Read Siyin Chin 2 Samuel 2 Bible Online

2 Samuel 2 - Siyin Chin bible

2 Samuel 2

¹Hisia zawkciang David in TOPA dongh a, “Keima pai in Judah khuate khat ka uk tu ziam?” ci hi. “Uk in,” ci in TOPA in zo hi. David in “Koisia ziam?” ci in, dongh hi. TOPA in, “Hebron” ci hi.

²Tua ahikom David in Hebron ah a zite nii ahi Jezreel pan Ahinoam le Carmel pan Nabal ii zi meingongnu Abigail te kengin pai hi.

³Ama in a mite le tuate ii innkuanpuite zongh paipui a, Hebron kiim a khuate ah teang uh hi.

⁴Tua zawkciang Judah pan a mite Hebron ah hong pai in David sia Judah kumpipa tu in sathau noai uh hi. Gilead ngamsung Jabesh mite in Saul luang a phum sia David in a zaak ciangin,

⁵tualai ah mihing pawlkhat paisak a, kam vaitha hi: “Na kumpipa tungah a luang na vuina taw thumaanna na lak uh a, na lak uh hu in TOPA in thupha hong pia tahen.

⁶Tu in TOPA dikna, a thumaanna no tungah hong tung tahen. Noma nasepna sa te hangin kei zongh no hong phatvawt tu khi hi.

⁷Hat vun a, hang vun! Noma kumpipa Saul thi zo a, Judah mite in kei sia a kumpipa ci in sathau hong noai zo hi.”

⁸Saul ii ngalkaphonpi ukpa Ner ii tapa Abner sia Saul ii tapa Ishbosheth taw Jordan ngun kaantan in Mahanaim ah tai khawm hi.

⁹Tua sungah Abner in Ishbosheth sia Gilead, Asher, Jezreel, Ephraim le Benjamin ngam teng ii kumpipa in koi a, a tatakin Israel ngam buppi uk hi.

¹⁰Israel kumpipa in a kikoi hun in, ama sia kum 40 pha a, kum nii sung uk hi. Ahihang Judah nam in David tungah thumaan ahiciang,

¹¹ama in Hebron panin Judah te kum sali le kum lang sung uk hi.

¹²Abner le Ishbosheth ii uliante Mahanaim pan Gibeon khuapi ah pai uh hi.

¹³Zeruiah ii tapa Joab le David ii ulian dangte sia amate taw tuicing khat hui ah kisii uh hi, tua munah amate teng, pawlkhat sia tuicing ii langkhat ah, pawldang khat sia tuicing ii a langkhat ah to hi.

¹⁴Abner in Joab munah, “Eima sang tek panin khangnote pawlkhat veve sawlin kido kidemsak tawng,” ci hi. Joab in, “Hi hen,” ci hi.

¹⁵Tua ahikom Ishbosheth le Benjamin namte taangin mihing sawm le nii, le David mihing sawm le nii te kidosak hi.

¹⁶Misim in a kido pui tek sia a lu pan kizamh in, namsau taw a pangh tek kihol uh ahiciang mihing 24 sia pukin thi siat uh hi. Tua ahikom Gibeon ah tua mun sia, “Namsaute Lo” kici hi.

¹⁷Tua zawkciang kidona nasia mama khat hong nei in, David mite in Abner le Israel te zo uh hi.

¹⁸Zeruiah ii tapate thum tua sungah kihel hi: Joab, Abishai, le Asahel ahi uh hi. Asahel sia ngamsa, sangai bangin a tai ngang a,

¹⁹Abner del tan pai hi.

²⁰Abner in nung lee et kik a, “Nangma Asahel ni ziam?” ci hi. Ama in, “Hi khi hi,” ci in zo hi.

²¹Abner in, “Kei hong del heak in! Ngalkapte khat del in a, a nei po laaksak in,” ci hi. Ahihang Asahel in ama del tan lai hi.

²²Khatvei ma Abner in, “Hong del heak in! Banghang nang hong thatlumsak hamtang tu ni ziam? Tuabang hi leng bangbangin na suapui pa Joab mai mu ngam tu khi ziam?” ci hi.

²³Ahihang Asahel a tawlnga nuam bua hi; tua ahikom Abner in a tei taw a nungsang a khaw le Asahel ngil kha in a nungah pailet hi. Asahel lei ah topsuk in thi hi, tuaciang tuak a luang sialna munah hong pai peuma in tawlnga in en uh hi.

²⁴Ahihang Joab le Abishai in Abner ii nung zuizenin, nitum ciangin Giah ngam nisuana sang, Gibeon duisung paina lampi tung, Ammah mual theng hi.

²⁵Benjamin nam pan pasalte Abner ii kiim ah kikhawmtua kikin mualdawn khat tungah ngalnanna mun la uh hi.

²⁶Abner in Joab oksan a, “Tawp hun nei ngawlin kido tan tu hi ziam? A khakbel ciang thin lalna simngawl bangma dang taang nawn ngawl tu ci in mu thei ngawl nu ziam? Ko sia na ngammipuite khu hi. Na mite munah ko hong del a tawp natu thu na piak tu, bang tanvei hai tu ziam?” ci hi.

²⁷Joab in, “Pau ngawl hi thong lete ka mite in zingsang khuavak dong hong del tu hi, ci in a nungta Pathian taw kiciam ngam khi hi,” ci in zo hi.

²⁸Tua zawkciang Joab in Israel te a del a mi teng a tawlngak natu in lemle tum hi; tuabangin kidona tawp uh hi.

²⁹Abner le a mite sia Jordan Kuam dungah zankhua in pai uh hi; amate Jordan ngun kaantan in, a zingsang kik hunsung bup a pai suak zawkciang, Mahanaim theng kik uh hi.

³⁰Joab in ngal del a tawp zawkciang a mi teng a khoptua le, Asahel kihel in a kingawm mihing sawm le kua kisamh hi.

³¹David ii mite in Benjamin nam Abner ii mite 360 that uh hi.

³²Joab le a mite in Asahel luang phaam in, Bethlehem khua a innkuan ii thaan ah phum uh hi. Tua zawkciang zankhua in pai a, zingsang khuavak bek in Hebron theng kik uh hi.