Read Siyin Chin Pianciilna 9 Bible Online

Pianciilna 9 - Siyin Chin bible

Pianciilna 9

¹Pathian in Noah le a tapate thupha pia in, “Na suan na paalte leitung theampo ah teang tu in ta tam mama nei tavun.

²Nganhing theampo, vacim theampo le ngasa theampo in no hong kiita in nungta tu uh hi. Tuate theampo noma khutnuai ah kikoi hi.

³Tu in tuate na ne thei tu uh a, ankung hingte zong na ne thei tu uh hi; note an tu in tuate theampo kong pia siat hi.

⁴Na neak ngawl tu khat sia chi om lai sa na ne bua het tu uh hi; banghang ziam cile nuntakna sia chi sungah om ahi hu in neak tu kong khaam hi.

⁵Khat pawpo in mihing nuntakna a thisak le ama daan kipia tu hi. Mihing nuntakna a thisak nganhing sia kithisak tu hi.

⁶Mihing sia Pathian taw kibangin kivawt ahikom mihing khat a that pawpo sia ama ii mipuipa in thatlum tu hi.

⁷“Leitung theampo ah na suan le na paalte a teen thei natu in, ta tam mama na nei tu uh hi,” ci hi.

⁸Pathian in Noah le a tapate tungah,

⁹“Tu in noma tung le na suan na paalte tung ahizong,

¹⁰note taw teambaw sung pan a pusuak khawm nuntakna a nei theampo — vacim theampo le nganhing theampo taw — thuciamna kong vawt hi.

¹¹Note taw ka vawt thuciamna sia hi kammalte hi: nuntakna nei a minpiang peuma tuipi liimna taw ka mon kik ngei buatu a; tuipi liimin leitung ka lalsak kik ngei buatu hi, ci in kong kamciam hi.

¹²Nang le nuntakna nei a minpiangte taw ka vawt a tawntung a kip tu ka thuciamna lim tu in

¹³meei sungah ka sangun ka koi tu hi. Tua in leitung taw ka thuciamna lim hi tu hi.

¹⁴Van ah meei ka kaaisak simin le sangun hong kilangh simin,

¹⁵tuipi liimna in nuntakna nei peuma mon kik ngeingawl tu hi ci in, note le nganhing theampo tungah kong kamciamna ka phawk tu hi.

¹⁶Meei sungah sangun a kilangh ciang ka mu tu a, tuaciang keima le leitung ah nuntakna nei a minpiangte kilaklaw ah a kho tawntung thuciamna sia ka phawk tu hi.

¹⁷Tuasia in nuntakna nei a minpiang theampo tungah kamciam ka piakna lim ahi hi,” ci hi.

¹⁸Teambaw sung pan a pusuak Noah tapate sia Shem, Ham le Japheth ahi hi. (Ham sia Canaan ii pa ahi hi.)

¹⁹Hi Noah ii tapa thumte sia simleitung mi theampo ii taanghpupite ahi uh hi.

²⁰Noah sia lothopa khat hi a, sapit ciing masabelpa ahi hi.

²¹Ama in sapittui ne in kham a, a puante suutin a puanbuk sungah a pumnguakin lum hi.

²²Canaan ii pa Ham in, a pa a pumnguak a lup a mu ciang, a suapuite nii kungah pai in son hi.

²³Tuasia ciang Shem le Japheth in puantual khat la in amate ii liangko nungsang ah baang uh hi, a nung leelam in puanbuk sungah tum uh a, a pa sia puantual taw siin uh hi. A pa uh a pumnguak a om a mu ngawl natu in amate in a lu heak uh hi.

²⁴Noah a sapittui kham theau kik a, a tungah a tapa nobel ii a vawtna teng a heak ciang

²⁵ama in, “Canaan tungah haamsiatna khat tung tahen! Ama sia a suapuite ii sila khat hi tu hi.

²⁶Shem ii Pathian, TOPA pok vun! Canaan sia Shem ii sila hi tu hi.

²⁷Pathian in Japheth pungsak tahen! A suan a paalte le Shem mite teang khawm tahen! Canaan sia Japheth ii sila hi tu hi,” ci hi.

²⁸Tuipi liim zawkciang Noah kum 350 nungta a,

²⁹kum 950 a phak ciang thi hi.