Read Siyin Chin 2 Samuel 22 Bible Online

2 Samuel 22 - Siyin Chin bible

2 Samuel 22

¹TOPA in David sia Saul le a ngal dangte kung panin a hutkhiat ciangin David in TOPA tungah hi la a sak hi.

²TOPA in kei hong dal pa hi; ama sia ka kulh kho ahi hi.

³Ka Pathian sia ka kidalna hi a, tuaciangin ama hangin kei ka ngammuang hi. Ama in lum bangin kei hong sung hi; ama in kei hong hung a, kei hong keamcing hi. Ama in ka ngumpa hi; Ama in a ngoltolte kung panin kei hong dalin hong hun hi.

⁴TOPA ka biakpui a, ama in ka ngalte kung panin hong hun hi. TOPA pok vun!

⁵Thina tuihualte ka kiim theampo ah om a; lalna tuihualte kei tungah hong kihual hi.

⁶Thina ii lau huaina ka kiim ah hong om a, tuaciang thaankuul in kei thaang hong sia hi.

⁷Ngim ka nga ciangin TOPA ka biakpui a; ka Pathian munah hu ka ngen hi. A biakinn sung pan ka aw hong za a; hu ngen in ka auna aw ama in hong ngai hi.

⁸Tua zawkciang leitung sia liingin ngawk a; van ii a bul a zungte kivei in liing hi, banghang ziam cile Pathian a thin uuk hi!

⁹A naak hawng panin meikhu hong pusuak a, a kam sung pan a kaanghtumsak thei meikuang le meikam leang hi.

¹⁰Ama in vantung balkeakin hong pai suk a, a peang nuai ah meeivom kaai hi.

¹¹Ama in cherub tha tungah to in manlang takin leang a; vui ii thakhui te tungah khualhaw hi.

¹²Ama le ama khuazing taw kituam a; tui taw kidim meeikaai saate in ama kiim uum hi;

¹³khualeng in meikamte ama mai ah kuangsak hi.

¹⁴Tuaciang TOPA in van pan vanto nging bang hisak a, Vaanglianbelpa Pathian ii aw kiza hi.

¹⁵Ama in a thaltangte kap a, a ngalte kithethaangsak hi; khualeng kuang taw amate taisak hi.

¹⁶TOPA in a ngalte a teih ciang le a thin uukin a hawksan ciangin, Tuipi ii tawdap kihawk a, leitung ii tawdap kilawt hi

¹⁷TOPA in tungsang panin hong baan suk a, kei hong len hi; ama in tuithukna panin kei hong kaito hi.

¹⁸A thahat ka ngalte kung pan ahizong kei hong ensan theampo te kung pan ahizong hong suatak hi — kei atu in amate hat leih uh hi.

¹⁹Ngim ka nga ciang, amate in kei hong sim a, ahizong TOPA in kei hong dal hi.

²⁰Ama in launa pan hong hu a; kei tungah hong lungkim hu in kei hong hun hi.

²¹A maan bang ngamta ka hikom TOPA in kei, tel hong pia hi; paubaang ngawl ka hikom ama in thupha hong pia hi.

²²TOPA thukham ka ni a; ka Pathian kung pan ka puapial bua hi.

²³Ama ii thukham theampo ka tang a; a thupiakte ni ngawlin ka om bua hi.

²⁴Ama in ka maw ngawl hunlam hong he a, a maan ngawl ngamtatnate pan ka kikep hong he hi.

²⁵A maan bang ngamta ka hikom ama in tel hong pia hi, banghang ziam cile paubaang ngawl ka hi hong he hi.

²⁶TOPA awng, nang tungah hong thumaante tungah na thumaan a, a cialcingte tungah na phatna kicing hi.

²⁷Nangma in a thiangtho te ii tungah na thiangtho a, ahizong a seksolte na ngal vawt hi.

²⁸A kiniamkhiakte na ngum a, ahizong a kiphasakte na kiniamkhiaksak hi.

²⁹Nangma, TOPA, ka khuavak na hi hi; ka khuazing na nilkeak hi.

³⁰Ka ngalte ka sim natu in thahatna nong pia a, amate kihuuknate ka zaw zawk natu in vaangletna nong pia hi.

³¹Hi Pathian — bangza in ama nasepnate cialcing a, ama kammalte suan taak ziam! Ama hong dalna a zong theampo atu in ama in lum khat taw kibang hi.

³²TOPA bekma Pathian hi a; Pathian bekma ih kihuukna ahi hi.

³³Hi Pathian in a kip a kho ka bukna hi; Ama in ka lampi ngammuangsak hi.

³⁴Ama in ka peangte sangai bangin kho takin hong khuasuansak a; mualte tungah kei hong keamcing hi.

³⁵Ama in ngal kisim hong sinsak a, tuasia ciang thalkawng a khobel zongh ka zangh thei hi.

³⁶Oh, TOPA, nangma in nong dal a, nong hun hi; nong huna in keima hong thupisak hi.

³⁷Hong kimat natu panin nong keam a, bangma hunin ka puk ngei bua hi.

³⁸Ka ngalte ka del a ka zo hi; amate ka mot mateng ka tawp bua hi.

³⁹Amate ka vaat vawk a, a thoto zo bua uh hi; amate ka mai ah ngallel in puk uh hi.

⁴⁰Ngal do natu in thahatna nong pia a; ka ngalte nong zosak hi.

⁴¹Ka ngalte ka kung panin na taisak a; kei hong ensan te ka mon hi.

⁴²Amate in huna zong ka le kuama in hun ngawl hi; amate in TOPA biakpui hikale ama in zo ngawl hi.

⁴³Amate ka sucip a, leivui bang suak uh hi; lampi ah a om buan bangin amate ka tuanhcil hi.

⁴⁴Hong leedo ka mite kung pan nong hun a minamte ka ukna nong kipsak hi; tu in ka heak ngeingawl mihingte ka khutnuai mi suak uh hi.

⁴⁵Ngamdangmite ka mai ah hong kun a; amate in ka kammal a zaak ciang hong ni hi.

⁴⁶Amate a thin letna uh bosua in, a kulhte sung pan liing vadil in hong pai uh hi.

⁴⁷TOPA nungta hi! Kei hong hunpa pok vun! Kei hong hun a thahat Pathian ii letna thangsak vun.

⁴⁸Ama in ka ngalte hong zosak hi! minamte ka khutnuai ah ama in huthe ngam ngawlin koi a;

⁴⁹ka ngalte kung pan kei hong hun hi. Oh TOPA, ka ngalte nong zosak a, a ngoltol mite kung panin nong dal hi.

⁵⁰Tua ahiciang minamte sungah nang kong pok a; na tungah pokna late kong sak hi.

⁵¹Pathian in a kumpipa tungah zawna liante pia hi; ama in a tealsa khat ii tungah itna kip lak a, David le a suan a paalte tungah itna kip a tawntungin lak hi.