Read Siyin Chin 2 Samuel 13 Bible Online

2 Samuel 13 - Siyin Chin bible

2 Samuel 13

¹David ii tapa Absalom in a mealpha pasal nei ngawl lai suapuinumei Tamar a kici khat nei hi. Amnon a kici David ii tapa dang khat in ama dei hi.

²Ama in tua nu dei mama ahikom nat law liang hi, banghang ziam cile a teenpui tu suak thei tuak ngawl hi; ngaknu thiangtho a hina taw kizui in ama sia pate taw kimu ngawlin kikoi hi.

³Ahihang ama in a pilvang mama, David ii suapuipa Shammah ii tapa Jonadab kici ngualtamh khat nei hi.

⁴Jonadab in Amnon munah, “Nang sia kumpipa ii tapa hi napi, ni khat zawkciang ni khat hee mai taw om ni hi. Bang tat ni ziam?” ci hi. Ama in, “Ka suapui sealh Absalom ii suapuinu Tamar dei khi hi,” ci in zo hi.

⁵Jonadab in, “Na ci kinasak in lupna zuan in. Na pa in nang ve tu in hong pai ciang, ama munah hi bangin ci in, ‘Nong hesuakna in ka suapuinu Tamar hong paisak in an hong piasak ta'n. Hi sungah ka mu tangin an hong huansak hen a, ama mama in an hong piasak ta'n ci in,’ ” ci in sawl hi.

⁶Tua ahikom Amnon sia kizawmsakin lupna tung zuan hi. Kumpipa David in ama ve tu in pai a, tuaciang Amnon in, “Nong hesuakna in Tamar hi sungah hong paisak ta'n a, ama ka mu thei natu munah anluum nip pawlkhat hong vawtsak tahen, tuaciang ama mama in hong pia tahen,” ci hi.

⁷Tua ahikom Kumpipa David in kumpi inn sungah Tamar kam thaak a; “Amnon ii inn ah va pai ta'n a, an tawm vawtsak ta'n,” ci hi.

⁸Ama pai in lupna tungah a lup mu hi. Tua nu in anvui thauh sa pawlkhat la in, ama ii mu thei natu munah moh pawlkhat vawt hi. Tua zawkciang muhte em a,

⁹ama ii neak tu in beal sung pan sua hi, ahihang ama in ne nuam ngawl hi. Ama in, “A om theampo pusuaksak in,” ci a — tua ciang amate a vekpi ma in pusuak uh hi.

¹⁰Tua zawkciang, ama munah “Muhte hi sung ka lupna ah hong paipui ta'n a nangma hong lui ta'n,” ci hi.

¹¹Ama in muhte la in paipui hi. Tuate a piak ciangin, Amnon in zamh a, “Hong pai ta'n, lumkhawm tawng!” ci hi.

¹²“Tuabangin zawthawk thu taw ka minsiat natu hong ngamtasak heak in! Mu thadahuai mama hi!

¹³Bangbangin mipi kawm ah khuadak ngam nawn tu khi ziam? Tuaciang, nangma Israel ngam sungah min siacip tu ni hi. Nong hesuakna in kumpipa paupui po lete ama in kei, nang atu hong pia leilam tu um khi hi,” ci hi.

¹⁴Ahihang ama in a nangai bua hi; tuaciang ama sia tha hatzaw ahikom buanin khialpui hi.

¹⁵Tua zawkciang Amnon in tua nu nasia takin ngaimaw hi; a masa lai a itna sangin tu in a ngaimawkna nasia zaw kan hi. Ama in, “Tai in!” ci hi.

¹⁶Ama in, “Tai ngawl tu khi hi. Tu bang a nong betkeak sia, na vawt sa khialna sangin zongh a lianzaw khialna ahi hi!” ci in zo hi. Ahihang Amnon in ama ii pau a ngai nuam bua hi;

¹⁷ama in a aituam naseamte samin, “Hi numei ka muna ah omsak heak vun! Doipua ah notkeak vun a, kong kalh vun!” ci in sawl hi.

¹⁸Naseampa in ama doipua ah koi in kongkha kalh san uh hi. Tamar sia tua hun lai in kumpipa tanu, pasal nei ngawl lai te kizepna ahi puantual baan sau silh hi.

