Read Siyin Chin Pianciilna 7 Bible Online

Pianciilna 7 - Siyin Chin bible

Pianciilna 7

¹TOPA in Noah tungah, “Na innkuan bupin teambaw sungah tum vun; leitung theampo ah a maanin a seam sia nangma bekma kong mu hi.

²Biakna taw kisai a thiangtho nganhingte kop sali tek paipui in a, ahizong a thiangtho ngawl nganhingte ahile kop khat tek bek paipui in.

³Vacimte zongh nam khat ciang kop sali tek paipui in. Leitung ah vacim le nganhing nam theampo no nei kikin a nuntak natu hi bang vawt in.

⁴Tu zo ni sali zawkciang, ni sawmli sung sun le zan ngua kong zusak tu a, ka vawtsa nuntakna nei theampo a mon natu hi,” ci hi.

⁵Tuaciang Noah in TOPA thupiak theampo vawt siat hi.

⁶Leitung ah tuipi a liim lai in Noah kum zaluk pha hi.

⁷Tuipi liimna pan a suakta tu in Noah le a zi, a tapate le a zite teambaw sungah tum uh hi.

⁸Nganhing le vacim namkim anu le apa kopkhat tek, biakna taw kisai a thiangtho ahizong a thiangtho ngawl ahizong,

⁹Pathian thupiak bangin Noah taw teambaw sungah tum khawm uh hi.

¹⁰Ni sali zawkciang tuipi liim hi.

¹¹Noah kum zaluk a phak zawk, a tha nii na ni sawm le ni sali ni in, leinuai a om tui teng puaktham in kihongkeak a, mun theampo pan tui phuul hi, van ii tui kongpi theampo kihongin,

¹²sun sawmli le zan sawmli tawntung leitung ah nguazu hi.

¹³Tua ni ma in Noah le a zi sia a tapate thum Shem, Ham, Japheth le a zite teng taw teambaw sungah tum uh hi.

¹⁴Amate taw in nganhing nam theampo, innsate le ngamsate, a lian a no, le vacim nam theampo tum uh hi.

¹⁵Pathian thupiak bangin nganhing nungta peuma ii a nam khat sim sung pan anu khat le apa khat veu Noah taw teambaw sungah tum uh hi.

¹⁶Noah a tum zawkciang TOPA in kongkha khak hi.

¹⁷Tuipi liim ni sawmli a ngei ciang teambaw a laam khom tu in tui hong thuk hi.

¹⁸Tui thuk vaial a, tui tungah teambaw laam hi.

¹⁹Tui thuk mama a, mualsaangbelte zong khum hi;

²⁰mualsaangbelte ii dawn tungsia ah metre sali a phak dong bang tui khang hi.

²¹Leitung ah a om a nungta teng — vacim theampo, nganhing theampo le mihing theampo thi siat hi.

²²Leitung ah om husang theampo thi hi.

²³TOPA in leitung ah a nungta theampo — mihing, nganhing le vacimte theampo mongsak siat hi. Noah le ama taw teambaw sungah a om teng bek taang hi.

²⁴Ni 150 sung tui kiamsuk tu kipan ngawl hi.