Read Siyin Chin 2 Samuel 17 Bible Online

2 Samuel 17 - Siyin Chin bible

2 Samuel 17

¹Tua zawk a ngeingawlin, Ahithophel in Absalom munah, “Pasal tulsawm le tulnii hong tealsak ta'n a, tu nitakin David ka na del tu hi.

²Ama a toi laitak le a thinkiam laitakin ka na sim tu hi. Ama lau tu a, a mite theampo taikeak tu hi. Keima in kumpipa bekma ka that tu a,

³tuaciang mo khat a pasal kung a zot kik bangin nangma kungah a mite kong paipui tu hi. Na thalup nop sia mihing khat bekma hi a; a dang teng bangma tat ngawl tu hi,” ci hi.

⁴Hi ngaisutna sia Absalom le Israel lampuite atu in ngaisutna pha hi tuak sa uh hi.

⁵Absalom in “Tu in Hushai sam vun, ama in bang ci nop a nei ziam ngai sin tawng,” ci hi.

⁶Hushai a thet ciang, Absalom in ama munah son a, “Ahithophel ii ngaisut hong piak hi bang teng hi; tuasia ih zui tu ziam? Ih zui buatu le, ih ngamtat natu nangma hong son ta'n,” ci hi.

⁷Hushai in, “Tu tungin Ahithophel ii ngaisutna hong piak sia pha ngawl hi.

⁸Na pa David le a mite sia ngalsim a hatte hi a, a note a kilaaksak vompui a kiitakhuai za in kiitakhuai hi. Na pa sia ngalsim zia a he sa khat hi a, zanin a mite taw mun khat ah omkhawm ngawl tu hi.

⁹Tu laitak lian bangin ama sia suanghawng sung khat ziam a dang mun khat ziam ah om tu hi. David ii na mite a sim po ciang tua thu a za pawpo in na mite ngallel sa hi ci tu uh hi.

¹⁰Tawpite bangin kiitak a nei ngawl a hangsan belte ngawngawn lau tu hi, banghang ziam cile Israel ngam a om a kuama po in na pa sia ngalkap lian khat hi a, a mite zongh ngalsim a hatte vive hi ci in he uh hi.

¹¹Kei ii ngaisut kong piak nopna pan, tuipivaal a senneal za bangin a tam Israel te, ngam mong khat pan mong khat dong khawmtua in a, tuaciangin ngalsimna ah nangma mama in lampui in.

¹²David sia a omna po ah ih mu tu a, tuaciang ama in bang piang ziam ci a heak ma in ih sim tu hi. Ama ahizong a mite ahizong a suakta om ngawl tu hi.

¹³Ama in khuapi sung tuu in a nungkin le zong, ih mite in khauzeente keng tek tu a, a khuapi mama a nuaisang kuam sungah ih kaisuk tu hi. Tua mual tungah suangtum khat dongin kikhe ngawl tu hi,” ci in zo hi.

¹⁴Absalom le Israel te theampo in, “Hushai ii ngaisut piakna sia Ahithophel aa sangin phazaw hi,” ci uh hi. Absalom ii tuasiatna hong tun natu in Ahithophel ii ngaisut pha a piak sia a kizui ngawl natu in TOPA in khensat zo hi.

¹⁵Tua zawkciang Hushai in thiampite Zadok le Abiathar te munah, Absalom le Israel lampuite tungah ama in bang ngaisutna teng pia a, Ahithophel in bang ngaisutna teng pia ziam ci in son hi.

¹⁶Hushai in belap a, “Tu in manlang vun! Ama le a mite kiman in a kithalup ngawl natu in, ngun kaantanna dui sungah zanin om heak hen a, Jordan ngun thakhat a kaantan paih natu David tungah thu puak vun,” cisak hi.

¹⁷Abiathar ii tapa Jonathan le Zadok ii tapa Ahimaaz te in Jerusalem khua puasia a om Enrogel cik panin ngak uh hi, banghang ziam cile amate in khuapi sung a tum sia kimusak ngam ngawl hi. Naseam numei khat hun maanmaan in pai a, bang thu veu om ziam ci in amate tungah son hi, amate in Kumpipa David kungah pai in tua thute sonsawn uh hi.

¹⁸Ahihang ni khat ni ciangin patang khat in amate mu luilam hi, tuaciang ama in Absalom munah son hi; tua ahikom amate in manlang takin tai a Bahurim khua sung pasal khat ii inn ah buu uh hi. Ama in a inn hui ah tuikhuk khat nei a, tua ii sungah tuaksuk uh hi.

¹⁹Pasal pa ii zi in a sit natu khat la in tuikhuk vang tungah zalh a, antang pawlkhat a tungah poai hi, tua ahiciang kuama in bangma a lamdang a mu bua uh hi.

²⁰Absalom ii uliante hong pai a, tuaciang numeinu munah, “Ahimaaz le Jonathan koi sungah om ziam?” ci in dongh hi. Tua nu in, “Amate ngun kaanin pai zo hi,” ci hi. Pasalte in tuate ngeal zong ahihang mu zo ngawl ahiciang, Jerusalem ah heak kik uh hi.

²¹Amate ii pai zawkciang Ahimaaz le Jonathan te tuikhuk sung pan pusuakin, David kumpipa kungah pai a tua thu ko hi. Ahithophel ii ama langpanin a ngealna teng ko a, tuaciang, “Manlang vun a, ngun kaantan vun,” ci uh hi.

²²Tua ahiciang David le a mite Jordan ngun kaantan a, khuavak bek in amate theampo a ngalkhat theng siat zo uh hi.

²³Ahithophel in ama ii ngaisut piakna kizui ngawl hi ci in a mu ciang, a laa tung to in ama ii khuapi ah cia kik hi. Ama vai tuatuamte ahi tu bangin a vawt siat zawkciang ama le ama awklum hi. Ama sia a innkuan ii thaan ah kiphum hi.

²⁴Absalom le Israel te ii Jordan ngun a kaantan hunin, David sia Mahanaim khua theng zo hi.

²⁵(Absalom in Joab taangin Amasa sia ngalkaphonpi ukpa in koi hi. Amasa sia Ishmael mi Jether ii tapa hi a; ama ii nu sia Nahash ii tanu, Joab ii nu Zaruiah ii suapuinu Abigail ahi hi.)

²⁶Absalom le a mite in Gilead ngam ah ngiaphual saat uh hi.

²⁷David sia Mahanaim hong thet ciang Ammon ngam Rabbah khuapi pan Nahash ii tapa Shobi, Lodebar pan Ammiel ii tapa Machir le Gilead ngam Rogelim pan Barzillai te in muak uh hi.

²⁸Amate in meekuangte, tungbealte, zanpuan, tuaciang an zongh David le a mite atu in hong puak hi; zungtaang, mangtaang, anvui, antang kan, benaang, be, khuaitui, noaikhal, noaidiat le tuu pawlkhat hong puak uh hi. Amate in David le a mite dui sungah a toi tu, ngilkial dangtaak in a om tu hunlam he uh hi.