Read Siyin Chin 2 Samuel 10 Bible Online

2 Samuel 10 - Siyin Chin bible

2 Samuel 10

¹Tua zawk tawm vei ciangin Ammon kumpipa Nahash thi a, a tapa Hanun sia kumpi suak hi.

²Kumpipa David in, “A pa Nahash ii kei tungah hong vawt bangin Hanun tungah thumaan kilawmtatna ka lak nanak tu hi,” ci hi. Tua hi a, David in a khuangai puina a ko tu in kamtaite paisak hi. Amate Ammon a thet uh ciang,

³Ammon lampuite in kumpipa tungah, “David in na pa a upatna taw, khuangai puina a lakna in hi mite hong paisak, hi tu in um ni ziam? Hi peuma ngawl hi! Ama in hi sungah amate hong puakna sia ei hong zawthal thei natu in ih khuapi thu a dawp tu ngalvilin hong paisak hi!” ci hi.

⁴Hanun in David ii kamtaite mansak a, a khamul a lang meetkol sakin, a puansilhte a kawng ciangin tansak a, tha kik uh hi.

⁵Amate inn lam a zot kik tu uh sia maizum leih hi. David in bang thu piang ci a zaak ciang amate tungah kam thaak a, na khamul uh a po kik mateng hong heak kik heak vun a, Jericho khua ah na taam vun ci in zasak hi.

⁶Amate in David sia a ngal uh suaksak ci in Ammon te in tel zo ahiciang Bethrehob le Zobah pan Syria ngalkap 20,000, Tob pan 12,000, tuaciang Maacah kumpipa le a mite tulkhat teng ngalcial uh hi.

⁷David in hi thu za a, tuaciang amate do tu in Joab le a ngalkaphonpi bup kuansak hi.

⁸Ammon te kuanin amate khuapi Rabbah tumna ah mun la uh a, tua laitak a dangte, Syria te le Tob le Maacah pan mite in ngam taanzauna ah mun la uh hi.

⁹Ngalte in mai pan le nung panin a sim tu hunlam Joab in mu ahikom Israel ngalkap phabel teng tealin Syria te maingat in mun lasak hi.

¹⁰Ngalkap a om lai teng sia a suapui pa Abishai in uksak a, Ammon te maingat in koi hi.

¹¹Joab in ama munah, “Syria te in kei hong zo tu bangin na mu le hong pai ta'n a hong hu ta'n, tuaciang Ammon te in nang hong zo tu bang ahile keima hong pai in kong hu tu hi.

¹²Hat in a, na thinliansak in! Ih Pathian khuapite le ih mite atu in nasia takin do tawng. Tuaciang TOPA ii deina babangin piang tahen!” ci hi.

¹³Joab le a mite in a sim tu mai a nawk ciang, Syria te tai keak uh hi.

¹⁴Ammon te in Syria te tai a mu uh ciang amate zongh Abishai kung panin tai a, a khuapi sung tu uh hi. Tuasia ciang Joab sia Ammon te a simna pan hong heak kikin Jerusalem khua zuan hi.

¹⁵Syria te in Israel te a lel hunlam phawk ahikom a ngalkap theampo khawmtua uh hi.

¹⁶Kumpipa Hadadezer in Euphrates ngun ii nisuana sangah a om Syria te sam a, tuaciang Zobah kumpipa Hadadezer ii ngalkaphonpi ukpa Shobach ukna nuai Helam khua ah amate hong pai uh hi.

¹⁷David in tua thu a zaak ciang Israel ngalkap theampo khawmtua a, Jordan ngun kaantan in Helam ah kuan hi, tua munah Syria te in ama maingat in mun la uh hi. Kidona hong kipan a,

¹⁸tuaciang Israel te in Syria ngalkaphonpi notkeak kik uh hi. David le a mite in Syria siphu ngalleang ukte 700, siphu ngalkap 40,000 thatin, ngalte ngalkap ukpa Shobach liamsak a, ngalphual ah thi uh hi.

¹⁹Hadadezer khutnuai a om kumpite in Israel te a lel hunlam a kiphaw uh ciangin ngal kilemna vawtin, amate khutnuai ah om uh hi. Tuaciangin Syria te in Ammon te hu ngam nawn ngawl uh hi.