Read Siyin Chin Pianciilna 50 Bible Online

Pianciilna 50 - Siyin Chin bible

Pianciilna 50

¹Joseph, a pa tungah kisepsuk a, kapin a pa maitang namh hi.

²Tuaciang Joseph in a pa luang a muat ngawl natu vawt tu in thupia hi.

³A luang muat ngawl natu nasepna sia a ngeina bangin ni 40 sung hai hi. Egypt mite sia ama atu in ni 70 sung khuangai in kap uh hi.

⁴Khuangai hunte a ven ciang, Joseph in kumpipa ii uliante tungah, “Hesuakna in kumpipa tungah hi thu hong sonsak tavun:

⁵‘Ka pa a thi mahiat in Canaan ngamsung, ama atu in a kinginna sa thaankuul ah ka phum natu in kamciamna hong vawtsak hi. Tua ahiciang hesuakna in ka pa a phum tu in hong paisak ta'n, tua zawkciang kong cia kik tu hi,” ci hi.

⁶Kumpipa in, “Kamciamna na vawt bangin, pai in na pa phum ta'n,” ci in zo hi.

⁷Tua ahiciang Joseph a pa phum tu in pai hi. Kumpipa ii ulian theampo, ama zumsung upate le Egypt ngam lampuite theampo Joseph taw pai uh hi.

⁸Ama ii innkuanpui, a suapuipate le a pa ii innkuanpui a om lai teng theampo ama taw pai uh hi. A tanote, a tuute, a kealte le a khuite bek ma Goshen ngam ah taang hi.

⁹Siphu ngalleang tung le siphu tung a to mihingte zongh ama taw pai tek uh a; mihing tam peuma hi.

¹⁰Jordan ngun nisuana sangah a om Atad ancilna mun a thet ciang, amate ngei hialpo khuangai in nging takin kap uh hi, tuaciang Joseph in ni sali sung khuangai kaana hun in zangh hi.

¹¹Canaan ngammite in Atad ah tua mihingte khuangai in kap a mu ciangin, “Egypt te in a ciliap huai khuangai kaana nasia takin vawt hi ta a!” ci uh hi. Tua ahikom tua mun sia Abel Mizraim kici hi.

¹²Tua ahiciang Jacob thupiak bangin a tapate in seam uh hi;

¹³amate in Canaan ngam ah a pa luang pua in thaan mun tu in Abraham ii Hit mi Ephron tung pan a lei, Mamre nisuana sangah a om Machpelah lo sung thaankuul ah phum uh hi.

¹⁴A pa a phum zawkciang Joseph, a suapuite le mithi phumna ah a zui theampo taw Egypt ah cia kik uh hi.

¹⁵A pa thi zawkciang Joseph suapuite in, “Joseph in hong ngaimaw lai hen a, ama tungah siatna ih vawt theampo thuk kik hong sawm thong le bang law tu ziam?” ci uh hi.

¹⁶Tua ahikom amate in Joseph tungah, “Ih pa a thi ma in,

¹⁷ama in, ‘Na suapuite ii nang tung a kong vawt khialna lian sia hesuakna taw maisak ta'n,’ ci in nang tungah hesuak ngen vun hong ci hi. Tu in na pa ii Pathian naseam kote ii vawt khialna sia pan hesuakna taw hong maisak ta'n,” ci in kam vaitha uh hi. Joseph sia hi kam vaithak a zaak ciang kap hi.

¹⁸Tua zawkciang a suapuite hong pai in, ama mai ah kun uh hi. Amate in, “Hi lai na mai ah na silate bangin om ung,” ci uh hi.

¹⁹Ahizong Joseph in amate tungah, “Lau heak vun; Pathian dinmun ah keima le keima kikoi thei ngawl khi hi.

²⁰Note in a sia nong sawm uh hi, ahizong tua thupiang sia hu in tuni a, a nungta mihing tam mama te ii nuntakna a huu tu in, Pathian in tuasia a pha lam in hong heisak hi.

²¹Bangma no lau natu om ngawl hi. Note le na tate kong khoi tu hi,” ci hi. Tuabangin Joseph in a suapuite thinsung lungsung kha tu in kamthiam kamneam zanghin a suapuite thinnuamsak hi.

²²Joseph, a pa innkuanpuite taw Egypt ah teang khawm tan a; kum 110 a phak ciang thi hi.

²³Ama in Ephraim ii tate le tute a mu dong nungta hi. Ama in Manasseh ii tapa Machir ii tate zongh a nuntak lai in ama innkuanpui in nei hi.

²⁴Ama in a suapuite tungah, “Kei a thi nai tu ka hi hi, ahizong Pathian in note hong keam tatak tu a, hi ngam pan, Abraham, Isaac le Jacob te tungah a ciliap huai takin a kamciamna ngam ah hong paipui nanak tu hi,” ci hi.

²⁵Tua zawkciang Joseph in a mite kiciamna khat vawt tu in sawl hi. Ama in, “Pathian in tua ngam ah hong paipui ciangin noma taw ka luang paipui tu khu hi ci in hong kamciam tavun,” ci hi.

²⁶Tuabangin Joseph kum 110 a phak ciang Egypt ngam ah thi hi. Amate in Joseph luang a muat thei ngawl natu in vawtin, mithi kuang khat sungah koi hi.