Read Siyin Chin Pianciilna 49 Bible Online

Pianciilna 49 - Siyin Chin bible

Pianciilna 49

¹Jacob in a tapate samin, “Hong kikhawmtua tavun, mai sangah note tung a hong piang tu thu kong son tu hi:

²“Jacob ii tapate awng hong paikhawm tek tavun a, hong ngai tavun. Na pa Israel thu son ngai vun.

³“Ka taciil Reuben awng, nang sia ka thahatna Tuaciang pasal ka tanna in, ka ta masabel na hi a, ka tapa teng sung pan a kiphasakbel le a thahatbel na hi hi.

⁴Nang in tuipawm khat taw na kibang a, Ahizong a thupibel na hi buatu hi, Banghang ziam cile ka zino na luppui a, na pa ii lupna na paksak hi.

⁵“Simeon le Levi unau khat na hi uh hi. A ngalhiamte ngongtatna in zangh uh hi.

⁶A thuku sonna ah ka kihel buatu a, A kikhopna ah ka kipawl buatu hi, Banghang ziam cile a thin uuk uh ciang mihing that a, Kimaina in khuitalte ii a peangbaisak hi.

⁷A thin uukna ah haamsiatna thuak hen, banghang ziam cile a thin uukna nasia leih hi. A thinsona ah haamsiatna thuak hen, banghang ziam cile a thinso nasia leih hi. Israel ngam sungah amate ka thethaang tu hi. A mipuite sungah amate ka khentham tu hi.

⁸“Judah awng na suapui te in nang hong pok tu hi. Na ngalte a ngawng pan na man hi. Na suapuite in na mai ah hong kun tu hi.

⁹Judah sia, Sa manin a kuahawng zuan kik a, Kizia in a lumsuk tawpi khat taw kibang hi. Kuama in ama nawngkaisak ngam ngawl hi.

¹⁰Judah in kumpi ciangkhut len tu a, A suan a paalte in ngamuk tawntung tu hi. Minamte in ama tungah phiangshia puak tu a, Thunitna taw ama mai ah kun tu uh hi.

¹¹Ama in a laano sia sapitkung khat ah khit a, Sapitkung phabel sia tung ahi hi. Ama in a puante chi bangin a san sapittui sungah sawp hi.

¹²Sapittui a neakna in a mitte san ngingu a, Noai a neakna in a hate paak hi.

¹³“Zebulun sia tuipi hui ah teang tu hi. A tuipi vaal sia teambawte tawlngakna khat hi tu hi. A ngam Sidon ciang dong theng tu hi.

¹⁴“Issachar sia a tung tona ipte kawm ah kizia in a lum, Laa khat sangin phazaw ngawl hi.

¹⁵Ahizong ama in a tawlngakna mun ii phatna mu a A ngam a lei nuamsa hi. Tua ahiciang a nungzaang ah vanh pua tu in ama kunsuk a, Sila khat bangin na kiseamsak hi.

¹⁶“Dan sia a mipuite ii a ukpa hi tu hi. Amate Israel minam dangte bangma hi tu hi.

¹⁷Dan sia lampi hui ah a om ngul khat, lamzin hui ah a om ngul ngu nei khat hi tu a, Tua ngul in siphu khuatul pan tu hi, A tungto pa a nung sangah a kilot thal natu hi.

¹⁸“TOPA awng, nong hut tu ka ngak hi.

¹⁹“Phalakte pawlkhat in Gad sim tu a, ahizong Gad in amate kileesak kikin sul zui tu hi.

²⁰“Asher ii leitang pan an tam mama piang tu hi. Kumpi khat ii neak tu in a kilawm an, ama in pia tu hi.

²¹“Naphtali sia a ithuai tanote a nei, a tai vavil sangai khat ahi hi.

²²“Joseph sia ciktui hui khat ah a om ngamlaa khat taw kibang a, Mualpangh ah a om ngam siphuno khat taw kibang hi.

²³A ngalte in nasia takin sim a, A thal le a thaltangte taw del hi.

²⁴Ahizong Jacob ii Pathian Vaanglianbelpa ii vaangletna le Israel a Dal pa, Tuucingpa hangin A thal kinging top a, A khutte a tha kihatsak hi.

²⁵Nang hong hu, na pa ii Pathian, Thupha hong pia Vaanglianbelpa Pathian in Vantung pan thupha ngua taw Leinuai tawngh pan tui taw Khoai le vul tam mama, tu le ta tam mama thuphate taw,

²⁶thupha antangte le paakte, Taanghlai mualte ii thuphate, Tawntung mualte panin, nopsakna te, Hi thupha teng Joseph ii lu tungah A suapuite sung pan a kituam koi pa ii mitkhu tungah tawlnga in, tung siat tahen.

²⁷“Benjamin sia a hang mama ngiapui khat taw kibang hi. Zing le nitak sa thatlum in ne tum hi,” ci hi.

²⁸Hi te sia Israel minam sawm le niite hi a, hi thu sia amate tetek taw a kiphu a kilawm tu in a son a pa ii a tapa khat sim tungah vaithakna kammal ahi hi.

²⁹Tua zawkciang Jacob in a tapate tungah, “Tu in ka mipuite thina ah a pai tu ka hi a, ka pate taw in suanghawng thaankhuk ah hong phumkhawm tavun, tua thaankhuk sia Hit mi Ephron ii lo sung hi a,

³⁰Canaan ngam Mamre ii nisuana sang Machpelah ah om hi. Abraham in hi thaankhuk le lo sia thaan mun tu in Ephron tung pan lei hi.

³¹Tua munah amate in Abraham le a zi Sarah; Isaac le a zi Rebecca phum a; tuaciang keima in Leah ka phum hi.

³²Tua lo le thaankhuk sia Hit mite tung pan a kilei ahi hi. Tua munah hong phum tavun,” ci in thupia hi.

³³Jacob in a tapate a vaithak zawkciang, ama lumsuk kikin thi hi.