Read Siyin Chin 2 Samuel 16 Bible Online

2 Samuel 16 - Siyin Chin bible

2 Samuel 16

¹David in mualdawn a kan zawkciang thakhat thu in Mephibosheth ii naseampa Ziba taw kisi hi, ama in laa nii hong keng a, a laate in anluum luum 200, sapitko bom zakhat, thingnga hing bom zakhat le savun ip khat dim sapittui hong pua hi.

²Kumpipa David in, “Tuate theampo bang tu ci ni ziam?” ci in dongh hi. Ziba in, “Laate sia kumpipa innkuanpuite to natu hi a, anluum le thingngate sia mihingte neak tu, tuaciang sapittui sia dui sungah amate a toi ciang a dawn tu hi,” ci in zo hi.

³Kumpipa in, “Na topa Saul ii tupa Mephibosheth koisung a om ziam?” ci in dongh hi. Ziba in, “Ama Jerusalem ah om hi, banghang ziam cile tu in a pu Saul ii neisa theampo, Israel te in ama tungah pia tu in um tatak hi,” ci in zo hi.

⁴Kumpipa in Ziba munah, “Mephibosheth ii neisa theampo nangma tang tu ni hi,” ci hi. Ziba in “Kei na naseampa khi hi. Kumpipa nang hong lungkimsak tawntung tu pa hong suaksak ta'n,” ci in zo kik hi.

⁵Kumpipa David sia Bahurim a thet ciangin Saul mealheak khat, Gera ii tapa Shimei sia ama taw kisi tu in hong pai in ama haamsiat hi.

⁶David sia ama uliante le a cingte in kiim uum napi Shimei in suang taw deang hi.

⁷Shimei in haamsiat a, “Tai in! Tai in! Mi that pa! Mimaw mikhial pa!

⁸Nang in Saul ii kumpi ngam na suan a, tu in TOPA in Saul ii innkuanpuite na suamlup hu in daan hong pia hi. TOPA in kumpi ngam sia na tapa Absalom hong piaksak hi, tu in lalcip zo ni hi, nang mi that pa!” ci hi.

⁹A nu Zeruiah ahi Abishai in, “Kumpipa awng, banghangin ui hisia in nang haamsiatsak ni ziam? Ama ii kungah hong paisak ta'n a, a lu hong tansak ta'n!” ci hi.

¹⁰Kumpipa in Abishai le a suapuipa Joab munah, “Hisia no taw bangma kisai bo. TOPA ii sawl hu in hong haamsiat ahile akua in khaam thei tu ziam?” ci hi.

¹¹Tuaciang David in Abishai le a uliante theampo munah, “Keima tapa in kei hong thatlum nuam a hanciam hi; tua ahiciang Benjamin mi khat ii ngamtatna banghangin lamdang sa nu ziam? TOPA in a haamsiat natu in sawl hi; tua ahiciang ama nguak koi po vun a, tuabang hisak vun.

¹²TOPA in ka lungmanna hong heaksak tha tu a, ama ii hong haamsiatna sia taangin kei atu thupha pawlkhat hong pia nuam hi tu hi,” ci hi.

¹³Tua ahikom David le a mite a lampai zom suak hi. Mualpangh a paina ah Shimei in amate pha valep a; a pai kawkawm in amate haamsiat a, suang le lei taw deang hi.

¹⁴Kumpipa le a mite theampo Jordan ngun a thet ciangin, amate a tha uh zawm mama zo ahikom tua munah tawlnga uh hi.

¹⁵Absalom le ama taw kikop Israel te theampo Jerusalem khua ah tum a, Ahithophel zongh amate taw om hi.

¹⁶David ii muan a lawmpa Hushai in Absalom taw a kisik ciang, “Kumpipa a khansau tahen! Kumpipa a khansau tahen!” ci in au hi.

¹⁷Absalom in, “Na lawmpa David tungah na thumaanna teng bang suak ziam? Banghangin ama taw ton ngawl ni ziam?” ci in dongh hi.

¹⁸Hushai in, “Banghangin ton thei tu khi ziam? TOPA ii tealpa, mipite ii teal pa, le Israel mi bup ii teal pa sangah pang khi hi. Kei nang taw om tu khi hi.

¹⁹A khakbel in ci leang, ka topa ii tapa atu ka seam buale akua dang atu seam tu khi ziam? Na pa atu ka sepsak bangma in tu in nang atu hong sepsak tu khi hi,” ci in zo hi.

²⁰Tua zawkciang Absalom in Ahithophel sang nga in, “Tu in hi sungah ei teng om ci leang ih ngamtat natu ngaisutna bang hong pia tu ni ziam?” ci in dongh hi.

²¹Ahithophel in, “Va pai ta'n a, na pa ii kumpi inn a cing tu in a nusiat a zinote luppui in. Tua hile Israel a om theampo in nang sia na pa in a ngalin hong nei hi, ci in he tu uh hi, tuaciang na nungzuite nasia takin kihansua tu hi,” ci in zo hi.

²²Tua ahikom amate in kumpi inn khuvum tungah Absalom atu puanbuk khat khaksak a, Absalom tumin ngual theampo mu tangin, a pa ii zinote luppui hi.

²³Tua hunin Ahithophel ii ngaisut piak pawpo sia Pathian kammal bang keak ma in kisaang a; David le Absalom in zui khawm uh hi.