a pa innkuanpui dang teng theampo a moibel dongin an pia hi.

¹³Kialpi nasia mama ahikom in mun theampo ah an om ngawl a, Egypt te le Canaan mite ngilkial in a tha hong zawm uh hi.

¹⁴Joseph in mite ii an leina sum teng kaikhawmin kumpi inn sungah koi hi.

¹⁵Egypt le Canaan ah sum teng a kizak siat zawkciang Egypt te Joseph kungah pai in, “Ko an hong pia ta'n! Hong thisak heak in. Khat pawpo hong vaihawmpui ta'n! Ka sum uh teng bo siat zo hi,” ci uh hi.

¹⁶Joseph in, “Na sumte a bo siat zo le na ngannote hong paipui tavun; an taw kitheak tu hi,” ci in zo hi.

¹⁷Tua ahiciang a ngannote Joseph kungah paipui uh a, ama in a siphute, a tuute, a kealte, a khuite le a laate thena in an pia hi. Tua kum in ama in a ngannote theampo a thena in an pia hi.

¹⁸A kum kik ciang amate Joseph kungah pai in, “Topa awng, thumaan sia na maitang ah ka iim thei bua uh hi; ka sum uh theampo bo siat zo a, nganno theampo nangma aa hi zo hi. Ka pumpi uh le ka leitangte simngawl, kong piak tu bangma taang ngawl hi.

¹⁹Hong thisak heak in. Khat pawpo hong vaihawmpui ta'n! Koma lote vaalthongsak heak in. Koma le ka leitang an taw hong lei ta'n. Kote, kumpipa ii sila suakin, ka leitang uh ama ii neisa hi tu hi. Ka nuntak natu in an hong pia ta'n a, lote ah ka ciin tu uh thaicii hong pia ta'n,” ci hi.

²⁰Joseph in Egypt leitang theampo kumpipa atu in lei hi. Kialpi nasia mama ahikom Egypt mi theampo a leitang a zuak ngawlin phamaw a; tuaciang leitang theampo kumpipa ii neisa suak siat hi.

²¹Joseph in Egypt ngam mong khat pan mong khat dong mihingte sila suaksak hi.

²²Ama in thiampite neisa leitang bekma lei ngawl hi. Kumpipa in amate nuntak khom natu an pia ahikom a leitangte zuak kul ngawl hi.

²³Joseph in mite tungah, “Na mu uh bangin, tu in note le na leitangte kumpipa atu in kong lei zo hi. Na lo ah na ciin tu anciite hi sungah om hi.

²⁴Anlaak hun ciang see nga sua see khat kumpipa na pia tu uh hi. A om lai teng sia, thaicii tu le noma le na innkuanpuite ii anneak tu in zangh thei tu nu hi,” ci hi.

²⁵Amate in, “Nangma in kote nuntakna nong hun zo a; kote tungah nong thuthiam hi, topa awng, tuaciang kote sia kumpipa ii sila ka hi tu uh hi,” ci in zo hi.

²⁶Tua ahiciang Joseph in Egypt leitang taw kisai, lo an a piangte ii see nga sua see khat kumpipa ii neisa a sua thei natu thukham khat vawt hi. Hi thukham sia tuni dongin kizangh lai hi. Thiampite leitang bek kumpipa ii neisa suak ngawl hi.

²⁷Israel te Egypt ngam Goshen ah teang a, tua munah amate hau in, ta tam mama nei uh hi.

²⁸Jacob kum 147 a phak dong Egypt ah kum sawm le kum sali sung teang hi.

²⁹A thi tu hun a nai ciang ama in a tapa Joseph samin, “Ka phei kawmah na khut koi in, Egypt ah nong phum ngawl natu in kiciamna khat vawt in.

³⁰Ka pate thaan ah kiphum nuam khi hi; Egypt ngamsung pan hong tua ta'n a, amate thaan ah hong phum ta'n,” ci hi. Joseph in, “Nong ci bangin ka vawt tu hi,” ci in zo hi.

³¹Jacob in, “Ka vawt nanak tu hi ci in hong kiciam ta'n,” ci hi. Joseph in kiciamna vawt a, tuaciang Jacob sia a lupna tungah lungdamko hi.