¹⁹Ama in a lu tungah vut kipoai a, a puantual eaukeak in, a khut sungah a mai phumin kap kawmin paisan hi.

²⁰A suapuipa Absalom in ama a mu ciang, “Amnon in hong vawtsia ahi bua ziam? Suapui nu awng, tuaza in na thin lalsak heak in. Ama na suapui sealh hi, tua ahikom kuama munah son heak in!” ci hi. Tuabangin Tamar sia Absalom ii inn ah hee in lungzuangin om hi.

²¹Kumpipa David in thupiang teng a zaak ciang a thinso hi.

²²Tuaciang Absalom in Amnon sia a suapuinu a buansak hu in huatsa mama a, pau zongh paupui nawn ngawl hi.

²³Kum nii zawkciang Ephraim khua hui, Baal Hazor ah Absalom in a tuumul meetsak a, ama in kumpipa tapate theampo tua munah sam hi.

²⁴Ama in Kumpipa David kungah pai in, “Kumpipa awng, ka tuute mul meetsak khi hi. Nang le na uliante hong pai in tua poai ah nong kihel tu uh ziam?” ci hi.

²⁵“Hong kihel thei ngawl tu khu hi, ka tapa awng, ka vekpi in hong pai thong le ung, nang atu ngim huai lei tu hi,” kumpipa in ci hi. Absalom in sam hamtang ahihang kumpipa uuk ngawlin, Absalom cia a sawl hi.

²⁶Ahihang Absalom in, “Tua ahile pha hi, ka suapuipa Amnon beak nong paisak buatu ziam?” ci hi. “Banghangin ama hong pai kul tu ziam?” ci in kumpipa in dongh hi.

²⁷Ahihang a khakbel ciang David in Amnon le a tapa dangte theampo Absalom taw a paisak dong ngen hamtang hi. Absalom in kumpipa taw a kiphu an neak poaipi khat vawt hi,

²⁸tuaciang a naseamte thupia a: “Amnon ii zu a kham mama hun hong he tavun a, thu kong piak ciangin ama that vun. Lau heak vun. Keima in vaipuak la khi hi. Hang vun a, haisaang heak vun,” ci hi.

²⁹Tuabangin naseamte in Absalom thupiak bangin Amnon that uh hi. David ii tapa dang teng sia a laate tung to in taikeak uh hi.

³⁰Amate inn lam a zawzot laitakin, David munah thu kiko a: “Absalom in na tapate theampo thatlum zo hi — khat zongh kikhe ngawl hi!”

³¹Kumpipa hong ding a, a puansilh lai sia heena taw eaukeak in, leiliik hi. Ama taw a omkhawm naseamte zongh a puante eaukeak uh hi.

³²Ahihang David ii suapuipa Shammah ii tapa Jonadab in, “Kumpipa awng, amate in na tapa theampo that siat ngawl hi. Amnon bek thi hi. Amnon in Absalom suapuinu Tamar a buan pan kipan hi bangin a ngamtat tu sia a khensat sa ahi hunlam Absalom na et ciang son thei ni hi.

³³Tua ahikom na tapate theampo thi hi ci thuthang sia um heak in; Amnon bekma kithat hi,” ci hi.

³⁴Tua lanin Absalom tai zo hi. Tua zawk bekin ngal encik ngalkappa in Horonaim sang pan mualtung lampi hong tawnsuk mihonpi khat mu hi. Ama in kumpipa kungah pai in a mu teng ko hi.

³⁵Jonadab in David munah, “Tuate sia kong sonsa bangin na tapate hong cia hi,” ci hi.

³⁶Hi teng a son zawk po ciang, David ii tapate hong tum a: amate kap a, David le a uliante zongh nasia takin kap uh hi.

³⁷Absalom sia tai in, Ammihud ii tapa Talmai, Geshur kumpipa kung zuan a, tuaciang tua munah kum thum sung om hi. David in a tapa Amnon atu khuangei pi ma khuangai hi;

³⁹ahihang Amnon thina huvau a khuangaina a theau zawkciang a tapa Absalom bebek thangai in hong om hi.