Read Siyin Chin 2 Samuel 20 Bible Online

2 Samuel 20 - Siyin Chin bible

2 Samuel 20

¹Gilgal ah Benjamin mi Bikri ii tapa Sheba a kici mihing mannung ngawl khat om hi. Ama in lemle tumin au a, “David taak hen! Ei ama zui ngawl tu hi hing! Israel pasalte awng inn ah cia tawng!” ci hi.

²Tua ahikom Israel te in David nusia in Sheba zui ahihang Judah mite sia thumaan top in, Jordan pan Jerusalem ah David zui uh hi.

³Jerusalem khua a kumpi inn ah David a thet ciangin kumpi inn cing tu in ama nusiat zino sawm teng la in, a cingte ii khutnuai ah koi hi. Amate ii taangsapna babangin sik hi, ahihang amate taw nupa vai in omkhawm ngawl hi. A nuntak lai teng kikhumcip in meingong bangin nungta hi.

⁴Kumpipa in Amasa munah, “Judah mite khawmtua in, thai ciangin amate taw hi lai ah hong heak kik tavun,” ci hi.

⁵Amasa in amate khawmtua tu in pai hi, ahihang kumpipa hunciam lapin a theng kik bua hi.

⁶Tua ahikom kumpipa in Abishai munah, “Absalom sangin Sheba in ngim hong pia zaw tu hi. Ka mite la in a, ama del in, tua ahibuale kulh taw a ki uum khua pawlkhat hong la tha tu a, ei kung pan suakta tu hi,” ci hi.

⁷Tua ahikom Joab ii mite, kumpi cingte le ngalkap dang teng in Abishai taw Jerusalem nusia in Sheba del uh hi.

⁸Amate suangpi khat sia omna Gibeon a thet uh ciang Amasa taw kisi uh hi. Joab sia ngalsim natu puansilh in, a namsau sia a paai taw a kawngkhau tungah khit hi. Ama mai sangah a pai laitak a namsau taaksua hi.

⁹Joab in Amasa munah, “Bang na ci ziam, ka lawmpa awng,” ci in, ama namh tu bangin a khut ziatsang taw a khamul len hi.

¹⁰Amasa sia Joab ii a khut langkhat ah a toai namsau sia pan kidal ngawl ahikom Joab in a ngil panin sun a, a ngilzang teng lei ah keekeak hi. Ama thakhatin thi paih a, Joab ii a sat kik kul ngawl hi. Tuaciang Joab le a suapui pa Abishai in Sheba del uh hi.

¹¹Joab ii mi khat Amasa ii luang hui ah ding a, “Joab le David mi ahi theampo in Joab nung zui vun!” ci in au hi.

¹²Chi taw a kidim Amasa ii luang sia lampi laizang ah liik hi. Joab ii mihing pa in, a kuama theampo in tawlnga in a et thong uh bek a mu ciang, ama in a luang sia lampi pan lo sungah kai in, puanvan taw siin hi.

¹³A luang lampi pan a khiin zawkciang a kuama po in Joab zui in Sheba del uh hi.

¹⁴Sheba in Israel nam theampo ii ngam kaantan in, Abel Beth Maacah khuapi ah pai hi, tuaciang Bikri ii bee le phungte hong kikhawm a, khuapi sungah ama nung zui uh hi.

¹⁵Joab ii mite in Sheba sia tua munah a om hunlam za uh ahikom amate pai in khuapi uumci uh hi. Luphung puanung pangh panin lei vum tosak a, a luphung cip thei natu in a nuai pan zong lei to hi.

¹⁶Tua khuapi sungah nupi ciim khat om a, tua nu in luphung panin au a, “Na ngai vun! Na ngai vun! Joab hi sungah hong pai natu in na son vun; ama taw thu son nuam khi hi,” ci hi.

¹⁷Joab pai a, tuaciang tua nu in, “Nang Joab na hi ziam?” ci in dongh hi. Ama in, “Hi hi, keima khi hi,” ci in zo hi. Tua nu in “Topa awng hong ngai ta'n,” ci hi. Ama in, “Hong ngai tu khi hi,” ci in zo hi.

¹⁸Tua nu in, “Nidang tawngh lai in, ‘Abel khuapi ah pai in a, hong zo kikna ngai in’ — kici a, tuabang ma in kingamta hi.

¹⁹Ko khuapi sia lian a, Israel ngam ah kilemna a om bel, a thumaanbel khuapi khat ahi hi. Banghangin tuasia suksiat tu hanciam ni ziam? Pathian ii neisa sia zaanciimsak nuam ni ziam?” ci hi.

²⁰Joab in, “Hi ngei ngawl tu khi hi! Na khuapi sia bangma hunin zaanciimsak, ahibuale hong suksiatsak ngeingawl tu khi hi!

²¹Tuabang sia ko ngealna hi ngawl hi. Ephraim mualtung ngam pan Bikri ii tapa Sheba a ci sia in Kumpipa David langpanin leedo hi. Hi sia pa hong aap lete, khuapi pan nungkin tu khi hi,” ci in zo hi. “Ama lutang sia luphung tung kan in no kungah kong lawn tu hi,” tua nu in ci hi.

²²Tua zawkciang ama tua khua mite kungah ama ii ngealna taw pai hi, amate in Sheba ii lu tan in, luphung kaantan in Joab kungah lawn uh hi. Ama in a mite khuapi a nusiat natu in lemle tum a, amate inn ah ciakik uh hi. Taciang Jerusalem kumpipa kungah Joab heak kik hi.

²³Joab sia Israel ngalkaphonpi ukpa hi; Jehoiada ii tapa Benaiah sia David a cingte a ukpa hi;

²⁴Adoniram in zawthawk thu taw kisawlin na a sepsakna teng uk a; Ahilud ii tapa Jehoshaphat in tepteena lai teng sai hi;

²⁵Sheva sia kumpi zum thuzeakpa ahi hi; Zadok le Abiathar te sia thiampi te ahi uh hi,

²⁶Tuaciang Jair khua pan Ira zongh David ii thiampi khat ahi hi.