Read Siyin Chin 2 Samuel 1 Bible Online

2 Samuel 1 - Siyin Chin bible

2 Samuel 1

¹Saul ii thi zawkciang, David sia Amalek te a zawna pan hong cia a, Ziklag ah ni nii taam hi.

²A zing ciangin khangno khat Saul ii ngiaphual panin hong theng hi. Ama khuangaina a lak natu in a puante eaukeak in a lu tungah leivui kipoai hi. Ama in David kungah pai in, zatak piakna in lei ah bok hi.

³David in, “Koisung pan hong pai ni ziam?” ci in dongh hi. Ama in, “Israel te ngiaphual panin hong suakta khi hi,” ci in zo hi.

⁴“Bang thu teng piang ziam hong son ta'n,” David in ci hi. “Ih ngalkaphonpi ngalphual panin taikeak hi, tuaciang ih mite tam ma kithatlum hi. Saul le a tapa Jonathan zongh kithat hi,” ci in zo kik hi.

⁵“Bangbangin Saul le Jonathan thi hunlam he ni ziam?” ci in David in dongh hi.

⁶Ama in, “Kei Gilboa Mualvum tungah ka om luilam a, Saul sia a tei neal in om hi, tuaciang siphu ngalleang le siphu ngalkapte in ama a neak vaial ka mu hi.

⁷Tuasia ciang ama hong kiheak a, kei hong mu in hong sam hi. ‘Topa!’ ci in ka zo hi.

⁸Ama in akua ni ziam ci in hong dongh a, Amalek te ka hi hi, ci in ka son hi.

⁹Tuasia ciang ama in, ‘Hong pai ta'n a, hong that ta'n! Kei ka liamna nasia a, a thi tu hi zo khi hi,’ hong ci hi.

¹⁰Tua ahikom ama kung ka zuan a, ka that hi, banghang ziam cile ama puksuk pole a thi tu veve ahi sia ka he hi. Tua zawkciang, ama lu pan a kumpilukhu le a baan pan a haak la in, nangma hong puak khi hi, topa awng,” ci hi.

¹¹David khuangai in a puan eaukeak a, a mite theampo tuabang ma in ngamta uh hi.

¹²Saul le Jonathan, tuaciang Israel te TOPA ii mite ngalphual ah tam mama kithat ahikom, amate hee in mau in, nitak dong an tang uh hi.

¹³A thu hong puak khangno pa munah, “Nang koisung pan ni ziam?” ci in David in dongh hi. Ama in, “Kei Amalek te ka hi a, ahizong nangma ngam sungah ka teang hi,” ci in zo hi.

¹⁴David in, “Banghangin TOPA ii tealsa kumpipa that ngam ni ziam?” ci hi.

¹⁵Tuaciang, David in a mite khat sam a, “Hi sia pa that in!” ci in sawl hi. Tua pa in Amalek pa vaat vawk a, nasia liam mama hi,

¹⁶tuaciang David in Amalek pa tungah, “Hi sia nangma kivawt hi. TOPA ii a teal kumpipa khat ka thatlum na ci hu in nangma le nangma kipuavawk ni hi,” ci hi.

¹⁷David in Saul le a tapa Jonathan atu hi kaa la sa a,

¹⁸tuasia Judah mite tungah hil sawn tu in thupia hi. (Tuasia Jashar Thubu sungah kikhum hi.)

¹⁹“Israel mualte tungah ih lampuite thi hi! Ih ngalkap hangbel teng thi zo hi!

²⁰Tuasia Gath ah taangko heak vun, Ashkelon lampite ah zongh taangko heak vun. Philistia numeite lungdamsak bua tawng; doai biate ii tanute lungdamsak bua tawng!

²¹“Gilboa mualte tungah nguatui le daaitui kia heak hen; a lote kolh tawntung tahen! Banghang ziam cile tua munah a hangsan te ii lum teng mindaina taw liik a; Saul ii lum sia sathau taw kizut nawn ngawl hi.

²²Jonathan ii thal sia thi theina hi a, Saul ii namsau in hesuakna selin, a thahat te vaat vawk a, ngalte thatlum hi.

²³“Saul le Jonathan, lamdangin ithuai a, a nunna ah nungta khawm, a thina ah thi khawm hi; muvanlaite sangin zuan ngang zaw, tawpi te sangin hat zaw hi.

²⁴“Israel numeite awng, Saul atu khuangai vun! ama in puansan hoite nang hong silhsak a, suang manphate le khamh taw hong zeam hi.

²⁵“Ngalkap hangte puk zo a, amate ngalphual ah kithatlum uh hi. Jonathan sia mual tungah thi in lum hi.

²⁶“Nang atu in hee khi hi, ka suapui Jonathan awng; bangza in kei atu in ithuai ni ziam! Kei nong itna bangza in lamdang ziam, Numeite ii itna sang zongin nasia zaw hi.

²⁷“Ngalkap hangte puk siat zo a, a ngalhiamte kimanna selin kinusia hi.”