Read Siyin Chin 2 Samuel 4 Bible Online

2 Samuel 4 - Siyin Chin bible

2 Samuel 4

¹Hebron khua ah Abner kisuamlupna thu, Saul ii tapa Ishbosheth in a zaak ciang lau mama a, Israel mite theampo patau uh hi.

²Ishbosheth in ulian nii nei a, ngalsim lampuite veu ahi hi, amate Benjamin nam, Beeroth khua pan Rimmon ii tapate hi a, Baanah le Rechab ahi uh hi. (Beeroth sia Benjamin ngam in kiciamtee hi.

³A teangciil te sia Gittaim ah a tai pan kipan tua munah teang uh hi.)

⁴Saul ii suan le paal dang khat sia Jonathan ii tapa Mephibosheth hi a, kum nga a phak laitakin Saul le Jonathan ngal sungah kithat hi. Jezreel khuapi panin amate ii thina a kizaak ciang, ama a omh nu in zamh a taipui hi; ahihang ama manlang nuam mama ahikom a nau taaksua tha a, a peangbai khat suak hi.

⁵Rechab le Baanah te Ishbosheth inn ah a haw tu in hong pai in, sun hun ama ii tawlngak laitakin tualai ah theng uh hi.

⁶Numei kongkhacing sia zungtaang kheapin a omna ah lusu in mu zo hi, tua ahikom Rechab le Baanah te tum ku uh hi.

⁷Amate inn sung hong thet poma ciang Ishbosheth ii lupna inndoi sungah tum in, ama mutthip in om sia thatlum hi. Tua zawkciang a lu tansak a, Jordan Kuam zui in zankhua paipui uh hi.

⁸Amate in a lutang sia Hebron ah David pia a, “Nang hong that tu a hanciam na ngalpa Saul ii tapa Ishbosheth lutang hi sungah om hi. Tuni in TOPA in kumpipa nang sia Saul le a suan a paal te tungah phulaak tu hong oai hi,” ci uh hi.

⁹David in, “Launa theampo pan hong hun a nungta TOPA taw ka kiciam hi!

¹⁰Kamtaipa sia kei kung Ziglag ah hong pai a, Saul ii thina sia lungdamhuai thu sa in kei hong son hi. Ama man in thatsak khi hi. Ama hong puak lungdamhuai thu hu a, tel ka piak sia tuabang hi!

¹¹Mawnei ngawl, ama inn sungah a mu mihing khat a suamlum mi ngilote atu in bangza in sia zaw lai tu ziam! Tu in ama na suamlup uh hu in a phulamsak tu khi hi, tuaciang no sia lei maitang panin hong zutmaai tu khi hi!” ci in zo hi.

¹²David in thupia a, a ngalkapte in Rechab le Baanah te thatlum in, a khutte a peangte a tansak zawk uh ciang, Hebron tuicing hui ah khai uh hi. Amate in Ishbosheth lutang la in Hebron khua Abner ii thaankuul ah phum uh hi.